ନୂଆଦିଲ୍ଲୀ : ଦେଶରେ ବଡ଼ ବଡ଼ ଆର୍ଥିକ ଠକେଇ କରି ବିଦେଶ ପଳେଇଯାଉଥିବା ଠକମାନଙ୍କ ସଂଖ୍ୟା ବଢିଚାଲିଛି । ଏହାକୁ ନେଇ ଦେଶରେ ଅସନ୍ତୋଷ ବଢିଚାଲିଥିବାବେଳେ ଆଗକୁ ଯେପରି ଏଭଳି ଘଟଣା ନହୁଏ ତାହା ନିଶ୍ଚିତ କରିବାକୁ ସରକାର ଏକ ଆଇନ ଆଣିବାକୁ ଯାଉଛନ୍ତି । ମାର୍ଚ୍ଚ ୬ରୁ ଆରମ୍ଭ ହେବାକୁ ଯାଉଥିବା ସଂସଦର ବଜେଟ ଅଧିବେଶନର ଦ୍ୱିତୀୟ ଭାଗରେ ଏହି ବିଲ୍ ଆଗତ ହେବାର ସମ୍ଭାବନା ରହିଛି । ଭାରତୀୟ ଆଇନର ଜାଲରୁ ବର୍ତ୍ତିବା ପାଇଁ ବଡ଼ ବଡ଼ ଆର୍ଥିକ ଠକେଇରେ ସଂପୃକ୍ତ ବ୍ୟକ୍ତିମାନେ ବିଦେଶକୁ ପଳାୟନ କରୁଥିବାରୁ ତାହାକୁ ଯେପରି ରୋକାଯାଇପାରିବ ସେ ନେଇ ଏହି ଆଇନରେ ବ୍ୟବସ୍ଥା ରହିଛି । ଏହି ଚିଠା ଆଇନ ଅନୁସାରେ ଜଣେ ଫେରାର ଆର୍ଥିକ ଅପରାଧୀର ଅର୍ଥ ହେଉଛି ଯାହା ବିରୋଧରେ ଏକ ଆର୍ଥିକ ଠକେଇକୁ ନେଇ ଓ୍ଵାରେଣ୍ଟ ଜାରି ହୋଇଛି, କିନ୍ତୁ ସେ ଦେଶଛାଡି ପଳାଇଛି ଓ ଫେରିବାକୁ ମନା କରୁଛି । ଏପରି କ୍ଷେତ୍ରରେ ଭାରତରେ ଥିବା ତାହାର ସଂପତ୍ତିକୁ ଚିହ୍ନଟ କରି ଜବତ କରାଯାଇପାରିବ ।
Sambad is now on WhatsApp
Join and get latest news updates delivered to you via WhatsApp
ପୁଣି ଯେଉଁମାନେ ଭାରତ ଛାଡି ପଳାଇଯିବାର ସମ୍ଭାବନା ରହିଛି ସେମାନଙ୍କୁ ଚିହ୍ନଟ କରି ଆଗୁଆ ସେମାନଙ୍କ ପାସପୋର୍ଟ ରଦ୍ଦ କରିଦିଆଯିବ । ଆହୁରିମଧ୍ୟ ଯେଉଁମାନଙ୍କ ଆର୍ଥିକ କାରବାର ଉପରେ ସଂଦେହ ହେଉଛି ସେମାନଙ୍କ ଉପରେ ବିଶେଷ ନଜର ରଖିବାକୁ ଚିନ୍ତା କରାଯାଉଛି । ସରକାର କରୁଥିବା ଯୋଜନା ଅନୁସାରେ ବିଭିନ୍ନ କମ୍ପାନିର ବିଦେଶୀ କାରବାର ଉପରେ ନଜର ରଖାଯିବ । ରିଜର୍ଭ ବ୍ୟାଙ୍କ ଓ ଫାଇନାନ୍ସିଆଲ ଇଣ୍ଟେଲିଜେନ୍ସ ୟୁନିଟ୍ ଏସବୁ କାରବାର ଉପରେ ନଜର ରଖିବେ ଓ ସଂଦେହ ହେଲେ ସରକାରଙ୍କୁ ସତର୍କ କରାଇଦେବେ । ଅଧିକ ସଂଦେହ ହେଲେ ସେମାନଙ୍କ ପାସପୋର୍ଟକୁ ଜବତ କରିଦିଆଯିବ ।