କୋଚିଙ୍ଗ୍‌ ସେଣ୍ଟର୍‌ରେ ଅଗ୍ନିକାଣ୍ଡ, ଝରକା ବାଟେ ବାହାରକୁ ଡେଇଁଲେ ଛାତ୍ରଛାତ୍ରୀ

ନୂଆଦିଲ୍ଲୀ: ଆଜି ଉତ୍ତରପୂର୍ବ ଦିଲ୍ଲୀ ଅନ୍ତର୍ଗତ ମୁଖାର୍ଜୀ ନଗର ଅଞ୍ଚଳରେ ଥିବା ଗୋଟାଏ କୋଚିଙ୍ଗ୍‌ ସେଣ୍ଟର୍‌ରେ ଅଗ୍ନିକାଣ୍ଡ ଘଟିବାରୁ ଛାତ୍ରଛାତ୍ରୀମାନେ ଝରକା ଦେଇ ବାହାରକୁ ବାହାରି ଆସିଥିବା କଥା ଉତ୍ତୋଳିତ ଭିଡିଓରେ ଦେଖାଯାଉଛି।

ନିଆଁ ଲିଭାଇବା ଓ ଉଦ୍ଧାର କାର୍ଯ୍ୟ କରିବା ପାଇଁ ଘଟଣାସ୍ଥଳକୁ ପ୍ରାୟ ୧୧ଟି ଦମକଳ ପଠାଯାଇଛି ବୋଲି ଦିଲ୍ଲୀ ଅଗ୍ନିଶମ ସେବାର ନିର୍ଦେଶକ ଅତୁଲ ଗର୍ଗ କହିଛନ୍ତି।

ନିଆଁ ଲାଗିବାର ପ୍ରକୃତ କାରଣ ଜଣା ନ ପଡ଼ିଲେ ବି ଗୋଟାଏ ଇଲେକ୍ଟ୍ରିକ୍‌ ମିଟର୍‌ ଯୋଗୁଁ ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି। ଏହି ଘଟଣାରେ ୪ଜଣ ଛାତ୍ର ଆହତ ହୋଇଛନ୍ତି। ଏହା ବଡ଼ ଧରଣର ଅଗ୍ନିକାଣ୍ଡ ନୁହେଁ ବୋଲି ସେ କହିଛନ୍ତି।

Image Courtesy of India Today

ପୁଲିସ କହିବା ଅନୁସାରେ, ତାରରେ ଓହଳି ତଳକୁ ଓହ୍ଲାଉଥିବା ବେଳେ ଛାତ୍ର ୪ଜଣ ଆହତ ହୋଇଛନ୍ତି।

ପ୍ରାରମ୍ଭିକ ସୂଚନା ଅନୁସାରେ, ଅପରାହ୍ଣ ପ୍ରାୟ ୧୨.୩୦ରେ ଉକ୍ତ କ‌ୋଚିଙ୍ଗ୍‌ ସେଣ୍ଟର୍‌ରେ ନିଆଁ ଲାଗିଥିଲା। ଅଗ୍ନିଶମ ବିଭାଗ ସେୟାର୍‌ କରିଥିବା ଭିଡିଓରେ ଦେଖାଯାଉଛି, ଝରକା ବା‌ଟ ଦେଇ ଅଗ୍ନିଶମ କର୍ମଚାରୀମାନେ ଲୋକମାନଙ୍କୁ, ବିଶେଷ କରି ଛାତ୍ରଛାତ୍ରୀମାନଙ୍କୁ ବାହାରକୁ ଆଣୁଛନ୍ତି। ଏ ପର୍ଯ୍ୟନ୍ତ କେହି ମରିଥିବା ରିପୋର୍ଟ ମିଳିନାହିଁ।

ପ୍ରବଳ ଧୂଆଁ ଯୋଗୁଁ ଭିତରେ ଥିବା ଛାତ୍ରଛାତ୍ରୀମାନେ ଛାନିଆରେ ଚିତ୍କାର କରିଥିଲେ। ଘଟଣାର ତଦନ୍ତ ଆରମ୍ଭ ହୋଇଥିବା କଥା ଦିଲ୍ଲୀ ପୁଲିସ କହିଛି।