ପୁଡ଼ୁଚେରୀ: ପୂର୍ବତନ ମିସ୍ ପୁଡୁଚେରୀ ତଥା ଫ୍ୟାସନ୍ ଇଣ୍ଡଷ୍ଟ୍ରିରେ ଅନ୍ତର୍ଭୁକ୍ତୀକରଣର ପ୍ରବକ୍ତା ସାନ୍ ରେଚାଲ ଗାନ୍ଧୀଙ୍କର ଶନିବାର ଜବାହରଲାଲ ଇନଷ୍ଟିଚ୍ୟୁଟ୍ ଅଫ୍ ପୋଷ୍ଟଗ୍ରାଜୁଏଟ୍ ମେଡିକାଲ୍ ଏଜୁକେସନ୍ ଆଣ୍ଡ୍ ରିସର୍ଚ୍ଚ (ଜେଆଇପିଏମ୍‌ଇଆର୍‌)ରେ ପରଲୋକ ଘଟିଛି। ସୂଚନା ଅନୁଯାୟୀ, ଜୁଲାଇ ୫ ତାରିଖରେ ୨୬ ବର୍ଷୀୟା ରେଚାଲ ମାତ୍ରାଧିକ ନିଦ୍ରା ବଟିକା ଖାଇ ଆତ୍ମହତ୍ୟା ଉଦ୍ୟମ କରିଥିଲେ। ରେଚାଲ ଫ୍ୟାସନ ଇଣ୍ଡଷ୍ଟ୍ରିରେ ପ୍ରତିବନ୍ଧକ ଭାଙ୍ଗିବା ଓ ବିବିଧତାକୁ ପ୍ରୋତ୍ସାହିତ କରିବା ପାଇଁ ଜଣାଶୁଣା ଥିଲେ। କମ୍ ବୟସରେ ମା’ଙ୍କୁ ହରାଇଥିବା ରେଚାଲଙ୍କୁ ତାଙ୍କ ବାପା ଗାନ୍ଧୀ ବଡ଼ କରିଥିଲେ, ଯିଏ କି ତାଙ୍କ ମଡେଲିଂ କ୍ୟାରିୟର କରିବାର ସ୍ୱପ୍ନକୁ ସମର୍ଥନ କରିଥିଲେ। ନିଜର କଳା ଚେହେରାକୁ ନେଇ ଶିଳ୍ପର ପକ୍ଷପାତିତାକୁ ସମାଲୋଚନା କରି ରେଚାଲ ରଙ୍ଗଭେଦ ବିରୋଧରେ ଏକ ଦୃଢ଼ ସ୍ୱର ଭାବରେ ଉଭା ହୋଇଥିଲେ ଏବଂ ‘ଗୋରା ଚର୍ମ’ ମାନଦଣ୍ଡର ପ୍ରାଧାନ୍ୟକୁ ଚ୍ୟାଲେଞ୍ଜ କରି ସ୍ୱୀକୃତି ଅର୍ଜନ କରିଥିଲେ। ସେ ୨୦୧୯ରେ ମିସ୍ ଡାର୍କ କୁଇନ୍ ତାମିଲନାଡୁ ଟାଇଟଲ ଜିତି ନିଜର ପରିଚୟ ସୃଷ୍ଟି କରିଥିଲେ ଏବଂ ପରେ ୨୦୨୧ରେ ମିସ୍ ପୁଡୁଚେରୀ ଜିତିଥିଲେ। ଲଣ୍ଡନ, ଜର୍ମାନୀ ଓ ଫ୍ରାନ୍ସରେ ଆନ୍ତର୍ଜାତିକ ମଡେଲିଂ ପ୍ରତିଯୋଗିତାରେ ମଧ୍ୟ ରେଚାଲ ଭାରତର ପ୍ରତିନିଧିତ୍ୱ କରିଥିଲେ ଏବଂ ମହିଳାଙ୍କ ସୁରକ୍ଷା ପ୍ରସଙ୍ଗରେ ସଚେତନତା ସୃଷ୍ଟି କରିବା ପାଇଁ ସକ୍ରିୟ ଭାବରେ କାର୍ଯ୍ୟ କରିଥିଲେ। ପୁଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ନିକଟରେ ବିବାହ କରିଥିବା ରେଚାଲ ଡିପ୍ରେସନରେ ଥିଲେ। ଜୁଲାଇ ୫ ତାରିଖରେ ସେ ଅତ୍ୟଧିକ ନିଦ୍ରା ବଟିକା ଖାଇଥିଲେ। ତାଙ୍କ ବାପା ତାଙ୍କୁ ପ୍ରଥମେ ପୁଡୁଚେରୀ ସରକାରୀ ଡାକ୍ତରଖାନାକୁ ନେଇଥିଲେ। ପରେ ତାଙ୍କୁ ଏକ ଘରୋଇ ହସ୍ପିଟାଲ ଓ ପରେ ଜେଆଇପିଏମ୍‌ଇଆର୍‌କୁ ସ୍ଥାନାନ୍ତର କରାଯାଇଥିଲା, ଯେଉଁଠାରେ ତାଙ୍କର ମୃତ୍ୟୁ ହୋଇଛି। ଉରୁଲାଇଆଁପେଟ୍ଟାଇ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।