ଇନ୍ଦୋର : ମଧ୍ୟପ୍ରଦେଶର ଇନ୍ଦୋରରେ ଏକ ରୋଚକ ଘଟଣା ସାମନାକୁ ଆସିଛି । ଜଣେ ବସ୍ ମାଲିକ ଗାଳି ଦେଇ ଚାକିରିରୁ ବାହାର କରିଦେବାରୁ ଜଣେ କଣ୍ଡକ୍ଟର ଏକ ଅଭିନବ ଉପାୟରେ ପ୍ରତିଶୋଧ ନେଇଛି । ତେବେ ଯେଉଁ ଉପାୟରେ କଣ୍ଡକ୍ଟର ପ୍ରତିଶୋଧ ନେଇଥିଲା ତାହା ସମଗ୍ର ଇନ୍ଦୋର ସହରରେ ଚର୍ଚ୍ଚାର ବିଷୟ ହୋଇଛି ।

Advertisment

ଘଟଣାଟି ଏହିପରି.. ଇନ୍ଦୋରରୁ ସତନା ଯାଉଥିବା ସୁଖିଜା ବସ ସର୍ଭିସର ମାଲିକ ହେଉଛନ୍ତି ସତୀଶ ସୁଖିଜା । କିଛି ଦିନ ତଳେ ସତୀଶ ବସର କଣ୍ଡକ୍ଟର ସଲମାନ ଖାଁଙ୍କୁ ଗାଳି ଦେଇ ଚାକିରିରୁ ବାହାର କରିଦେଇଥିଲେ । କିନ୍ତୁ ଚାକିରି ଛାଡ଼ିବା ପୂର୍ବରୁ ସଲମାନ ଏକ ଅଭିନବ ଉପାୟରେ ସତୀଶଙ୍କ ଉପରେ ପ୍ରତିଶୋଧ ନେଇଥିଲା । ସେ ବସର ଆଗରେ ଥିବା ଡିସପ୍ଲେ ବୋର୍ଡର ଲେଖାକୁ ବଦଳାଇ ଦେଇ ସେଥିରେ ସତୀଶଙ୍କ ନାଁରେ ଗାଳି ଦେଇ କେତେକ ଦ୍ବିଅର୍ଥବୋଧକ ଶବ୍ଦ ଲେଖିଦେଲା । ଏହା ସହିତ ଡିସପ୍ଲେ ବୋର୍ଡକୁ ଚଳାଉଥିବା ହାର୍ଡଡିସ୍କର ପାସଓ୍ବାର୍ଡକୁ ମଧ୍ୟ ବଦଳାଇଦେଲା ।

ବସରେ ଏପରି ଅରୁଚିକର ଲେଖା ପ୍ରଦର୍ଶିତ ହେଉଥିବା  ଦେଖି କେତେକ ସ୍ଥାନୀୟ ଲୋକ ତାହାର ଭିଡିଓ କରି ସୋସିଆଲ ମିଡିଆରେ ଛାଡ଼ିଦେଲେ । ସୋସିଆଲ ମିଡିଆରୁ ହିଁ ବସ ମାଲିକ ସତୀଶ ଏ ସଂପର୍କରେ ଜାଣିବାକୁ ପାଇଲେ । ସେ ତୁରନ୍ତ ଥାନାରେ ଏ ସଂପର୍କରେ ଏକ ମାମଲା ରୁଜ୍ଜୁ କଲେ ।

ତେବେ ବସର ଏପରି ଅରୁଚିକର ଲେଖାକୁ ବଦଳାଇବାକୁ ତାଙ୍କୁ ମୁମ୍ବାଇ ଯାଇ ପ୍ରାୟ ୫୦ ହଜାର ଟଙ୍କା ଖର୍ଚ୍ଚ କରିବାକୁ ପଡ଼ିବ ।