ଗାଜାରୁ ପ୍ରଥମ ଥର ଲାଗି ମୁକୁଳିଲେ ବିଦେଶୀ ନାଗରିକ: ରାଫା କ୍ରସିଂ ଦେଇ ଇଜିପ୍ଟ ଅଭିମୁଖେ ଯାତ୍ରା କଲେ ଶହ ଶହ ଯୁଦ୍ଧାକ୍ରାନ୍ତ

ରାଫା: ଅକ୍ଟୋବର ୭ ତାରିଖରୁ ଇସ୍ରାଏଲ-ହମାସ ଯୁଦ୍ଧ ଆରମ୍ଭ ହେବା ପରେ ଇଜିପ୍ଟ ପ୍ରଥମ ଥର ପାଇଁ ନିଜ ସୀମାର ରାଫା କ୍ରସିଂ ଖୋଲିବା ପରେ ବୁଧବାର ଶହ ଶହ ବିଦେଶୀ ପାସପୋର୍ଟଧାରୀ ଗାଜା ଛାଡ଼ିବା ଆରମ୍ଭ କରିଛନ୍ତି।
ଇଜିପ୍ଟ ସହ ଗାଜାର ଦକ୍ଷିଣ ସୀମାରେ ଥିବା ରାଫା ଦେଇ କେତେ ଲୋକ ଯିବାକୁ ସକ୍ଷମ ହୋଇଛନ୍ତି ତାହା ସ୍ପଷ୍ଟ ହୋଇନାହିଁ। କିନ୍ତୁ ଘଟଣାସ୍ଥଳର ଲାଇଭ୍‌ ଫୁଟେଜରେ ଟର୍ମିନାଲର ପାଲେଷ୍ଟାଇନ୍‌ ପାର୍ଶ୍ୱରେ ଲୋକଙ୍କ ଭିଡ଼ ଦେଖିବାକୁ ମିଳିଥିଲା।

ଇଜିପ୍ଟରୁ ୨୦୦ରୁ ଅଧିକ ଟ୍ରକ ଅତ୍ୟାବଶ୍ୟକ ସହାୟତା ସହ ଗାଜାକୁ ପ୍ରବେଶ କରିଥିଲେ ହେଁ କ୍ଷତିଗ୍ରସ୍ତ ଅଞ୍ଚଳରୁ କୌଣସି ଲୋକଙ୍କୁ ପଳାୟନ କରିବାକୁ ଅନୁମତି ଦିଆଯାଇ ନାହିଁ ଏବଂ ବୁଧବାର ପ୍ରାୟ ୪୦୦ ବିଦେଶୀ ଏବଂ ଦ୍ୱୈତ ନାଗରିକ ଏହି ରାସ୍ତା ଅତିକ୍ରମ କରିବେ ବୋଲି ଆଶା କରାଯାଉଛି।

ବିଦେଶୀ ସରକାରମାନେ କହିଛନ୍ତି ଯେ ଅକ୍ଟୋବର ୭ ହମାସ ଆକ୍ରମଣର ଜବାବରେ ୨.୪ ନିୟୁତ ଲୋକ ତିନି ସପ୍ତାହରୁ ଅଧିକ ସମୟ ଧରି ଇସ୍ରାଏଲର ବୋମାମାଡ଼ ସହିଥିବା ଗାଜା ଉପତ୍ୟକାରେ ୪୪ଟି ଦେଶର ପାସପୋର୍ଟଧାରୀ ଏବଂ ଜାତିସଂଘ ସଂସ୍ଥା ସମେତ ୨୮ଟି ଏଜେନ୍‌ସି ରହୁଛନ୍ତି।

ହମାସ ଦ୍ୱାରା ହୋଇଥିବା ଆକ୍ରମଣ ଇସ୍ରାଏଲ ଇତିହାସରେ ସବୁଠାରୁ ଭୟଙ୍କର ଆକ୍ରମଣ, ଯେଉଁଥିରେ ୧୪୦୦ ଲୋକ ପ୍ରାଣ ହରାଇଥିଲେ। ଏମାନଙ୍କ ମଧ୍ୟରେ ଅଧିକାଂଶ ସାଧାରଣ ନାଗରିକ ଥିଲେ। ଏହାର ପ୍ରତିକ୍ରିୟାରେ ପ୍ରାୟ ସମ୍ପୂର୍ଣ୍ଣ ଗାଜା ଅବରୋଧ ପରେ ଏହି କ୍ଷୁଦ୍ର ଉପକୂଳ ଅଞ୍ଚଳରେ ଖାଦ୍ୟ, ପାଣି ଏବଂ ବିଜୁଳିର ଭୟଙ୍କର ଅଭାବ ଦେଖା ଦେଇଥିଲା।

ହାମାସ ଦ୍ୱାରା ପରିଚାଳିତ ଗାଜାର ସ୍ୱାସ୍ଥ୍ୟ ମନ୍ତ୍ରାଳୟ ଅନୁଯାୟୀ, ବୋମାମାଡରେ ୮,୫୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି, ଯେଉଁଥିରେ ଦୁଇ ତୃତୀୟାଂଶ ମହିଳା ଏବଂ ଶିଶୁ ଅଛନ୍ତି। ଗାଜାର ସବୁଠାରୁ ବଡ଼ ଶରଣାର୍ଥୀ ଶିବିର ଉପରେ ମଙ୍ଗଳବାର ଇସ୍ରାଏଲର ଆକ୍ରମଣର କିଛି ଘଣ୍ଟା ପରେ ଏହି କ୍ରସିଂ ଖୋଲିବାକୁ ନିଷ୍ପତ୍ତି ନିଆଯାଇଛି। ଯେଉଁଥିରେ ଅତି କମରେ ୫୦ ଜଣ ଲୋକ ପ୍ରାଣ ହରାଇଛନ୍ତି ବୋଲି ସ୍ୱାସ୍ଥ୍ୟ ମନ୍ତ୍ରାଳୟ କହିଛି।