ପାଠ ପଢ଼ାଇବାକୁ ନିୟୋଜିତ ହୋଇଥିଲେ କଳାକାର, ମଦ କିଣୁଥିବା ଦେଖି ଚୁକ୍ତି ବାତିଲ କଲେ ସରକାର

ଚେନ୍ନାଇ: ତାମିଲନାଡୁର ଇଲାମ ଥିଡି କଲଭି କିମ୍ବା ଘରକୁ ଘର ଯାଇ ଶିକ୍ଷା କାର୍ଯ୍ୟକ୍ରମରେ ଜଡିତ ଥିବା ଲୋକ କଳାକାରଙ୍କ ଏକ ଦଳ ସହ ରାଜ୍ୟ ସରକାର କରିଥିବା ବୁଝାମଣାକୁ ବାତିଲ କରିଛନ୍ତି | ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେବା ପରେ ଏହି ପଦକ୍ଷେପ ନିଆଯାଇଛି | ଭାଇରାଲ ଭିଡିଓରେ ଲୋକ କଳାକାରମାନେ ତାମିଲନାଡୁ ଷ୍ଟେଟ ମାର୍କେଟିଂ କର୍ପୋରେସନ୍ ଲିମିଟେଡ ଦୋକାନରୁ ମଦ କିଣୁଥିବା ଏବଂ ମଦ ବୋତଲଗୁଡ଼ିକୁ ରାଜ୍ୟ ସରକାର ଦେଇଥିବା ଏକ କାର ଭିତରେ ରଖିଥିବାର ନଜର ଆସିଥିଲେ।

୪୫ ସେକେଣ୍ଡର ଭିଡିଓ ଭାଇରାଲ ହେବା ପରେ ଶିକ୍ଷା ବିଭାଗ ଘରକୁ ଘର ଯାଇ ଶିକ୍ଷା କାର୍ଯ୍ୟକ୍ରମରେ ନିୟୋଜିତ ଲୋକ କଳାକାରଙ୍କ ଚୁକ୍ତିନାମାକୁ ରଦ୍ଦ କରିଦେଇଛି। ଭିଡିଓରେ ଦେଖିବାକୁ ମିଳିଥିଲା ଯେ କାରରେ ଲୋକ କଳାକାର ଗୋଷ୍ଠୀର ବ୍ୟାନର ଲାଗିଥିଲା ଓ ଲୋକକଳାକାରମାନେ ଯେଉଁ ଅଫିସିଆଲ୍ ଟି-ସାର୍ଟ ପିନ୍ଧିଥିଲେ ତାହା ଘରକୁ ଘର ଯାଇ ଶିକ୍ଷା କାର୍ଯ୍ୟକ୍ରମର ପ୍ରତିନିଧିତ୍ୱ କରୁଥିଲା |

ଛାତ୍ରମାନଙ୍କ ମଧ୍ୟରେ ଶିକ୍ଷାକୁ କଳା ସଂସ୍କୃତି ମଧ୍ୟରେ ପହଞ୍ଚାଇବାକୁ ତାମିଲନାଡୁ ଶିକ୍ଷା ବିଭାଗ ଦ୍ୱାରା 'ଇଲାମ ଥିଡି କଲଭି' ନାମକ କାର୍ଯ୍ୟକ୍ରମ ହାତକୁ ନିଆଯାଇଥିଲା | ଏହି କାର୍ଯ୍ୟକ୍ରମରେ ବିଭିନ୍ନ ସ୍ବେଚ୍ଛାସେବୀ ସଂଗଠନମାନେ ଗାଁ ଗାଁ ବୁଲି ପିଲାମାନଙ୍କୁ ପାଠ ପଢ଼ାଉଥିଲେ |