ଦିଲ୍ଲୀ: କେବେ ଶୁଣିଛନ୍ତି କି ବିନା ଦରମାରେ ୩୨ ବର୍ଷ ଧରି କେହି କାମ କରୁଛନ୍ତି | ନା ଖରା ନା ବର୍ଷା ଟ୍ରାଫିକ ଲାଇଟ ସାମ୍ନାରେ ଏହି ବ୍ୟକ୍ତି ଜଣକ ଛିଡା ହୋଇ ବ୍ୟବସ୍ଥିତ ଢଙ୍ଗରେ ଗାଡ଼ିଗୁଡ଼ିକୁ ଛାଡ଼ନ୍ତି ଓ ଟ୍ରାଫିକ ନିୟନ୍ତ୍ରଣ କରନ୍ତି | ଦିଲ୍ଲୀ ସିଲମପୁର ଟ୍ରାଫିକ ଛକରେ ପ୍ରତିଦିନ ଛିଡା ହୋଇ ଟ୍ରାଫିକ ନିୟନ୍ତ୍ରଣ କରୁଥିବା ଏହି ବ୍ୟକ୍ତିଙ୍କ ନାମ ହେଉଛି ଗଙ୍ଗାରାମ, ବୟସ ପ୍ରାୟ ୭୨ ହେବ | ଟ୍ରାଫିକ ପୁଲିସଙ୍କ ଭଳି କପଡା ପିନ୍ଧୁଥିବା ଗଙ୍ଗାରାମଙ୍କୁ ଯିଏ ବି ଦେଖନ୍ତି ପ୍ରଥମେ ଟ୍ରାଫିକ କର୍ମଚାରୀ ବୋଲି ଭାବନ୍ତି |
Sambad is now on WhatsApp
Join and get latest news updates delivered to you via WhatsApp
କାହିଁକି ବିନା ଦରମାରେ ଟ୍ରାଫିକ ନିୟନ୍ତ୍ରଣ କରନ୍ତି ଏହି ବ୍ୟକ୍ତି
ପ୍ରତିଦିନ ସକାଳ ୯ଟାରୁ ରାତି ୧୦ଟା ଯାଏଁ ଛକ ଉପରେ ସେ ଛିଡା ହୁଅନ୍ତି | ପୂର୍ବରୁ ସେ ଟିଭି ମେକାନିକ ଭାବେ କାମ କରୁଥିବାବେଳେ ୩୨ ବର୍ଷ ତଳେ ତାଙ୍କର ଏକମାତ୍ର ପୁଅ ଏହି ଛକରେ ସଡକ ଦୁର୍ଘଟଣାରେ ପ୍ରାଣ ହରାଇଥିଲେ | ଏହା ପରେ ପୁଅକୁ ଝୁରି ଝୁରି ପତ୍ନୀଙ୍କର ବି ଜୀବନ ଚାଲିଯାଇଥିଲା | ଜୀବନର ଦୋଛକିରେ ଏ ସବୁ ସମସ୍ୟା ସାମ୍ନା କରିବା ପରେ ଗଙ୍ଗାରାମ ନିଷ୍ପତ୍ତି ନେଇଥିଲେ ଯେ ଗହଳି ରାସ୍ତାରେ ଛିଡା ହୋଇ ଟ୍ରାଫିକ ନିୟନ୍ତ୍ରଣ କରିବେ | ତାଙ୍କ ପୁଅ ଭଳି ଆଉ କାହାର ପୁଅ ଯେମିତି ରାସ୍ତା ଦୁର୍ଘଟଣାରେ ମୃତ୍ୟୁ ମୁଖରେ ନ ପଡନ୍ତୁ ସେଥିପାଇଁ ଟ୍ରାଫିକ ନିୟନ୍ତ୍ରଣରେ ଲାଗିପଡିଛନ୍ତି | ଛକରେ ଟ୍ରାଫିକ ଲାଇଟ ନାଲି ହେବା ମାତ୍ରେ ଯେଭଳି ସମସ୍ତେ ଅଟକିବେ ସେଥିପ୍ରତି ଗଙ୍ଗାରାମ ଦୃଷ୍ଟି ଦେଇଥାନ୍ତି |