ଇସ୍ରାଏଲର ଏନଏସଓ ଗ୍ରୁପ ସହିତ କୌଣସି କାରବାର କରାଯାଇନାହିଁ : ସଂସଦରେ ପ୍ରତିରକ୍ଷା ମନ୍ତ୍ରାଳୟର ବୟାନ
ନୂଆଦିଲ୍ଲୀ : ପେଗାସସ୍ ଗୁଇନ୍ଦାଗିରି ପ୍ରସଙ୍ଗରେ ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ଆଜି ସଂସଦରେ ବୟାନ ରଖାଯାଇଛି । ଏହି ସଫ୍ଟଓ୍ବାର ନିର୍ମାଣ କରୁଥିବା ଇସ୍ରାଏଲର ଏନଏସଓ ଗ୍ରୁପ ସହିତ କୌଣସି କାରବାର କରାଯାଇ ନାହିଁ ବୋଲି କେନ୍ଦ୍ର ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ରାଜ୍ୟସଭାରେ ଏକ ଲିଖିତ ଉତ୍ତର ରଖାଯାଇଛି ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟସଭା ସଦସ୍ୟ ଡଃ. ଭି. ଶିବଦାସନଙ୍କ ଦ୍ବାରା ପଚରାଯାଇଥିବା ଏକ ପ୍ରଶ୍ନର ଉତ୍ତର ଦେଇ ମନ୍ତ୍ରାଳୟ ପକ୍ଷରୁ ଏହି ବୟାନ ରଖାଯାଇଛି । ସରକାର ଏନଏସଓ କମ୍ପାନି ସହିତ କୌଣସି କାରବାର କରିଥିଲେ କି ବୋଲି ଶିବଦାସନ ପଚାରିଥିଲେ ।
ତେବେ ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ଏହି ଉତ୍ତର ରଖାଯାଇଥିବାବେଳେ ଗୃହ ମନ୍ତ୍ରାଳୟ, ବୈଦେଶିକ ବ୍ୟାପାର ମନ୍ତ୍ରାଳୟ କିମ୍ବା କ୍ୟାବିନେଟ୍ ସେକ୍ରେଟାରିଏଟ୍ ପକ୍ଷରୁ ଏ ପର୍ଯ୍ୟନ୍ତ କୌଣସି ବୟାନ ଦିଆଯାଇ ନାହିଁ । ଏସବୁ ମନ୍ତ୍ରାଳୟ ଅଧିନରେ ଥିବା କେତେକ ଏଜେନ୍ସି ମଧ୍ୟ ଗୁଇନ୍ଦା କାମ କରିଥାନ୍ତି । ତେବେ ପୂର୍ବରୁ କେନ୍ଦ୍ର ସୂଚନା ପ୍ରଯୁକ୍ତି ଓ ଟେଲିକମ ମନ୍ତ୍ରୀ ଅଶ୍ବିନୀ ବୈଷ୍ଣବ ମଧ୍ୟ ଏହି ଗୁଇନ୍ଦାଗିରି କରାଯାଇଥିବା କଥା ଅସ୍ବୀକାର କରିଥିଲେ । ଭାରତରେ ଏପରି କରିବା ସମ୍ଭବ ନୁହେଁ ବୋଲି ସେ କହିଥିଲେ ।
ପେଗାସସ୍ ଗୁଇନ୍ଦାଗିରି ପ୍ରସଙ୍ଗରେ ବିରୋଧୀ ଦଳ କ୍ରମାଗତ ଭାବେ ସରକାରଙ୍କୁ ଟାର୍ଗେଟ୍ କରିବା ସହ ସଂସଦରେ ହଟ୍ଟଗୋଳ କରୁଛନ୍ତି ।