ମୁମ୍ବାଇ: ସାଧାରଣତଃ ଆମେ ସମସ୍ତେ ସକାଳେ ଉଠିବା ପରେ ଦାନ୍ତକୁ ସଫା କରିବା ପାଇଁ ଟୁଥପେଷ୍ଟ ବ୍ୟବହାର କରୁ | କିନ୍ତୁ ବ୍ରଶ କରିବା ଏବେ ଜଣେ ଯୁବତୀଙ୍କ ପ୍ରାଣ ନେଇଯାଇଛି | ମୁମ୍ବାଇର ଧରାବୀ ଅଞ୍ଚଳରୁ ଏଭଳି ଏକ ଘଟଣା ସାମ୍ନାକୁ ଆସିଛି, ଯେଉଁଠାରେ ଟୁଥପେଷ୍ଟ କାରଣରୁ ଜଣେ ୧୮ ବର୍ଷର ଯୁବତୀ ଜୀବନ ହରାଇଛନ୍ତି । ବାସ୍ତବରେ, ଯୁବତୀ ଜଣକ ମୂଷା ମରା ଔଷଧକୁ ଟୁଥପେଷ୍ଟ ଭାବି ଘଷିଦେଇଥିଲେ | ଆଉ ପରିବାର ଲୋକଙ୍କ ଗାଳି ଭୟରେ ସେ କାହାରିକୁ କିଛି କହିନଥିଲେ | ଶେଷରେ ତାଙ୍କର ମୃତ୍ୟୁ ହୋଇଯାଇଛି | ମଙ୍ଗଳବାର ଦିନ ପୁଲିସ କହିଛି ଯେ ଏହି ଘଟଣା ସେପ୍ଟେମ୍ବର ୩ ତାରିଖ ସକାଳେ ତାଙ୍କ ଘରେ ଘଟିଥିଲା ଏବଂ ମୃତକଙ୍କ ନାମ ହେଉଛି ଆଫସାନା ଖାନ।
Sambad is now on WhatsApp
Join and get latest news updates delivered to you via WhatsApp
ପୁଲିସର ସୂଚନାନୁସାରେ, ସେ ଦାନ୍ତ ଘଷିବା ପାଇଁ ଭୁଲରେ, ଟୁଥପେଷ୍ଟ ନିକଟରେ ରଖାଯାଇଥିବା ମୂଷା ମରା ଔଷଧ ବ୍ରଶରେ ଲଗାଇଦେଇଥିଲେ | ଏହା ପରେ ସେ ଦାନ୍ତ ଘଷିଥିଲେ | ତେବେ କିଛି ସମୟ ପରେ ସେ ସ୍ୱାଦ ଏବଂ ଗନ୍ଧର ପାର୍ଥକ୍ୟ ଅନୁଭବ କଲେ | ତେଣୁ ସେ ପାଟିରୁ ବିଷ ବାହାର କରିବାକୁ ଚେଷ୍ଟା କଲେ ବି ଏହା ପେଟ ଭିତରକୁ ପଳାଇଯାଇଥିଲା | ଏହା ପରେ ସେ ପେଟରେ ଯନ୍ତ୍ରଣା ଅନୁଭବ କରିଥିଲେ | କିନ୍ତୁ ପରିବାର ସଦସ୍ୟ କାଳେ ଗାଳିଗୁଲଜ କରିବେ ଭାବି କାହାରିକୁ କିଛି କହିନଥିଲେ |
ପେଟ ଯନ୍ତ୍ରଣା ଯୋଗୁଁ ସେ କିଛି ମେଡ଼ିସିନ କିଣି ଖାଇଥିଲେ ବି ଏହା କାମ ଦେଇନଥିଲା | ଏହା ପରେ ତାଙ୍କ ସ୍ୱାସ୍ଥ୍ୟ ବିଗୁଡ଼ିଥିବାର ଦେଖି ପରିବାର ଲୋକ ମେଡିକାଲରେ ଭର୍ତ୍ତି କରିଥିଲେ | ତେବେ ଗତକାଲି ସେ ଶେଷ ନିଶ୍ୱାସ ତ୍ୟାଗ କରିଥିଲେ | ମେଡିକାଲ ରିପୋର୍ଟରୁ ଜଣାପଡିଛି ଯେ ବିଷକ୍ରିୟା ଯୋଗୁଁ ତାଙ୍କର ମୃତ୍ୟୁ ହୋଇଛି |