ଫାଇନାଲ ମ୍ୟାଚରେ ଭାଷଣ ଦେବାକୁ ଚାଁହୁଥିଲେ ୟୁକ୍ରେନ ରାଷ୍ଟ୍ରପତି, ମନା କଲା ଫିଫା

ନୂଆଦିଲ୍ଲୀ: ଆସନ୍ତାକାଲି ଫିଫା ବିଶ୍ୱକପ ୨୦୨୨ର ଫାଇନାଲ ମ୍ୟାଚ ଖେଳାଯିବ | ଆସନ୍ତାକାଲି ଫ୍ରାନ୍ସ ଏବଂ ଆର୍ଜେଣ୍ଟିନା ମଧ୍ୟରେ ଫାଇନାଲ ଲଢେଇ ହେବାକୁ ଥିବାବେଳେ ଏହି ମ୍ୟାଚ୍ ପୂର୍ବରୁ ଏକ ବଡ ଖବର ସାମ୍ନାକୁ ଆସିଛି ଯେ ୟୁକ୍ରେନର ରାଷ୍ଟ୍ରପତି ଭ୍ଲାଦିମିର ଜେଲେନସ୍କି ଫିଫା ବିଶ୍ୱକପର ଅନ୍ତିମ ମ୍ୟାଚ୍ ପୂର୍ବରୁ ବିଶ୍ୱକୁ ଶାନ୍ତି ବାର୍ତ୍ତା ଦେବାକୁ ଚାହୁଁଥିଲେ। ତେବେ ଜେଲେନସ୍କିଙ୍କ ଏହି ଅନୁରୋଧକୁ ଫିଫା ଦ୍ୱାରା ପ୍ରତ୍ୟାଖ୍ୟାନ କରାଯାଇଛି। ସିଏନ୍ଏନ୍ ରିପୋର୍ଟ ଅନୁଯାୟୀ, ଫାଇନାଲ୍ ମ୍ୟାଚ୍ ପୂର୍ବରୁ ଭିଡିଓ କନଫରେନ୍ସିଂ ମାଧ୍ୟମରେ ୟୁକ୍ରେନର ରାଷ୍ଟ୍ରପତି ଭ୍ଲାଦିମିର ଜେଲେନସ୍କି ଫିଫାକୁ ନିବେଦନ କରିଥିଲେ ଯେ ସେ କିଛି ସମୟ ଭାଷଣ ଦେବେ । ଦୀର୍ଘ ଦିନ ଧରି ୟୁକ୍ରେନ ଏବଂ ଋଷ ମଧ୍ୟରେ ଚାଲିଥିବା ଯୁଦ୍ଧ ବିଷୟରେ ଜେଲେନସ୍କି ବିଶ୍ୱକୁ ଶାନ୍ତିର ବାର୍ତ୍ତା ଦେବାକୁ ଚାହୁଁଥିଲେ।

କିନ୍ତୁ ଫିଫା ତାଙ୍କ ଭାଷଣ ପ୍ରସାରଣ କରିବାକୁ ମନା କରିଦେଇଛି। ରିପୋର୍ଟ ଅନୁଯାୟୀ, ଫିଫା ଏବଂ ୟୁକ୍ରେନ ମଧ୍ୟରେ ଏପର୍ଯ୍ୟନ୍ତ ଆଲୋଚନା ହେଉଛି। ୟୁକ୍ରେନର ଏହି ଅନୁରୋଧରେ ଫିଫା କହିଛି ଯେ ଆମେ (ଫିଫା) ଏକ ବିଶ୍ୱସ୍ତରୀୟ ସଂଗଠନ, ଏହି କାରଣରୁ ଆମେ କାହା ସପକ୍ଷରେ କିମ୍ବା କାହା ବିରୋଧରେ ବିବୃତ୍ତି ଦେବା ପାଇଁ ଏକ ମଞ୍ଚ ହେବାକୁ ଚାଁହୁନାହୁଁ । ଉଲ୍ଲେଖ ଥାଉ କି ୟୁକ୍ରେନ ଉପରେ ଆକ୍ରମଣ ପରେ ଋଷକୁ ଫିଫା ଦ୍ୱାରା ବାରଣ କରାଯାଇଥିଲା। ଉଲ୍ଲେଖନୀୟ କଥା ହେଉଛି, ଏହା ପ୍ରଥମ ଥର ନୁହେଁ ଯେ ଜେଲେନସ୍କି ଶାନ୍ତି ବାର୍ତ୍ତା ଦେବା ବିଷୟରେ କହିଥିଲେ, ସେ ପୂର୍ବରୁ ଅନେକ ଥର ବିଶ୍ୱକୁ ଏପରି ବାର୍ତ୍ତା ଦେଇଛନ୍ତି | ଯୁଦ୍ଧ ଆରମ୍ଭ ହେବା ପରେ ସେ ଅନେକ ସମୟରେ ଏପରି କରୁଥିବା ଦେଖିବାକୁ ମିଳିଥାଏ | କିନ୍ତୁ ଫିଫା ଏଥର ତାଙ୍କ କଥା ଶୁଣିନାହିଁ।