ଢାକା: ବାଂଲାଦେଶର ଅନ୍ତରୀଣ ସରକାର ଯେ କୌଣସି ମୁହୂର୍ତ୍ତରେ କ୍ଷମତାଚ୍ୟୁତ ହୋଇପାରେ ଏବଂ ସେନା ଦେଶର ଶାସନ ଭାର ନିଜ ହାତକୁ ନେବ ବୋଲି ଏବେ ‌େସାସିଆଲ୍‌ ମିଡିଆରେ ଖବର ଭାଇରାଲ୍‌ ହେବାରେ ଲାଗିଛି। ଭାରତ ବିରୋଧୀ ଶକ୍ତି ଏବଂ ଇସ୍‌ଲାମିକ ଆତଙ୍କୀ ଗୋଷ୍ଠୀଗୁଡ଼ିକ  ପୂରା ଦେଶରେ ସକ୍ରିୟ ରହିଥିବାରୁ ସବୁଠି ଭୟ ଓ ଆତଙ୍କର ବାତାବରଣ ଲାଗିରହିଛି। ଦେଶରେ ବିସ୍ଫୋରକ ପରିସ୍ଥିତି ନେଇ ସେନା ମୁଖ୍ୟ ସତର୍କ କରାଇ ଦେବାପରେ 
ହଇଚଇ ସୃଷ୍ଟି ହୋଇଛି।   ସମଗ୍ର ଦେଶରେ ବିଶେଷ କରି ରାଜଧାନୀ ଢାକାରେ ସୈନିକ ଓ ଅନ୍ୟ  ସୁରକ୍ଷା କର୍ମୀଙ୍କ ବ୍ୟାପକ ମୁତୟନ ହୋଇଛି। ମହମ୍ମଦ ୟୁନୁସ୍ ସରକାର  ଯେ କୌଣସି ସମୟରେ ବିତାଡ଼ିତ ହେବାକୁ ଯାଉଛି ବୋଲି ଚର୍ଚ୍ଚା ଜୋର ଧରିଛି ଏବଂ ସବୁଠି ଅସ୍ଥିରତା ଲାଗି ରହିଛି। ତେବେ ମହମ୍ମଦ ୟୁନୁସ୍‌ କିମ୍ବା ସେନା ମୁଖ୍ୟ ୱାକର ଉଜ୍ ଜମାନ ଏ ନେଇ କୌଣସି ପ୍ରତିକ୍ରିୟା ଦେଇନାହାନ୍ତି। ବାଂଲାଦେଶ ପରିସ୍ଥିତି ଉପରେ ଭାରତ ସତର୍କ ନଜର ରଖିଛି ଏବଂ ସୀମାରେ ମଧ୍ୟ ସପ୍ତାହେ ହେଲା ସୁରକ୍ଷା କଡ଼ାକଡ଼ି କରାଯାଇଛି।  ସୂଚନାଯୋଗ୍ୟ, ଅନ୍ତରୀଣ ସରକାରର କେତେକ ନେତାଙ୍କ ଭାରତ ବିରୋଧୀ ବୟାନ ଏବଂ ହିନ୍ଦୁ ବିରୋଧୀ ହିଂସା ମାମଲାରେ ଉଭୟ ରାଷ୍ଟ୍ରର ସଂପର୍କ  ଅତି ତିକ୍ତ ପର୍ଯ୍ୟାୟରେ ପହଞ୍ଚିଛି।

Advertisment

ସେନାର ଜରୁରି ବୈଠକ, ସାମରିକ ମୁତୟନ ବଢ଼ିଲା
ସେନା ମୁଖ୍ୟଙ୍କ ବୟାନକୁ ନେଇ କଳ୍ପନାଜଳ୍ପନା
ଭାରତର ସତର୍କ ନଜର

