ଆଜି ସକାଳ ୮.୩୦ରେ ଗଗନଯାନ ଅଭିଯାନର ‘ଟେଷ୍ଟ୍‌ ଭେଇକ୍ଲ୍‌’ ‘ଟିଭି-ଡି୧’ ପରୀକ୍ଷଣ କରିବ ‘ଇସ୍ରୋ’

ତିରୁପତି: ଆନ୍ଧ୍ରପ୍ରଦେଶ ଅନ୍ତର୍ଗତ ତିରୁପତି ଜିଲ୍ଲାରେ ଥିବା ଶ୍ରୀହରୀକୋଟାସ୍ଥିତ ସତୀଶ ଧୱନ୍‌ ମହାକାଶ କେନ୍ଦ୍ରରୁ ଆଜି ସକାଳ ୮.୩୦ରେ ‘ଭାରତୀୟ ମହାକାଶ ଗବେଷଣା ସଂସ୍ଥାନ’ ବା ‘ଇସ୍ରୋ’ ତା’ର ଆକାଙ୍‌କ୍ଷିତ ମାନବବାହୀ ମହାକାଶଯାନ ଯୋଜନା ‘ଗଗନଯାନ’ ଲାଗି ଉଦ୍ଦିଷ୍ଟ ତରଳ ଇନ୍ଧନ ଚାଳିତ ରକେଟ୍‌ ‘ଟେଷ୍ଟ୍‌ ଭେଇକ୍ଲ୍‌’ର (ଟିଭି-ଡି୧) ପରୀକ୍ଷଣ କରିବ ବୋଲି ‘ଟାଇମ୍‌ସ୍‌ ଅଫ୍‌ ଇଣ୍ଡିଆ’ ରିପୋର୍ଟ କରିଛି।

ଆଜି ସକାଳ ୮ ବେଳେ ଏହାର ପରୀକ୍ଷଣ କରାଯିବ ବୋଲି ପୂର୍ବରୁ ‘ଇସ୍ରୋ’ ଘୋଷଣା କରିଥିଲା।

‘ଟିଭି-ଡି୧’ର ପରୀକ୍ଷାମୂଳକ ଉଡ଼ାଣ ହେଉଛି ‘ଗଗନଯାନ ଅଭିଯାନ’ର ଗୁରୁତ୍ବପୂର୍ଣ୍ଣ ଅଂଶବିଶେଷ। ମହାକାଶରେ ୪୦୦ କିଲୋମିଟର୍‌ବିଶିଷ୍ଟ କକ୍ଷପଥରେ ୩ ଦିନ ଲାଗି ପରିକ୍ରମା କରିବା ଲାଗି ୩ଜଣ ମଣିଷଙ୍କୁ ନେଇପାରିବା ଭଳି ମହାକାଶଯାନ ପ୍ରେରଣ କରିବାରେ ଏହି ପରୀକ୍ଷଣ ଭାରତର ସାମର୍ଥ୍ୟ ପ୍ରତିପାଦନ କରିବ। କେବଳ ସେତିକି ନୁହେଁ ପରିକ୍ରମା ପରେ ଉକ୍ତ ମହାକାଶଯାନ ଯେମିତି ନିରାପଦରେ ଭାରତ ମହାସାଗର ଜଳରାଶିରେ ଅବତରଣ କରିବ, ତାହା ଉପରେ ମଧ୍ୟ ଏହି ଅଭିଯାନର ସଫଳତା ନିର୍ଭର କରୁଛି।

Image Courtesy of Zee News

ଆଜିର ଏହି ବ୍ୟବହାରିକ ପରୀକ୍ଷଣରେ ପ୍ରାରମ୍ଭିକ ‘ଗଗନଯାନ କ୍ରୁ’ ମଡେଲ୍‌’ ଉଡ଼ାଣ କରୁଥିବା ବେଳେ ରକେଟ୍‌ରୁ ପୃଥକ୍‌ ହେବାରେ ସଫଳ ହେଉଛି ତାହା ଲକ୍ଷ୍ୟ କରାଯିବ।

‘ଟିଭି-ଡି୧’ ରକେଟ୍‌ରେ ଆଂଶିକ ପରିବର୍ତ୍ତିତ ‘ବିକାଶ’ ଇଞ୍ଜିନ୍‌ ଲାଗିଛି। ଏହାର ସମ୍ମୁଖରେ ଖଞ୍ଜାଯାଇଛି ‘କ୍ରୁ ମୋଡ୍ୟୁଲ୍‌’ ଓ ‘କ୍ରୁ ଏସ୍‌କେପ୍‌ ସିଷ୍ଟମ୍‌’। ୩୪.୯ ମିଟର୍‌ବିଶିଷ୍ଟ ଏହି ରକେଟ୍‌ ୪୪ ଟନ୍‌ ଓଜନ ଉଠାଇବାକୁ ସମର୍ଥ।