ନୂଆଦିଲ୍ଲୀ: ପଶ୍ଚିମବଙ୍ଗର ପୂର୍ବତନ ରାଜ୍ୟପାଳ ଗୋପାଳକୃଷ୍ଣ ଗାନ୍ଧୀ ସୋମବାର ଆଗାମୀ ରାଷ୍ଟ୍ରପତି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ବିରୋଧୀ ନେତାଙ୍କ ଅନୁରୋଧକୁ ପ୍ରତ୍ୟାଖ୍ୟାନ କରି ଦେଇଛନ୍ତି। ଶ୍ରୀ ଗାନ୍ଧୀ କହିଛନ୍ତି ଯେ ରାଷ୍ଟ୍ରପତି ନିର୍ବାଚନ ପାଇଁ ପ୍ରାର୍ଥୀ ଏପରି ଜଣେ ବ୍ୟକ୍ତି ହେବା ଉଚିତ ଯିଏ ଜାତୀୟ ସହମତି ସୃଷ୍ଟି କରିପାରିବେ ଏବଂ ବିରୋଧୀ ଏକତା ସୁନିଶ୍ଚିତ କରିବେ। ବର୍ତ୍ତମାନ ମିଳିତ ବିରୋଧୀ ଦଳ କାହାକୁ ପ୍ରାର୍ଥୀ କରିବେ ସେ ନେଇ ଚର୍ଚ୍ଚା ଆରମ୍ଭ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଏକ ବିବୃତିରେ ଗାନ୍ଧୀ କହିଛନ୍ତି ଯେ ବିରୋଧୀ ଦଳର ଅନେକ ସମ୍ମାନିତ ନେତା ରାଷ୍ଟ୍ରପତି ପଦ ପାଇଁ ଆଗାମୀ ନିର୍ବାଚନରେ ବିରୋଧୀଙ୍କ ପ୍ରାର୍ଥୀ ହେବା ଲାଗି ଅନୁରୋଧ କରିବା ତାଙ୍କୁ ସମ୍ମାନିତ ଓ ଗୌରବାନ୍ଵିତ କରିଛି। ‘ମୁଁ ସେମାନଙ୍କ ପ୍ରତି କୃତଜ୍ଞ। କିନ୍ତୁ ଏହି ପ୍ରସଙ୍ଗକୁ ଗଭୀର ଭାବରେ ବିଚାର କରି ମୁଁ ଦେଖୁଛି ଯେ ବିରୋଧୀ ଦଳର ପ୍ରାର୍ଥୀ ଏପରି ଜଣେ ବ୍ୟକ୍ତି ହେବା ଉଚିତ ଯିଏ ବିରୋଧୀ ଏକତା ବ୍ୟତୀତ ଏକ ଜାତୀୟ ସହମତି ଏବଂ ଜାତୀୟ ବାତାବରଣ ସୃଷ୍ଟି କରିବେ। ମୁଁ ଅନୁଭବ କରୁଛି ଯେ ଏପରି ଅନେକ ବ୍ୟକ୍ତି ଅଛନ୍ତି ଯେଉଁମାନେ ମୋ ଅପେକ୍ଷା ଏହା ବହୁତ ଭଲ କରିବେ। ତେଣୁ ମୁଁ ବିରୋଧୀଦଳର ନେତାମାନଙ୍କୁ ଅନୁରୋଧ କରିଛି ଯେ ଏପରି ବ୍ୟକ୍ତିଙ୍କୁ ସୁଯୋଗ ଦିଅନ୍ତୁ ଏବଂ ଡକ୍ଟର ରାଜେନ୍ଦ୍ର ପ୍ରସାଦ ଆମର ପ୍ରଥମ ରାଷ୍ଟ୍ରପତି ଭାବରେ ଉଦଘାଟନ କରିଥିବା କାର୍ଯ୍ୟାଳୟ ପାଇଁ ଜଣେ ଯୋଗ୍ୟ ରାଷ୍ଟ୍ରପତି ପାଆନ୍ତୁ । ୭୭ ବର୍ଷୀୟ ଗୋପାଳକୃଷ୍ଣ ଗାନ୍ଧୀ ଦକ୍ଷିଣ ଆଫ୍ରିକା ଏବଂ ଶ୍ରୀଲଙ୍କାରେ ଭାରତର ଉଚ୍ଚାୟୁକ୍ତ ଭାବରେ କାର୍ଯ୍ୟ କରିଥିଲେ। ସେ ମହାତ୍ମା ଗାନ୍ଧୀ ଏବଂ ସି. ରାଜଗୋପାଳଚାରୀଙ୍କ ନାତି।
ତେବେ, ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହେଲା ରାଷ୍ଟ୍ରପତି ନିର୍ବାଚନରେ ସହମତି ଭିତ୍ତିରେ ମିଳିତ ପ୍ରାର୍ଥୀ ଦେଇ ରାଇସିନା ଦଖଲ ପାଇଁ ମମତା ବାନାର୍ଜୀଙ୍କ ନେତୃତ୍ୱରେ ବିରୋଧୀ ଦଳଙ୍କ ପକ୍ଷରୁ ଯେଉଁ ଉଦ୍ୟମ ଆରମ୍ଭ ହୋଇଥିଲା ତାହା ଏକପ୍ରକାର ଫସର ଫାଟି ଯାଇଛି। ମିଳିତ ବିରୋଧୀ ଦଳର ସହମତି ଭିତ୍ତିରେ ପ୍ରଥମ ପ୍ରାର୍ଥୀ ଥିଲେ ଶରଦ ପାଓ୍ଵାର। ହେଲେ ପାଓ୍ଵାର ପ୍ରାର୍ଥୀ ହେବାକୁ ମନା କରିବା ପରେ ଦ୍ୱିତୀୟ ପ୍ରାର୍ଥୀ ଥିଲେ ଫାରୁକ୍ ଅବଦୁଲ୍ଲା। କିନ୍ତୁ, ଫାରୁକ୍ ଅବଦୁଲ୍ଲା ବି ରାଷ୍ଟ୍ରପତି ପ୍ରାର୍ଥୀ ହେବାକୁ ମନା କରିବା ପରେ ସମସ୍ତଙ୍କ ନିଜର ଥିଲା ଗୋପାଳକୃଷ୍ଣ ଗାନ୍ଧୀଙ୍କ ଉପରେ। ଏବେ ଗୋପାଳକୃଷ୍ଣ ଗାନ୍ଧୀ ବି ମିଳିତ ବିରୋଧୀ ଦଳର ରାଷ୍ଟ୍ରପତି ପ୍ରାର୍ଥୀ ହେବାକୁ ମନା କରି ଦେଇଛନ୍ତି।