ଭଗବତ ଗୀତା ସବୁଠାରୁ ଉପରେ, ଏହାକୁ ଅନ୍ୟ ଧର୍ମଗ୍ରନ୍ଥ ସହ ମିଶାଅ ନାହିଁ : କର୍ଣ୍ଣାଟକ ମନ୍ତ୍ରୀ
ବେଙ୍ଗାଲୁରୁ : କର୍ଣ୍ଣାଟକରେ ଚାଲିଥିବା ବାଇବେଲ ବିବାଦ ଓ ସ୍କୁଲ ପାଠ୍ୟକ୍ରମରେ ଭଗବତ ଗୀତାକୁ ଅନ୍ତର୍ଭୁକ୍ତ କରିବା ପ୍ରସଙ୍ଗରେ ମତ ରଖିଛନ୍ତି ରାଜ୍ୟର ଶିକ୍ଷା ମନ୍ତ୍ରୀ ବିସି ନଗେଶ । ସେ କହିଛନ୍ତି ଯେ ଭଗବତ ଗୀତାର ସ୍ଥାନ ସବୁଠାରୁ ଉପରେ । ଏହା ଏକ ଧର୍ମଗ୍ରନ୍ଥ ନୁହେଁ, କାରଣ ଏହା କୌଣସି ନିର୍ଦ୍ଦିଷ୍ଟ ଧର୍ମ ପଦ୍ଧତି ପାଳନ କରିବା ଶିଖାଏ ନାହିଁ, କିପରି ପ୍ରାର୍ଥନା କରାଯିବ ଏହା ଶିଖାଏ ନାହିଁ ।
Sambad is now on WhatsApp
Join and get latest news updates delivered to you via WhatsApp
ସେ ଆହୁରି ମଧ୍ୟ କହିଛନ୍ତି ଯେ ପିଲାମାନଙ୍କ ନୈତିକ ମନୋବଳ ବୃଦ୍ଧି କରୁଥିବା ଯେ କୌଣସି ଶିକ୍ଷା ଦେବାକୁ ରାଜ୍ୟ ସରକାର ପ୍ରସ୍ତୁତ ଅଛନ୍ତି ।
ବେଙ୍ଗାଲୁରୁର କ୍ଲେରାନ୍ସ ସ୍କୁଲ ପକ୍ଷରୁ ନିଜ ପାଠ୍ୟକ୍ରମରେ ବାଇବେଲକୁ ଅନ୍ତର୍ଭୁକ୍ତ କରିବାକୁ ନେଇ ରାଜ୍ୟରେ ବିବାଦ ସୃଷ୍ଟି ହୋଇଛି । ଏହାକୁ ନେଇ ରାଜ୍ୟ ସରକାର ସ୍କୁଲ କର୍ତ୍ତୃପକ୍ଷଙ୍କୁ ନୋଟିସ ଜାରି କରିଛନ୍ତି । ଗତ ୨୬ ତାରିଖରେ ରାଜ୍ୟର ପ୍ରାଥମିକ ଓ ମାଧ୍ୟମିକ ଶିକ୍ଷା ବିଭାଗ ପକ୍ଷରୁ ସଂପୃକ୍ତ ସ୍କୁଲକୁ କାରଣ ଦର୍ଶାଅ ନୋଟିସ ଜାରି କରାଯାଇଛି । ସ୍କୁଲର ଜବାବ ମିଳିବା ପରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି ।
ବିବାଦଟି ଗତ ୨୫ ତାରିଖରେ ଆରମ୍ଭ ହୋଇଥିଲା, ଯେତେବେଳେ ସ୍କୁଲ କର୍ତ୍ତୃପକ୍ଷଙ୍କ ପକ୍ଷରୁ ଅଭିଭାବକମାନଙ୍କୁ ଏକ ପ୍ରତିଶ୍ରୁତି ପତ୍ରରେ ସ୍ବାକ୍ଷର କରିବାକୁ କୁହାଗଲା ଯେ ସେମାନଙ୍କ ପିଲାମାନେ ବାଇବେଲ ଧରି ସ୍କୁଲକୁ ଆସିଲେ ସେମାନେ ବିରୋଧ କରିବେ ନାହିଁ ।