ନୂଆଦିଲ୍ଲୀ: ଆମେରିକା ପୁଲିସ କଷ୍ଟଡିରେ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇର ଭାଇ ଅନମୋଲ ବିଷ୍ଣୋଇ | ମାସେ ତଳେ ଅନମୋଲ ବିରୋଧରେ ଜାମିନ ବିହୀନ ପରୱାନା ଜାରି କରାଯାଇଥିଲା | ତେବେ ଏପର୍ଯ୍ୟନ୍ତ ମୁମ୍ବାଇ ପୁଲିସ କିମ୍ବା ଦିଲ୍ଲୀ ପୁଲିସ ଆନୁଷ୍ଠାନିକ ଭାବେ କୌଣସି ଘୋଷଣା କରିନାହାନ୍ତି | କୁହାଯାଉଛି ଯେ, ମୁମ୍ବାଇ ପୁଲିସର କ୍ରାଇମ ବ୍ରାଞ୍ଚ ଟିମ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇର ଭାଇ ଅନମୋଲକୁ ଆମେରିକାରୁ ଭାରତକୁ ଆଣିବା ପାଇଁ ପ୍ରକ୍ରିୟା ଆରମ୍ଭ କରିଛି। 
 
ଏନସିପି ନେତା ବାବା ସିଦ୍ଦିକିଙ୍କ ହତ୍ୟା ଓ ବଲିଉଡ ଅଭିନେତା ସଲମାନ ଖାନଙ୍କୁ ହତ୍ୟା ଧମକ ଦେବା ପାଇଁ ମୁମ୍ବାଇ ପୁଲିସର ୱାଣ୍ଟେଡ ଲିଷ୍ଟରେ ଥିଲା ଅନମୋଲ | ଦୁଇ ସପ୍ତାହ ପୂର୍ବେ ମହାରାଷ୍ଟ୍ରର ସ୍ୱତନ୍ତ୍ର କୋର୍ଟ ଅନମୋଲ ବିଷ୍ଣୋଇକୁ ଗିରଫ କରିବା ପାଇଁ ଜାମିନ ବିହୀନ ପରୱାନା ଜାରି କରିଥିଲେ। ଏହା ପରେ ଆମେରିକା କହିଥିଲା ​​ଯେ, ଅନମୋଲ ଆମେରିକାରେ ଲୁଚି ରହିଛି। ଅନମୋଲକୁ ମୁମ୍ବାଇ ପୁଲିସ ଗିରଫ କରିବା ପାଇଁ ଅନେକ ଯୋଜନା କରିଥିବା ବେଳେ ଏବେ ଆମେରିକାରେ ତାକୁ କଷ୍ଟଡିକୁ ନିଆଯାଇଥିବା ନେଇ ସୂଚନା ମିଳିଛି |