ପ୍ରଧାନମନ୍ତ୍ରୀଙ୍କ ବିମାନରେ ତ୍ରୁଟି: ବାୟୁସେନା ବିମାନରେ ଝାଡ଼ଖଣ୍ଡରୁ ଫେରିଲେ

ନୂଆଦିଲ୍ଲୀ: ଝାଡ଼ଖଣ୍ଡର ଦେଓଘରଠାରେ ଆଜି ଅପରାହ୍ନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିମାନରେ ଯାନ୍ତ୍ରିକ ତ୍ରୁଟି ଦେଖାଦେବାରୁ ବିଭିନ୍ନ ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମରେ ବିଳମ୍ବ ହୋଇଥିବା ଜଣାପଡ଼ିଛି। ତ୍ରୁଟି ଠାବ ହେବାର ଦୁଇ ଘଣ୍ଟାରୁ ଅଧିକ ସମୟ ପରେ  ଦିଲ୍ଲୀରୁ ପଠାଯାଇଥିବା ଭାରତୀୟ ବାୟୁସେନାର ଅନ୍ୟ ଏକ ବିମାନରେ  ସେ ଦିଲ୍ଲୀ ଅଭିମୁଖେ ଯାତ୍ରା କରିଥିଲେ। ପ୍ରଧାନମନ୍ତ୍ରୀ ମୋଦୀ ଉଡ଼ାଣ ଭରିବାକୁ ଥିବା ବିମାନରେ ଥିବା ସମୟରେ ହିଁ  ତ୍ରୁଟି ଜଣାପଡ଼ିଥିଲା ଏବଂ ବିମାନକୁ ଦେଓଘରଠାରେ ଅଟକାଇବାକୁ ନିଷ୍ପତ୍ତି ନିଆଯାଇଥିଲା। ବାୟୁସେନା  ବିମାନ ପହଞ୍ଚିବା ପୂର୍ବରୁ ବିମାନରେ ଥିବା ତ୍ରୁଟିକୁ ସୁଧାରିବା ପାଇଁ ମଧ୍ୟ ପ୍ରୟାସ କରାଯାଇଥିଲା। ନଭେମ୍ବର ୨୦ ତାରିଖରେ ଝାଡ଼ଖଣ୍ଡରେ ବିଧାନସଭା ନିର୍ବାଚନ ପାଇଁ ଦ୍ୱିତୀୟ ପର୍ଯ୍ୟାୟ ମତଦାନ ପୂର୍ବରୁ ଆଜି ବିର୍ସା ମୁଣ୍ଡାଙ୍କ ଜୟନ୍ତୀ ତଥା ଜନଜାତୀୟ ଗୌରବ ଦିବସ ଅବସରରେ ପ୍ରଧାନମନ୍ତ୍ରୀ ଝାଡ଼ଖଣ୍ଡରେ ଦୁଇଟି ରାଲିକୁ ସମ୍ବୋଧିତ କରିଥିଲେ।

ଏହା ପୂର୍ବରୁ ପ୍ରଧାନମନ୍ତ୍ରୀ ମୋଦୀ ତାଙ୍କ ରାଲିରେ କଂଗ୍ରେସ ଏବଂ ରାହୁଲ ଗାନ୍ଧୀଙ୍କୁ ଟାର୍ଗେଟ କରିଥିଲେ। ଅନୁସୂଚିତ ଜାତି, ଅନୁସୂଚିତ ଜନଜାତି ଏବଂ ଅନ୍ୟାନ୍ୟ ପଛୁଆ ବର୍ଗ  ସମ୍ପ୍ରଦାୟର ଲୋକଙ୍କୁ ଦୁର୍ବଳ କରିବା ପାଇଁ ସଂରକ୍ଷଣ ରଦ୍ଦ କରିବାକୁ ରାହୁଲ ଗାନ୍ଧୀ ଷଡ଼ଯନ୍ତ୍ର କରୁଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ। କଂଗ୍ରେସର ବିପଜ୍ଜନକ ଉଦ୍ଦେଶ୍ୟ ରହିଛି। ଅନୁସୂଚିତ ଜାତି, ଜନଜାତି ଓ ଓବିସିଙ୍କ ସଂରକ୍ଷଣ   ଉଚ୍ଛେଦ କରିବାକୁ କଂଗ୍ରେସର ‘ଶେହଜାଦା’ ଷଡ଼ଯନ୍ତ୍ର କରୁଥିବା ମୋଦୀ କହିଥିଲେ।  ‘ରାଜକୁମାର(ରାହୁଲ ଗାନ୍ଧୀ)ଙ୍କ ପିତା ସଂରକ୍ଷଣକୁ ଦାସତ୍ୱ, ଦାଦନ ଶ୍ରମିକ ବୋଲି ଘୋଷଣା କରିଥିଲେ କିନ୍ତୁ ପରେ ସେ ନିର୍ବାଚନରେ ପରାଜିତ ହୋଇଥିଲେ। ସଂରକ୍ଷଣ ହଟାଇବା ପାଇଁ ସେମାନେ ବିଜ୍ଞାପନ ଜାରି କରିଥିଲେ। ସେମାନେ ଏବେ ବି ସେଭଳି ମାନସିକତାରେ ରହିଛନ୍ତି ଏବଂ ଏଭଳି କୌଣସି ଷଡ଼ଯନ୍ତ୍ରକୁ ଆମେ ବିଫଳ କରିବୁ’ ବୋଲି ପ୍ରଧାନମନ୍ତ୍ରୀ କହିଛନ୍ତି।