ଆପଲ୍‌ ହାକିଂ ଆଲର୍ଟ ପଛରେ ଆମେରିକୀୟ ବ୍ୟବସାୟୀ ଜର୍ଜ ସୋରୋସ ଲିଙ୍କ୍‌

ନୂଆଦିଲ୍ଲୀ: ବିରୋଧୀ ଦଳ ନେତାମାନେ ସେମାନଙ୍କ ଫୋନ୍ ହ୍ୟାକିଂକୁ ନେଇ କେନ୍ଦ୍ର ବିରୋଧରେ ଅଭିଯୋଗ ଆଣିଥିବା ବେଳେ ପୁଣି ଥରେ ଗୁଇନ୍ଦାଗିରି ବିବାଦ ସୃଷ୍ଟି ହୋଇଛି। ବରିଷ୍ଠ କଂଗ୍ରେସ ନେତା ପି ଚିଦମ୍ବରମ୍ ଏକ୍ସରେ ରାଷ୍ଟ୍ର ପ୍ରାୟୋଜିତ ହ୍ୟାକିଂ ଉଦ୍ୟମ ଅଭିଯୋଗକୁ ନେଇ ସରକାରଙ୍କୁ ଟାର୍ଗେଟ କରିବା ପରେ ବୁଧବାର ବିଜେପି ପ୍ରତିକ୍ରିୟା ପ୍ରକାଶ କରିଛି। ବିଜେପି କହିଛି ଭାରତ ବିରୋଧୀ ଆମେରିକୀୟ ବ୍ୟବସାୟୀ ଜର୍ଜ ସୋରୋସଙ୍କ ପାଣ୍ଠିପ୍ରାପ୍ତ ‘ଆକ୍ସେସ୍ ନାଓ’ ଏବଂ କେବଳ ବିରୋଧୀ ନେତାଙ୍କୁ ମିଳିଥିବା ଆପଲ ବିଜ୍ଞପ୍ତି ଭିତରେ ‘ଲିଙ୍କ’ ରହିଛି।

‘ରାହୁଲ ଗାନ୍ଧି ସବୁ ଛାଡି ସାମ୍ବାଦିକ ସମ୍ମିଳନୀ କରିବାକୁ ଦୌଡ଼ି ଆସିବାରେ ଆଶ୍ଚର୍ଯ୍ୟ ହେବାର କିଛି ନାହିଁ। ଏଠାରେ କିପରି ଭୟାନକ ଷଡ଼ଯନ୍ତ୍ର ରହିଛି ଦେଖନ୍ତୁ।’ ବିଜେପି ଆଇଟି ସେଲ୍‌ର ରାଷ୍ଟ୍ରୀୟ ଆବାହକ ଅମିତ ମାଲବ୍ୟ ଚିଦମ୍ବରମଙ୍କୁ ଜବାବ ଦେଇ ଲେଖିଛନ୍ତି, ‘ଏହା ସତ ଯେ ଶତାଧିକ ବିରୋଧୀ ନେତାଙ୍କୁ ଆପଲ୍ ପକ୍ଷରୁ ସେମାନଙ୍କ ଫୋନ୍ ହ୍ୟାକିଂ ପାଇଁ ଉଦ୍ୟମ କରାଯାଉଥିବା ନେଇ ସତର୍କ ସୂଚନା ମିଳିଛି। କିନ୍ତୁ କେବଳ ବିରୋଧୀ ନେତା କାହିଁକି? ବିରୋଧୀ ନେତାଙ୍କ ଫୋନ ହ୍ୟାକିଂ କରିବାକୁ କିଏ ଆଗ୍ରହୀ ହେବ? ପେଗାସସ୍ ବିବାଦ (ଯାହା ଆଜି ପର୍ଯ୍ୟନ୍ତ ସମାଧାନ ହୋଇନାହିଁ) ପରେ ସନ୍ଦେହର ଆଙ୍ଗୁଠି ଏକ ସରକାରୀ ଏଜେନ୍ସି ଆଡ଼କୁ ଇଙ୍ଗିତ କରିଛି। ବର୍ତ୍ତମାନ ଏହା କେବଳ ସନ୍ଦେହ।

ମାଲବ୍ୟ ଏକ ପୁରୁଣା ଖବରର ସ୍କ୍ରିନସଟ୍ ସେୟାର କରିଛନ୍ତି, ଯେଉଁଥିରେ ତତ୍କାଳୀନ କେନ୍ଦ୍ରମନ୍ତ୍ରୀ ପ୍ରଣବ ମୁଖାର୍ଜୀଙ୍କ ଉଦ୍ଦେଶ୍ୟରେ କୁହାଯାଇଛି ଯେ, ତାଙ୍କ ଅର୍ଥ ମନ୍ତ୍ରଣାଳୟର କାର୍ଯ୍ୟାଳୟଗୁଡ଼ିକ ବନ୍ଦ ହୋଇଯାଇଛି। ସେ କହିଛନ୍ତି, ପୂର୍ବତନ ଅର୍ଥମନ୍ତ୍ରୀ ପ୍ରଣବ ମୁଖାର୍ଜୀଙ୍କ କାର୍ଯ୍ୟାଳୟ ହ୍ୟାକିଂର ଶିକାର ହୋଇଥିବା ବେଳେ ଆପଣ (ଚିଦମ୍ବରମ୍) ଗୃହମନ୍ତ୍ରୀ ଥିଲେ। ଏହା କ’ଣ ସୂଚନା ଦେଉଛି? ଜର୍ଜ ସୋରୋସଙ୍କ ପାଣ୍ଠିରେ ପରିଚାଳିତ ‘ଆକ୍ସେସ୍ ନାଓ’ ନେଟୱର୍କର ଭାଗ-୨ର ବିସ୍ତୃତ ବିବରଣୀ ଭାରତରେ ରହିଛି। ବିରୋଧୀ ଦଳର ନେତା ପାଇଥିବା ଆପଲ ବିଜ୍ଞପ୍ତି ମଧ୍ୟ ‘ଆକ୍ସେସ୍ ନାଓ’କୁ ସୂଚିତ କରେ ବୋଲି ମାଲବ୍ୟ କହିଛନ୍ତି। ଉଲ୍ଲେଖଯୋଗ୍ୟ, କଂଗ୍ରେସ ନେତା ରାହୁଲ ଗାନ୍ଧି ସୋରସଙ୍କର ଘନିଷ୍ଠ ସହଯୋଗୀ ବୋଲି ବିଜେପି ଲଗାତାର କହିଆସୁଛି।