ସେନା ମୁଖ୍ୟ ଜେନେରାଲ୍‌  ଜମାନ ଏକ ଜରୁରି ବୈଠକ ଡକାଇ ଦେଶର ଆଭ୍ୟନ୍ତରୀଣ ନିରାପତ୍ତା ସଂପର୍କରେ ଆଲୋଚନା କରିଛନ୍ତି। କେବଳ ସଂଖ୍ୟାଲଘୁ ନୁହନ୍ତି, ମୁସ୍‌ଲମାନଙ୍କ ଉପରେ ମଧ୍ୟ ଆକ୍ରମଣ ହେଉଥିବାରୁ ଇସ୍‌ଲାମିକ ଆତଙ୍କବାଦକୁ ରୋକିବା ଉପରେ ସେନାମୁଖ୍ୟ ଗୁରୁତ୍ବାରୋପ କରିଛନ୍ତି। ଢାକାର ବିଭିନ୍ନ ଅଂଚଳରେ ହିଂସାତ୍ମକ ବିକ୍ଷୋଭ ଏବଂ ଚରମପନ୍ଥୀ ଗୋଷ୍ଠୀ ଦ୍ବାରା ବିଭିନ୍ନ ସଂସ୍ଥାକୁ କବ୍‌ଜା କରିବାକୁ ପ୍ରୟାସ ଚାଲିଥିବାରୁ ଏହାକୁ ରୋକାଯିବା ଜରୁରି ବୋଲି ସେନାମୁଖ୍ୟ ବୈଠକରେ  କହିଛନ୍ତି। ଗତ ୩ ଦିନ ମଧ୍ୟରେ ତୁହାକୁ ତୁହା ବିକ୍ଷୋଭ ୟୁନୁସ୍‌ ସରକାରର ନିଦ ହଜାଇ ଦେଇଛି।  ବାଂଲାଦେଶ ସେନାରେ ପାକିସ୍ତାନ ସମର୍ଥକଙ୍କ ଏକ ବଡ଼ ଗୋଷ୍ଠୀ ଥିବାରୁ ଏହାକୁ ନେଇ ସେନାରେ ମଧ୍ୟ ବିଭାଜନ ଆଶଙ୍କା ରହିଛି।  ଦେଶର ଅନେକ ଛାତ୍ର ସଂଗଠନ ମଧ୍ୟ ମହମ୍ମଦ ୟୁନୁସ୍‌ ସରକାର ବିରୋଧରେ ବିକ୍ଷୋଭ ପ୍ରଦର୍ଶନ ଜାରି ରଖିଛନ୍ତି। ସବୁଠି  ଅରାଜକତା ସ୍ଥିତି  ମଧ୍ୟରେ ଅନ୍ତରୀଣ ସରକାର ପାକିସ୍ତାନ ଓ ଚୀନ୍‌ର ନିକଟତର ହେବାକୁ ପ୍ରୟାସ ଜାରି ରଖିଛି। ଏଭଳି ସ୍ଥିତିରେ ୟୁନୁସ୍ ଓ ସେନା ମୁଖ୍ୟଙ୍କ ମଧ୍ୟରେ ମୁହାଁମୁହିଁ ସ୍ଥିତି ଏକ ସାମରିକ ବିଦ୍ରୋହର ଆଶଙ୍କାକୁ ବଳବତ୍ତର କରିଛି। ସରକାର ଓ ସେନା ମୁଖ୍ୟଙ୍କ ମଧ୍ୟରେ ତିକ୍ତତା ଚରମ ସୀମାରେ ପହଞ୍ଚିଛି ବୋଲି ରାଜନୈତିକ ବିଶ୍ଳେଷକମାନେ କହିଛନ୍ତି।  ଦେଶରେ ବଢୁଥିବା ଆତଙ୍କବାଦ ମଧ୍ୟରେ ସୁରକ୍ଷା ବ୍ୟବସ୍ଥା ଉପରେ ଆଲୋଚନା ପାଇଁ ସରକାରଙ୍କର ଆଗ୍ରହ ନାହିଁ ବୋଲି ସେନାମୁଖ୍ୟଙ୍କ ବୟାନ ଆଲୋଡ଼ନ ସୃଷ୍ଟି କରିଛି।