ରାସନ କାର୍ଡଧାରୀଙ୍କୁ ୪୫୦ ଟଙ୍କାରେ ଗ୍ୟାସ ସିଲିଣ୍ଡର: ଏହି ରାଜ୍ୟ ସରକାର କଲେ ବଡ଼ ଘୋଷଣା, ଜାନୁୟାରୀ ୧ରୁ ଲାଗୁ

ଜୟପୁର: ରାଜସ୍ଥାନର ବିଜେପି ସରକାର ନିର୍ବାଚନ ପ୍ରତିଶ୍ରୁତି ପୂରଣ ଦିଗରେ ଏକ ବଡ଼ ଘୋଷଣା କରିଛନ୍ତି। ବାସ୍ତବରେ, ନିର୍ବାଚନ ସମୟରେ ଗରିବ ଲୋକଙ୍କୁ ୪୫୦ ଟଙ୍କା ମୂଲ୍ୟର ଏଲପିଜି ଗ୍ୟାସ ସିଲିଣ୍ଡର ଯୋଗାଇଦେବାକୁ ବିଜେପି ପ୍ରତିଶ୍ରୁତି ଦେଇଥିଲା। ଏବେ ସରକାର ଏଲପିଜି ସିଲିଣ୍ଡର ଗ୍ୟାରେଣ୍ଟି ଲାଗୁ କରିବାକୁ ନିଷ୍ପତ୍ତି ନେଇଛନ୍ତି। ରାଜସ୍ଥାନ ମୁଖ୍ୟମନ୍ତ୍ରୀ ଭଜନ ଲାଲ ଶର୍ମା ବିଧାନସଭାରେ କହିଛନ୍ତି ଯେ ଶୀଘ୍ର ଏଲପିଜି ସିଲିଣ୍ଡର ଗରିବ ପରିବାରକୁ ୪୫୦ ଟଙ୍କା ମୂଲ୍ୟରେ ଉପଲବ୍ଧ ହେବ। ଜାନୁଆରୀ ୧ ରୁ ଏହି ମୂଲ୍ୟ ଲାଗୁ ହେବ ବୋଲି କୁହାଯାଇଛି ।

ବିଧାନସଭାରେ 'ରାଜସ୍ଥାନ ଆପ୍ରୋପ୍ରାଇଜେସନ୍ ବିଲ୍ ଏବଂ ଫାଇନାନ୍ସ ବିଲ୍ ୨୦୨୪-୨୫' ଉପରେ ଆଲୋଚନା କରାଯାଇଥିଲା। ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ୪୫୦ ଟଙ୍କାରେ ଏଲପିଜି ଗ୍ୟାସ ସିଲିଣ୍ଡର ପାଉଥିବା ଲୋକଙ୍କ ପରିସର ବିସ୍ତାର କରାଯାଉଛି। ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ଏହି ଯୋଜନାର ଲାଭ ସେହି ପରିବାରମାନଙ୍କ ପାଇଁ ଉପଲବ୍ଧ ହେବ ଯେଉଁମାନଙ୍କର ରାସନ କାର୍ଡ ଅଛି।

ବାର୍ଷିକ ରାଜ୍ୟ ବଜେଟ୍ କିଛି ଦିନ ପୂର୍ବରୁ ରାଜସ୍ଥାନ ବିଧାନସଭାରେ ପାରିତ ହୋଇଛି। ଗତ ବଜେଟରେ ସରକାର ୫୦୦ ଇଲେକ୍ଟ୍ରିକ୍ ବସ୍ କିଣିବାକୁ ଘୋଷଣା କରିଥିଲେ। ପ୍ରକାଶ ଥାଉକି, ନିକଟରେ ମୁଖ୍ୟମନ୍ତ୍ରୀ ବିଧାନସଭାରେ ଘୋଷଣା କରିଥିଲେ ଯେ ଏହା ସହିତ ସେ ୫୦୦ ଅତିରିକ୍ତ ଇଲେକ୍ଟ୍ରିକ୍ ବସ୍ ମଧ୍ୟ କିଣିବେ। ଦଶ ହଜାରରୁ ଅଧିକ ଜନସଂଖ୍ୟା ବିଶିଷ୍ଟ ଗ୍ରାମରେ ଅଟଳ ପ୍ରଗତି ପଥ ନିର୍ମାଣ କରାଯିବ ବୋଲି ସେ କହିଛନ୍ତି।

