ଉତ୍ତର ପ୍ରଦେଶ : ହସପିଟାଲରେ ଗ୍ୟାସ ଲିକ୍, ଦଳାଚକଟାରେ ଜଣେ ମୃତ

ନୂଆଦିଲ୍ଲୀ : ଉତ୍ତର ପ୍ରଦେଶର ଶାହଜାହାନପୁର ଜିଲ୍ଲା ହସ୍ପିଟାଲରେ ଗ୍ୟାସ ଲିକ୍ ହୋଇଥିବା ଖବର ଆସିଛି । ଅକ୍ସିଜେନ ପ୍ଲାଣ୍ଟରେ ଗ୍ୟାସ ଲିକ୍ ହେବା ପରେ ହସ୍ପିଟାଲରେ ଦଳାଚକଟା ହୋଇଛି। ଏହି ସମୟରେ ଜଣଙ୍କର ମୃତ୍ୟୁ ହୋଇଥିଲା ଏବଂ ଅନେକ ଆହତ ହୋଇଥିବା ଜଣାଯାଇଛି। ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ପୋଲିସ ପ୍ରଶାସନ ଘଟଣାସ୍ଥଳରେ ପହଞ୍ଚିଥିଲା ଏବଂ ଦଳାଚକଟାରେ ମୃତ୍ୟୁ ପରେ ପୋଲିସ ତଦନ୍ତ ଆରମ୍ଭ କରିଥିଲା।

ଏହି ଘଟଣାର ଅନେକ ଭିଡିଓ ମଧ୍ୟ ସାମ୍ନାକୁ ଆସିଛି, ଯେଉଁଥିରେ ସ୍ପଷ୍ଟ ଭାବରେ ଦେଖାଯାଉଛି ଯେ କିଛି ଲୋକ ତଳେ ପଡ଼ିଛନ୍ତି ଏବଂ ସେମାନଙ୍କ ପରିବାର ସଦସ୍ୟ ସେମାନଙ୍କ ସହିତ ବସିଛନ୍ତି। ଏ ସମ୍ପର୍କରେ, ଶାହଜାହାନପୁର ପୁଲିସ ‘ଏକ୍ସ’ରେ ପୋଷ୍ଟ କରି ଲେଖିଛନ୍ତି - "ଉପରୋକ୍ତ ଘଟଣାରେ କୌଣସି ଜୀବନହାନି ହୋଇନାହିଁ, ଅଗ୍ନିଶମ ବାହିନୀ ଦଳ ଉଦ୍ଧାର କାର୍ଯ୍ୟ କରିଛନ୍ତି ଏବଂ ଜିଲ୍ଲା ମାଜିଷ୍ଟ୍ରେଟ୍ ଏବଂ ପୁଲିସ ଅଧୀକ୍ଷକ ଶାହଜାହାନପୁର ତୁରନ୍ତ ଘଟଣାସ୍ଥଳ ଯାଞ୍ଚ କରିଛନ୍ତି। ଘଟଣାସ୍ଥଳରେ ଶାନ୍ତି ଏବଂ ଶୃଙ୍ଖଳା ବଜାୟ ରହିଛି ଏବଂ ଅଧିକ ତଦନ୍ତ କରାଯାଉଛି।"

ଏହି ଘଟଣା ସମ୍ପର୍କରେ ଜରୁରୀକାଳୀନ ଚିକିତ୍ସା ଅଧିକାରୀ ଡାକ୍ତର ମେରାଜ ଆଲମ କହିଛନ୍ତି, "ଲୋକମାନେ ନିଶ୍ୱାସ ନେବାରେ କଷ୍ଟ ଅନୁଭବ କରିବା ପରେ ଆମେ ଟ୍ରମା ସେଣ୍ଟର (ଶାହାଜାହାନପୁର ମେଡିକାଲ କଲେଜ)କୁ ଖାଲି କରିଦେଇଛୁ। ଆମେ ଭାବୁଛୁ ଯେ ଏହା ଏକ ସନ୍ଦେହଜନକ ଗ୍ୟାସ ଲିକ୍, ଆମେ ଆମର ଉଚ୍ଚ ଅଧିକାରୀମାନଙ୍କୁ ଜଣାଇଛୁ। ଅଗ୍ନିଶମ ଗାଡ଼ି ଏବଂ ଅନ୍ୟାନ୍ୟ ଅଧିକାରୀମାନେ ଘଟଣାସ୍ଥଳରେ ଉପସ୍ଥିତ ଅଛନ୍ତି, ତଦନ୍ତ ଚାଲିଛି।"