ପୁଣି ରେକର୍ଡ ଉଚ୍ଚତାରେ ସୁନାଦର, ୧୦ ଗ୍ରାମ ପିଛା ୩୮,୪୭୦ ଛୁଇଁଲା
ନୂଆଦିଲ୍ଲୀ : ସୋମବାରଦିନ ସୁନାଦର ପୁଣି ରେକର୍ଡ ସ୍ତରରେ ପହଞ୍ଚିଛି । ଦିଲ୍ଲୀର ସୁନା ବଜାରରେ ୧୦ ଗ୍ରାମପିଛା ୫୦ ଟଙ୍କା ବୃଦ୍ଧି ପାଇ ୩୮,୪୭୦ ଟଙ୍କାରେ ପହଞ୍ଚିଛି । ଗତ ଗୁରୁବାରଦିନ ସୁନା ପ୍ରଥମଥର ପାଇଁ ଏହି ଉଚ୍ଚତାରେ ପହଞ୍ଚିଥିଲା । ଅନ୍ତର୍ଜାତୀୟ ବଜାରରେ ଦର ବୃଦ୍ଧି ଓ ଘରୋଇ ବଜାରରେ ଚାହିଦା ବୃଦ୍ଧି ଫଳରେ ସୁନାଦର ବୃଦ୍ଧି ପାଇଥିବା ସର୍ବଭାରତୀୟ ସରାଫା ସଂଘ ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଦିଲ୍ଲୀରେ ଆଜି ସୁନା ଦର ୧୦ ଗ୍ରାମ ପିଛା ୫୦ ଟଙ୍କା ବୃଦ୍ଧି ପାଇଥିବାବେଳେ ରୁପା କିନ୍ତୁ କିଲୋଗ୍ରାମ ପିଛା ୧୧୫୦ ଟଙ୍କା ହ୍ରାସ ପାଇଛି । ଏହି ବୃଦ୍ଧି ଫଳରେ ଦିଲ୍ଲୀର ବୁଲିୟନ ମାର୍କେଟରେ ସୁନାଦର ୧୦ ଗ୍ରାମ ପିଛା ୩୮,୪୭୦ ଟଙ୍କାରେ ପହଞ୍ଚିଛି । ରୁପାଦର ମଧ୍ୟ କିଲୋଗ୍ରାମ ପିଛା ଏବେ ୪୩,୦୦୦ ଟଙ୍କାରେ ବିକ୍ରି ହେଉଛି ।
ଭାରତୀୟ ବଜାରରେ ୯୯.୯ ପ୍ରତିଶତ ଓ ୯୯.୫ ପ୍ରତିଶତ ଶୁଦ୍ଧତାର ସୁନା ୫୦ ଟଙ୍କା ଲେଖାଏଁ ବୃଦ୍ଧି ପାଇ ଯଥାକ୍ରମେ ୩୮,୪୭୦ ଓ ୩୮,୩୦୦ ଟଙ୍କାକୁ ବୃଦ୍ଧି ପାଇଛି । ଅନ୍ତର୍ଜାତୀୟ ବଜାରରେ ସୁନା ଦର ଆଉନ୍ସ ପିଛା ୧୫୦୩.୩୦ ଡଲାରରେ ପହଞ୍ଚିଛି । ଚୀନ-ଆମେରିକା ବାଣିଜ୍ୟ ଯୁଦ୍ଧ ଫଳରେ ଅନ୍ତର୍ଜାତୀୟ ବଜାରରେ ଦର ବୃଦ୍ଧି ପାଉଛି । ସୂଚନାଯୋଗ୍ୟ ଯେ ଏକ ଆଉନ୍ସ ହେଉଛି ୨୮.୩ ଗ୍ରାମ ।