ବିଧାନସଭାରେ ମୁଖ୍ୟମନ୍ତ୍ରୀ କହିଛନ୍ତି ବିକାନେର ଏବଂ ଭରତପୁର ୟୁଆଇଟିକୁ ବିକାଶ ପ୍ରାଧିକରଣ କରାଯିବ। ଜୟପୁରର ଦ୍ରବ୍ୟବତୀ ନଦୀର ସୌନ୍ଦର୍ଯ୍ୟକରଣ ପାଇଁ ଏକ ନୂତନ ଯୋଜନା ଘୋଷଣା କରାଯାଇଛି। କର୍ମଚାରୀଙ୍କ ଦରମା ବ୍ୟବଧାନ ହଟାଇବା ପାଇଁ ଗଠିତ କମିଟିଗୁଡିକର ସୁପାରିଶ ସେପ୍ଟେମ୍ବର ୨ ତାରିଖରୁ କାର୍ଯ୍ୟକାରୀ ହେବ ବୋଲି ସ୍ପଷ୍ଟ କରାଯାଇଛି। ଚାକିରି ଉପରେ ମୁଖ୍ୟମନ୍ତ୍ରୀ କହିଥିଲେ , ନୂତନ ନିୟମ ଅନୁଯାୟୀ, ଯେଉଁମାନେ ୪୦ପ୍ରତିଶତ ମାର୍କ ପାଇଛନ୍ତି ସେମାନେ ସରକାରୀ ଚାକିରି ପାଇଁ ସାଧାରଣ ପ୍ରବେଶିକା ପରୀକ୍ଷା ଦେଇପାରିବେ। ଖୁବ୍ ଶୀଘ୍ର ରାଜ୍ୟରେ ଚତୁର୍ଥ ଶ୍ରେଣୀ କର୍ମଚାରୀ ନିଯୁକ୍ତି ପାଇବେ। ଦୀର୍ଘ ଦିନ ଧରି ନିଯୁକ୍ତି ପ୍ରକ୍ରିୟାକୁ ନୂତନ ନିୟମ ସହିତ ନୂତନ ସରକାର ପୁନଃ ଆରମ୍ଭ କରିବେ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଛନ୍ତି।

ଏହା ବ୍ୟତୀତ ସ୍ଥାୟୀ ଘର ନିର୍ମାଣ ପାଇଁ ବସ୍ତିରେ ରହୁଥିବା ଗରିବ ଲୋକଙ୍କୁ ଆଶ୍ରମ ଯୋଜନା ଅଧୀନରେ ସରକାର ୧ ଲକ୍ଷ ଟଙ୍କା ସହାୟତା ପ୍ରଦାନ କରିବେ। ବିଧାନସଭାରେ ସିଏମ ଭଜନ ଲାଲ କହିଛନ୍ତି ଏହି ଯୋଜନା ପାଇଁ ସରକାର ୫୦ କୋଟି ଟଙ୍କା ଖର୍ଚ୍ଚ କରିବେ। ରାଜସ୍ଥାନ ସରକାର ଚିକିତ୍ସା କ୍ଷେତ୍ର ଉପରେ ଧ୍ୟାନ ଦେଉଛନ୍ତି। ଏମ୍ସ ଭଳି ରାଜସ୍ଥାନ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (ଆରଆଇଏମଏସ) ପ୍ରତିଷ୍ଠା ହେବ। ଏଥିପାଇଁ ସରକାର ବଜେଟରେ ୭୫୦ କୋଟି ଟଙ୍କା ଆବଣ୍ଟନ କରିଛନ୍ତି।