ସହରସା : ବିହାରରେ ଆଇନର ଶାସନ ବଦଳରେ ଜଙ୍ଗଲରାଜ ଜାରି ରହିଛି । ଅପରାଧୀମାନେ କୋର୍ଟ ଭିତରେ ପଶି ହତ୍ୟାକାଣ୍ଡ କରିବାକୁ ଭୟ କରୁନାହାନ୍ତି ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟର ସହରସା ଜିଲ୍ଲାରେ ଅପରାଧୀମାନେ ଏକ ସିଭିଲ କୋର୍ଟ ପରିସରରେ ପଶି ଜଣେ ବିଚାରାଧୀନ କଏଦୀକୁ ଗୁଳିକରି ହତ୍ୟା କରିଛନ୍ତି । କୋର୍ଟରେ ସୁରକ୍ଷା ବ୍ୟବସ୍ଥା ଥିବା ସତ୍ତ୍ବେ ସେମାନେ ନିର୍ଦ୍ବନ୍ଦ୍ବରେ ପ୍ରବେଶ କରି ହତ୍ୟାକାଣ୍ଡ କରି ଫେରାର ହୋଇଯାଇଛନ୍ତି । ହାଇସିକ୍ୟୁରିଟି ଜୋନ୍ କୁହାଯାଉଥିବା କୋର୍ଟ କ୍ୟାମ୍ପସ୍ ର ବାରଣ୍ଡାରେ ଏହି ହତ୍ୟାକାଣ୍ଡ ଘଟିଛି।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, କୋର୍ଟ କ୍ୟାମ୍ପସରୁ ଯାଉଥିବା କଏଦୀଙ୍କୁ ସିଡି ନିକଟରେ ୩ରୁ ୪ ଜଣ ଦୁର୍ବୃତ୍ତ ହଠାତ୍ ଆଖିବୁଜା ଗୁଳି ଚଳାଇ ହତ୍ୟା କରିଥିଲେ । ଗୁଳି ବାଜିବାରୁ କଏଦୀ ଜଣକ ସେଠାରେ ଖସି ପଡ଼ିଥିଲେ ଏବଂ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା ।
ମୃତକ ଜଣକ ହେଉଛନ୍ତି ପ୍ରଭାକର ପଣ୍ଡିତ, ଯିଏ କି ମଙ୍ଗଳବାର ସିଭିଲ କୋର୍ଟରେ ହାଜର ହେବାକୁ ଆସିଥିଲେ। ଏହି ହତ୍ୟା କାଣ୍ଡ ପରେ କୋର୍ଟରେ ହଇଚଇ ସୃଷ୍ଟି ହୋଇଥିଲା। ଖବର ପାଇ ଏସପି ଲିପି ସିଂହ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ । ତେବେ ଖବର ଲେଖାହେବା ସୁଦ୍ଧା ଅପରାଧୀମାନଙ୍କୁ ଗିରଫ କରାଯାଇ ପାରିନାହିଁ । ଏହି ଘଟଣା ପୁଣି ଥରେ ବିହାରର କୋର୍ଟ ପରିସରର ସୁରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି କରିଛି।