ପୁଲିସର ଗୁଳି ବିନିମୟ ସମୟରେ ଧରାପଡ଼ିଥିବା ୭ଜଣ ଦୁର୍ବୃତ୍ତଙ୍କ ଗୋଡ଼ର ଗୋଟିଏ ସ୍ଥାନରେ ବାଜିଛି ଗୁଳି

ନୂଆଦିଲ୍ଲୀ: ଗାଜିଆବାଦ ପୁଲିସର ଗତ ଗୁରୁବାର ଗାଈ ଚାଲାଣକାରୀଙ୍କ ସହିତ ହୋଇଥିବା ଗୁଳିବିନିମୟ ଚର୍ଚ୍ଚାରେ ରହିଛି। ଆଶ୍ଚର୍ଯ୍ୟର କଥା ହେଉଛି ଏହି ଗୁଳିବିନିମୟ ସମୟରେ ଚାଲାଣକାରୀଙ୍କ ଗୋଡ଼ର ଗୋଟିଏ ସ୍ଥାନରେ ବାଜିଛି ଗୁଳି। ଗୁଳିବିନିମୟ ସମୟରେ ଆହତ ହୋଇଥିବା ୭ଜଣ ଚାଲାଣକାରୀଙ୍କୁ ପୁଲିସ ଗିରଫ କରି ନେଇଛି।

ଗତ ଗୁରୁବାର ଥାନା ଲୋନି ସୀମା ପୁଲିସର ଗାଈ ଚାଲାଣକାରୀଙ୍କ ସହିତ ଗୁଳିବିନିମୟ ହୋଇଥିଲା। ଏଥିରେ ୭ଜଣ ଚାଲାଣକାରୀଙ୍କ ଶରୀରରେ ଗୁଳି ବାଜିଥିଲା। ପୁଲିସ ଏହି ଘଟଣାରେ ୭ଜଣଙ୍କୁ ଗିରଫ କରିଥିବା ବେଳେ ଦୁଇଜଣ ଫେରାର ହୋଇଯାଇଛନ୍ତି। ଗିରଫ ହୋଇଥିବା ଅଭିଯୁକ୍ତଙ୍କ ଠାରୁ ପୁଲିସ ଧାରୁଆ ଅସ୍ତ୍ରଶସ୍ତ୍ର ବି ଜବତ କରିଛି।

ପୁଲିସ ବିଶେଷ ସୂତ୍ରକୁ ଖବର ପାଇ ଗାଈ ଚାଲାଣକାରୀଙ୍କ ଉପରେ ଚଢ଼ାଉ କରିଥିଲା। ପୁଲିସକୁ ଦେଖି ଚାଲାଣକାରୀ ୭ ରାଉଣ୍ଡ ଗୁଳି ଚଲାଇଥିଲେ। ପୁଲିସ ଏହାର ଜବାବ ଦେବାକୁ ଯାଇ ୧୩ ରାଉଣ୍ଡ ଗୁଳି ଚଲାଇଥିଲା। ଯେଉଁଥିରେ ୭ଜଣ ଆହତ ହୋଇଥିଲେ। ସମସ୍ତ ଆହତଙ୍କୁ ଗିରଫ କରି ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ଏହି ଘଟଣାରେ ସମ୍ପୃକ୍ତ ଦୁଇଜଣ ଫେରାର ଅଛନ୍ତି। ଏହି ଫେରାର ଦୁଇଜଣଙ୍କୁ ଧରିବା ପାଇଁ ପୁଲିସ ତଦନ୍ତ ଆରମ୍ଭ କରିଛି।