ନଦୀରେ ଗାଧୋଇବାବେଳେ ଭିଡ଼ିନେଲା କୁମ୍ଭୀର, ପାଣିରେ ଲଢେଇ କଲେ ୭୦ ବର୍ଷୀୟ ମହିଳା
ଭଦୋଦରା:ନଦୀ କୂଳରେ ଗାଧୋଉଥିବାବେଳେ ୭୦ ବର୍ଷୀୟ ମହିଳାଙ୍କୁ ପାଣି ଭିତରକୁ ଭିଡ଼ିନେଲା କୁମ୍ଭୀର | ତେବେ ମହିଳାଜଣକ ସାହସ ନ ହରାଇ କୁମ୍ଭୀର ସହ ପାଣି ଭିତରେ ଲଢେଇ କରିଥିଲେ | କିଛି ସ୍ଥାନୀୟ ଯୁବକ ମହିଳାଙ୍କୁ ଉଦ୍ଧାର କରିଥିଲେ ବି ପ୍ରବଳ ରକ୍ତସ୍ରାବ ଯୋଗୁଁ ମହିଳାଙ୍କର ମୃତ୍ୟୁ ହୋଇଯାଇଥିଲା | ତେବେ ମହିଳା ଓ କୁମ୍ଭୀରଙ୍କ ଲଢେଇର ଭିଡିଓ ଏବେ ଭାଇରାଲ ହେବାରେ ଲାଗିଛି | ଏହି ଘଟଣାଟି ଗୁଜୁରାଟର ବାଢ଼ୋଦିଆ ତହସିଲ ଅନ୍ତର୍ଗତ ଗୋରଜ ଗାଁର ଦେବ ନଦୀରେ ଘଟିଥିଲା |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ୭୦ ବର୍ଷୀୟ ଜାଭେରବେନ ଲକ୍ଷ୍ମଣଭାଇ ପାରମାର ନାମକ ମହିଳା ଜଣକ ଦେବ ନଦୀରେ ଗାଧୋଇବାକୁ ଆସିଥିଲେ | ତେବେ ଏହି ସମୟରେ ଏକ କୁମ୍ଭୀର ଆସି ତାଙ୍କୁ ପାଣି ଭିତରକୁ ଟାଣି ନେଇଥିଲା | ମହିଳାଜଣକ ସାହସ ନ ହରାଇ ଜୀବନ ବଞ୍ଚାଇବାକୁ ଲଢ଼ିଥିଲେ |
ତେବେ ମହିଳାଙ୍କ ଚିତ୍କାର ଶୁଣି କିଛି ସ୍ଥାନୀୟ ଯୁବକ ଘଟଣାସ୍ଥଳରେ ପହଂଚି ମହିଳାଙ୍କୁ ଉଦ୍ଧାର କରିଥିଲେ | ଏହା ପରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲେ ବି ପ୍ରବଳ ରକ୍ତସ୍ରାବ ଯୋଗୁଁ ତାଙ୍କର ମୃତ୍ୟୁ ହୋଇଯାଇଥିଲା | ଏହି ଘଟଣା ବାବଦରେ ଜାଣିବା ପରେ ବନ ବିଭାଗ ପକ୍ଷରୁ ଏବେ ତନାଘନା କରାଯାଉଛି |