ନୂଆଦିଲ୍ଲୀ : ଭାରତ ସହ ଫ୍ରାନ୍ସର ସାମରିକ ସହଯୋଗୀତା ବେଶ ସୁଦ୍ଢ ବୋଲି କହିଛନ୍ତି ଫ୍ରାନ୍ସର ୟୁରୋପ ଓ ବିଦେଶ ବ୍ୟାପାର ମନ୍ତ୍ରୀ ମିଷ୍ଟର ଜାଁ ଭେସ ଲି ଦ୍ରିଆନ । ମୋଦିଙ୍କ ସାକ୍ଷାତ କରିବା ପରେ ସେ କହିଛନ୍ତି ଯେ ଆତଙ୍କବାଦ ପ୍ରସଙ୍ଗରେ ମଧ୍ୟ ଦୁଇଦେଶ ଏକତ୍ର କାମ କରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହି ସାକ୍ଷାତ ବେଳେ ପ୍ରଧାନମନ୍ତ୍ରୀ ଶ୍ରୀ ମୋଦୀ ସମ୍ପ୍ରତି ଫ୍ରାନ୍ସର ଷ୍ଟ୍ରାସବର୍ଗଠାରେ ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ବ୍ୟକ୍ତିବିଶେଷଙ୍କ ପ୍ରତି ଗଭୀର ସମବେଦନା ଜଣାଇଥିଲେ । ଆତଙ୍କବାଦ ବିରୋଧରେ ସଂଗ୍ରାମରେ ଭାରତ ସଦାବେଳେ ଫ୍ରାନ୍ସ ସହ ରହିଛି ବୋଲି ପ୍ରଧାନମନ୍ତ୍ରୀ ଫରାସୀ ମନ୍ତ୍ରୀଙ୍କୁ ଅବଗତ କରାଇଥିଲେ । ରାଷ୍ଟ୍ରପତି ମାକରୋଂଙ୍କ ଭାରତ ଗସ୍ତବେଳେ ତାଙ୍କ ସହ ହୋଇଥିବା ଘନିଷ୍ଠ ସାକ୍ଷାତ ଆଲୋଚନା ପ୍ରସଙ୍ଗ ପ୍ରଧାନମନ୍ତ୍ରୀ ଶ୍ରୀ ମୋଦୀ ଉଲ୍ଲେଖ କରିଥିଲେ । ମାର୍ଚ୍ଚ ୨୦୧୮ ରେ ରାଷ୍ଟ୍ରପତି ମାକରୋଂ ଭାରତ ଗସ୍ତରେ ଆସିଥିଲେ । ସେହିଭଳି ଆର୍ଜେଣ୍ଟିନାଠାରେ ସଦ୍ୟ ଅନୁଷ୍ଠିତ ଜି-୨୦ ଶିଖର ସମ୍ମିଳନୀ ଅବସରରେ ଉଭୟ ନେତାଙ୍କ ମଧରେ ହୋଇଥିବା ସାକ୍ଷାତ ଆଲୋଚନା ବିଷୟ ପ୍ରଧାନମନ୍ତ୍ରୀ ଅବତାରଣା କରିଥିଲେ ।
ମିଷ୍ଟର ଲି ଦ୍ରିଆନ ପ୍ରଧାନମନ୍ତ୍ରୀଙ୍କୁ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସଂପର୍କରେ ନିକଟରେ ହୋଇଥିବା ଉନ୍ନତି ସଂପର୍କରେ ଅବଗତ କରାଇଥିଲେ । ସେହିଭଳି ଅନ୍ୟାନ୍ୟ କ୍ଷେତ୍ରୀୟ ଓ ବୈଶ୍ୱିକ ପ୍ରସଙ୍ଗ ନେଇ ସେ ଶ୍ରୀ ମୋଦୀଙ୍କ ଦୃଷ୍ଟି ଆକର୍ଷଣ କରିଥିଲେ । ସବୁ ସ୍ତରରେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସଂପର୍କରେ ଘଟିଥିବା ଉନ୍ନତିକୁ ପ୍ରଧାନମନ୍ତ୍ରୀ ପ୍ରଶଂସା ଓ ସ୍ୱାଗତ କରିଥିଲେ । ଭାରତ ଓ ଫ୍ରାନ୍ସ ମଧ୍ୟରେ ପ୍ରତିରକ୍ଷା, ମହାକାଶ, ଆତଙ୍କବାଦ ନିରୋଧ, ସାମୁଦ୍ରିକ ନିରାପତ୍ତା, ବେସାମରିକ ଆଣବିକ ସହଯୋଗ କ୍ଷେତ୍ରରେ ଘନିଷ୍ଠ ସଂପର୍କ ବୃଦ୍ଧି ପାଇଛି ।