ମହାରାଷ୍ଟ୍ରରେ ସରକାର ଗଠନ ନେଇ ଖୁବ ଶୀଘ୍ର ଭଲ ଖବର ମିଳିବ : ବିଜେପି ନେତା
ମୁମ୍ବାଇ : ମହାରାଷ୍ଟ୍ର ବିଧାନସଭାର କାର୍ଯ୍ୟକାଳ ସରିଆସୁଥିବାବେଳେ ନୂଆ ସରକାର ଗଠନ ନେଇ ଏପର୍ଯ୍ୟନ୍ତ ଅନିଶ୍ଚିତତା ଜାରି ରହିଛି । ମୁଖ୍ୟମନ୍ତ୍ରୀ ପଦ ପାଇଁ ଅଡିବସିଥିବା ଶିବସେନାକୁ ପୁଣି ଥରେ ନିରାଶ କରିଛି ଏନସିପି-କଂଗ୍ରେସ ମେଣ୍ଟ । ଏନସିପି ବିରୋଧୀ ଦଳରେ ବସିବ ବୋଲି ଦୋହରାଇଛନ୍ତି ଏନସିପି ମୁଖ୍ୟ ଶରଦ ପାଓ୍ଵାର । ଆଜି ପାଓ୍ଵାରଙ୍କୁ ଭେଟିବାକୁ ଶିବସେନା ନେତା ସଂଜୟ ରାଉତ ତାଙ୍କ ବାସଭବନକୁ ଯାଇଥିଲେ । କିନ୍ତୁ ସେ ପାଓ୍ଵାରଙ୍କୁ ମନାଇବାରେ ବିଫଳ ହୋଇଥିଲେ । ଅନ୍ୟପକ୍ଷରେ ସରକାର ଗଠନ ପାଇଁ ବିଜେପି ଓ ଶିବସେନା ମଧ୍ୟରେ କଥାବାର୍ତ୍ତା ଚାଲିଥିବା ସୂଚନା ମିଳିଛି । ବିଜେପି ନେତା ତଥା କେନ୍ଦ୍ରମନ୍ତ୍ରୀ ସୁଧୀର ମୁଙ୍ଗାନ୍ତିଓ୍ଵାର କହିଛନ୍ତି ଯେ ଖୁବ ଶୀଘ୍ର ଭଲ ଖବର ମିଳିବ ।
Sambad is now on WhatsApp
Join and get latest news updates delivered to you via WhatsApp
ଆଜି ଶରଦ ପାଓ୍ଵାର କହିଛନ୍ତି ଯେ ୧୭୫ ଜଣ ବିଧାୟକଙ୍କ ସମର୍ଥନ ହାସଲ କରିଥିବା କଥା ସଂଜୟ ରାଉତ କିପରି ଦାବି କରୁଛନ୍ତି, ତାହା ସେ ଜାଣିପାରୁନାହାନ୍ତି । ଲୋକମାନେ ବିଜେପି-ଶିବସେନାକୁ ସରକାର ଗଠନ ପାଇଁ ଜନାଦେଶ ଦେଇଛନ୍ତି । ଏଣୁ ସେମାନେ ଯଥା ଶୀଘ୍ର ସରକାର ଗଠନ କରନ୍ତୁ । ଏନସିପିକୁ ଲୋକମାନେ ଜନାଦେଶ ଦେଇନାହାନ୍ତି ଏଣୁ ସେ ମୁଖ୍ୟମନ୍ତ୍ରୀ ହେବାର ପ୍ରଶ୍ନ ଉଠୁନାହିଁ ବୋଲି ସେ କହିଛନ୍ତି ।