ମୁଠେ ଖାଇବା ପାଇଁ ଶ୍ରୀଲଙ୍କା ଲୋକ ବିକିବାରେ ଲାଗିଛନ୍ତି ସୁନା ଗହଣା
କଲମ୍ବୋ: ଭାରତର ପଡ଼ୋଶୀ ଦେଶ ଶ୍ରୀଲଙ୍କା ଏବେ ଗୁରୁତର ଆର୍ଥିକ ସଂକଟ ଦେଇ ଗତି କରୁଛି। ଦେଶରେ ଲୋକମାନେ ଖାଦ୍ୟ ଠାରୁ ଆରମ୍ଭ କରି ପେଟ୍ରୋଲ, ଡିଜେଲ ଆଦି ସାମଗ୍ରୀର ଗୁରୁତର ଅଭାବ ଅନୁଭବ କରୁଛନ୍ତି। ଦେଶର ଅର୍ଥନୈତିକ ସଂକଟ ରାଜନୈତିକ ଏବଂ ସାମାଜିକ ସଂକଟରେ ପରିଣତ ହୋଇସାରିଲାଣି। ଆର୍ଥିକ ଅବସ୍ଥା ସହ ସଂଗ୍ରାମ କରୁଥିବା ଶ୍ରୀଲଙ୍କାର ଲୋକଙ୍କ ଅବସ୍ଥା ବିଗିଡି ଯାଉଛି। ପେଟ୍ରୋଲ-ଡିଜେଲ ଏବଂ ଖାଦ୍ୟ ପଦାର୍ଥ ସମେତ ଅନେକ ଦ୍ରବ୍ୟର ମୂଲ୍ୟ ଆକାଶଛୁଆଁ ହୋଇଥିବାବେଳେ ଲୋକଙ୍କୁ ପେଟ୍ରୋଲ ପମ୍ପରେ ୩୬ ଘଣ୍ଟା ଲାଇନରେ ଅପେକ୍ଷା କରିବାକୁ ପଡୁଛି |
Sambad is now on WhatsApp
Join and get latest news updates delivered to you via WhatsApp
ସ୍ଥିତି ଏମିତି ହୋଇଛି ଯେ ନିତ୍ୟବ୍ୟବହାର୍ଯ୍ୟ ସାମଗ୍ରୀ କିଣିବାକୁ ବହୁ ସଂଖ୍ୟକ ଲୋକ ବର୍ତ୍ତମାନ ନିଜର ଅଳଙ୍କାର ବିକ୍ରୟ କରିବାକୁ ବାଧ୍ୟ ହୋଇଛନ୍ତି | ଶ୍ରୀଲଙ୍କାର ସୁନା ଦୋକାନ ମାଲିକମାନେ କହିଛନ୍ତି ଯେ ସେମାନେ ପ୍ରଥମ ଥର ପାଇଁ ଏଭଳି ସ୍ଥିତି ଦେଖୁଛନ୍ତି ଯେ ଲୋକମାନେ ଅତ୍ୟାବଶ୍ୟକ ଦ୍ରବ୍ୟ କିଣିବା ପାଇଁ ସୁନା ବିକ୍ରୟ କରୁଛନ୍ତି । ଲୋକଙ୍କ ପାଖରେ ଖାଇବାକୁ ଟଙ୍କା ନଥିବାରୁ ସୁନା ବିକ୍ରି କରିବାକୁ ବାଧ୍ୟ ହୋଇଛନ୍ତି ।
ଖବର ଅନୁଯାୟୀ, ଶ୍ରୀଲଙ୍କାରେ ୨୪ କ୍ୟାରେଟ୍ ସୁନା ମୂଲ୍ୟ ୧୦ ଗ୍ରାମ ପିଛା ଏକ ଲକ୍ଷ ନବେ ହଜାର ଟଙ୍କାରେ ପହଞ୍ଚିଛି | ସେହିପରି ଶ୍ରୀଲଙ୍କାର ରାଜଧାନୀ କଲମ୍ବୋରେ ଏକ କପ୍ ଚା’ର ମୂଲ୍ୟ ୧୦୦ ଟଙ୍କାକୁ ବୃଦ୍ଧି ପାଇଛି। ଏକ କିଲୋଗ୍ରାମ ଆଳୁର ଦାମ ୨୦୦ ଟଙ୍କା ହୋଇଥିବାବେଳେ ଏକ ଲିଟର କ୍ଷୀର ପାଇଁ ଜଣଙ୍କୁ ୨୦୦୦ ଟଙ୍କା ଖର୍ଚ୍ଚ କରିବାକୁ ପଡୁଛି |