୨୬/୧୧ ଘଟଣା ପରେ ବାୟୁସେନା ପାକିସ୍ତାନର ଆତଙ୍କବାଦୀ ଶିବିରଗୁଡ଼ିକୁ ଆକ୍ରମଣ କରିବାକୁ ପ୍ରସ୍ତୁତ ଥିଲା,ସରକାର ଅନୁମତି ଦେଲେନାହିଁ : ଧାନୋଆ
ମୁମ୍ବାଇ : ୨୬/୧୧ ମୁମ୍ବାଇ ଆକ୍ରମଣ ପରେ ଭାରତୀୟ ବାୟୁସେନା ପାକିସ୍ତାନରେ ଥିବା ଆତଙ୍କବାଦୀ ଶିବିରଗୁଡ଼ିକୁ ଧ୍ୱଂସ କରିଦେବାକୁ ପ୍ରସ୍ତୁତ ଥିଲା । କିନ୍ତୁ ତତକାଳୀନ ୟୁପିଏ ସରକାର ଅନୁମତି ଦେଇନଥିଲେ ବୋଲି କହିଛନ୍ତି ପୂର୍ବତନ ବାୟୁସେନା ମୁଖ୍ୟ ବି.ଏସ.ଧାନୋଆ ।
Sambad is now on WhatsApp
Join and get latest news updates delivered to you via WhatsApp
ଏକ ସ୍ଥାନୀୟ ଶିକ୍ଷାନୁଷ୍ଠାନର ବାର୍ଷିକ ଉତ୍ସବରେ ଉଦବୋଧନ ଦେଇ ସେ କହିଛନ୍ତି ଯେ ପାକିସ୍ତାନର କେଉଁଠାରେ ଆତଙ୍କବାଦୀ ଶିବିର ଥିଲା ତାହା ବାୟୁସେନା ଜାଣିଥିଲା । ସେଗୁଡ଼ିକ ଉପରେ ଆକ୍ରମଣ କରିବାକୁ ମଧ୍ୟ ପ୍ରସ୍ତୁତ ଥିଲା । କିନ୍ତୁ ଭାରତ ସରକାର ଏହି ପ୍ରସ୍ତାବକୁ ଖାରଜ କରିଦେଇଥିଲେ ।
ସୂଚନାଯୋଗ୍ୟ ଯେ ୨୬ ନଭେମ୍ବର ୨୦୦୮ରେ ପାକିସ୍ତାନୀ ଆତଙ୍କବାଦୀମାନେ ମୁମ୍ବାଇ ଉପରେ ଆକ୍ରମଣ କରିଥିଲେ । ସେମାନେ ମୁମ୍ବାଇର ନାରିମନ ପଏଣ୍ଟ, ଛତ୍ରପତି ଶିବାଜୀ ଟର୍ମିନସ, ଛାବାଦ ହାଉସ, ତାଜ ହୋଟେଲ ଆଦି ସ୍ଥାନରେ ଲୋକମାନଙ୍କ ଉପରକୁ ଆଖିବୁଜା ଗୁଳିଚାଳନା କରିଥିଲେ । ଏହି ଘଟଣାରେ ୧୬୬ ଜଣ ମୃତ୍ୟୁବରଣ କରିଥିଲେ ।
ସେ କହିଛନ୍ତି ଯେ ୨୦୦୧ ସଂସଦ ଉପରେ ଆତଙ୍କବାଦୀ ଆକ୍ରମଣ ପରେ ବାୟୁସେନା ପାକିସ୍ତାନକୁ ଆକ୍ରମଣ କରିବାକୁ ପ୍ରସ୍ତୁତ ଥିଲା । କିନ୍ତୁ ସରକାରଙ୍କଠାରୁ ଅନୁମତି ମିଳିଲାନାହିଁ । ସୂଚନାଯୋଗ୍ୟ ଯେ ବିଏସ ଧାନୋଆ ୩୧ ଡିସେମ୍ବର ୨୦୧୬ରୁ ସେପ୍ଟେମ୍ବର ୩୦ ପର୍ଯ୍ୟନ୍ତ ବାୟୁସେନା ମୁଖ୍ୟ ଥିଲେ । ତାଙ୍କ ସମୟରେ ଗତ ଫେବ୍ରୁଆରୀ ମାସରେ ଭାରତ ବାଲାକୋଟ ଏୟାରଷ୍ଟ୍ରାଇକ କରିଥିଲା ।