ଅମୃତସରରୁ ଲଢିବା ପ୍ରସ୍ତାବ ଆସିବା ପରେ ନିର୍ବାଚନ ଲଢ଼ିବାକୁ ଅନିଚ୍ଛା ପ୍ରକାଶ କଲେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ
ନୂଆପଲ୍ଲୀ : ବିଶିଷ୍ଟ ଅର୍ଥନୀତିଜ୍ଞ ତଥା ଦୁଇ ଦୁଇଥର ଭାରତର ପ୍ରଧାନମନ୍ତ୍ରୀ ହୋଇଥିବା ଡ.ମନମୋହନ ସିଂହ ଏଥର ନିର୍ବାଚନ ଲଢିବେ ନା ନାହିଁ ଏହାକୁ ନେଇ ଏବେ ରାଜନୈତିକ ମହଲରେ ଆରମ୍ଭ ହୋଇଯାଇଛି ଚର୍ଚ୍ଚା । କୁହାଯାଉଛି, ପଞ୍ଜାବର ସବୁଠାରୁ ଚର୍ଚ୍ଚିତ ଓ ହାଇପ୍ରୋଫାଇଲ ଲୋକସଭା ନିର୍ବାଚନମଣ୍ଡଳୀ ଅମୃତସରରୁ ନିର୍ବାଚନ ଲଢିବା ଲାଗି ମନମୋହନଙ୍କ ଉପରେ ଚାପ ପକାଉଛନ୍ତି କଂଗ୍ରେସ ନେତୃତ୍ୱ । ୯୦ ଦଶକରେ ଦେଶରେ ଅର୍ଥନୀତିର ଉଦାରୀକରଣ କରି ଚର୍ଚ୍ଚାକୁ ଆସିଥିଲେ ଡ.ସିଂହ।
Sambad is now on WhatsApp
Join and get latest news updates delivered to you via WhatsApp
କିନ୍ତୁ ଖବର ଅନୁସାରେ, ଏଥର ଲୋକସଭା ନିର୍ବାଚନ ଲଢିବାକୁ ମନମୋହନ ସିଂହ ଅନିଚ୍ଛୁକ ଥିବା ଜଣାଯାଇଛି । ସ୍ୱାସ୍ଥ୍ୟଗତ କାରଣ ଓ ଅଧିକ ବୟସାଧିକ୍ୟ ଯୋଗୁଁ ସେ ନିର୍ବାଚନ ଲଢିପାରିବେ ନାହିଁ ବୋଲି ଦଳର ହାଇକମାଣ୍ଡକୁ ଜଣାଦେଇଛନ୍ତି । କିନ୍ତୁ ହାଇପ୍ରୋଫାଇଲ ଅମୃତସର ନିର୍ବାଚନମଣ୍ଡଳୀରୁ ଲଢିବା ଲାଗି ମନମୋହନଙ୍କ ଉପରେ ଚାପ ପକାଉଛନ୍ତି ହାଇକମାଣ୍ଡ ।
ପୂର୍ବତନ ପ୍ରଧାନମନ୍ତ୍ରୀଙ୍କୁ ମନାଇବା ପାଇଁ ମାରାଥନ ବୈଠକ ବି ଚାଲିଛି । କାଲି ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂହ ଏ ନେଇ ବରିଷ୍ଠ ନେତାଙ୍କ ସହ ଆଲୋଚନା ବି କରିଛନ୍ତି । ମନମୋହନ ସିଂ ବର୍ତମାନ ରାଜ୍ୟସଭା ସାଂସଦ ଅଛନ୍ତି । ଜୁନରେ ତାଙ୍କ କାର୍ଯ୍ୟକାଳ ବି ସରୁଛି । ଏଭଳି ସ୍ଥିତିରେ ଦଳୀୟ ନେତୃତ୍ୱ ବି ଚାହୁଁଛନ୍ତି ଅମୃତସର ଭଳି ଆସନରୁ ମନମୋହନ ସିଂ ଲଢିବାକୁ ।