ଚୀନ କମ୍ପାନିଙ୍କ ସହ ଏମଓୟୁ କରିପାବେନି ଭାରତୀୟ ଶିକ୍ଷାନୁଷ୍ଠାନ !
ନୂଆଦିଲ୍ଲୀ : ବିଶ୍ବର ବିଭିନ୍ନ ଶିକ୍ଷାନୁଷ୍ଠାନଗୁଡ଼ିକରେ ଚୀନ ଗୁପ୍ତଚରଙ୍କ ଅନୁପ୍ରବେଶ ଆମେରିକା ଓ ଅନ୍ୟ ଦେଶମାନଙ୍କୁ ଚିନ୍ତିତ କରିଛି । ଚୀନ ନିଜର କନଫୁସିଅସ ଇନଷ୍ଟିଚ୍ୟୁଟ ମାଧ୍ୟମରେ ଶିକ୍ଷାନୁଷ୍ଠାନମାନଙ୍କ ସହ ସହବନ୍ଧନ କରି ଅନୁପ୍ରବେଶ କରୁଥିବା ଅଭିଯୋଗ ହେଉଛି । ଚୀନ ନିଜର ଟେକନଲୋଜୀ କମ୍ପାନିମାନଙ୍କ ମାଧ୍ୟମରେ ସମଗ୍ର ବିଶ୍ବରେ ଏକ ଗୁ୍ପ୍ତଚର ରାକେଟ ଚଳାଉଥିବା ଅଭିଯୋଗ ହେଉଛି । ଏହା ପରେ ଭାରତ ସରକାର ସତର୍କ ହୋଇଯାଇଛନ୍ତି । ଏହାକୁ ରୋକିବାକୁ କେନ୍ଦ୍ର ସରକାର ଶିକ୍ଷାନୁଷ୍ଠାନ ବିଶେଷକରି ବୈଷୟିକ ଶିକ୍ଷାନୁଷ୍ଠାନମାନଙ୍କୁ କେତେକ ନିର୍ଦ୍ଦେଶ ଜାରି କରିବାକୁ ବିଚାର କରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏକ ଜାତୀୟ ସ୍ତରର ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ ଚୀନ କମ୍ପାନିମାନଙ୍କ ସହ ସହବନ୍ଧନ ପାଇଁ ଭାରତୀୟ ଶିକ୍ଷାନୁଷ୍ଠାନମାନଙ୍କୁ ବାରଣ କରାଯିବ । ବିଶେଷକରି ବୈଷୟିକ ଶିକ୍ଷାନୁଷ୍ଠାନମାନଙ୍କୁ ଚୀନ କମ୍ପାନିମାନଙ୍କ ସହ କୌଣସି ପ୍ରକାରର ସହବନ୍ଧନ କରିବା ଉପରେ କଟକଣା ଲଗାଯାଇପାରେ । ଏହାଛଡ଼ା ଚୀନ କମ୍ପାନିମାନଙ୍କ ସହ କୌଣସି ପ୍ରକାରର ବୁଝାମଣା ପତ୍ରରେ ସ୍ବାକ୍ଷର କରିବା ପୂର୍ବରୁ ଉକ୍ତ ଚୀନ କମ୍ପାନି ଉପରେ ଭଲ ଭାବରେ ଅଧ୍ୟୟନ କରିବାକୁ ନିର୍ଦ୍ଦେଶ ଦିଆଯିବ । ପୁଣି ଏପରି କୌଣସି ଏମଓୟୁ କରିବା ପୂର୍ବରୁ କେନ୍ଦ୍ର ଗୃହ ମନ୍ତ୍ରାଳୟର ଅନୁମତି ନେବାକୁ କୁହାଯାଇଛି ।
ଆଇଆଇଟି ଦିଲ୍ଲୀର ଜଣେ ପ୍ରଫେସର କହିଛନ୍ତି ଯେ ପୂର୍ବରୁ ବି କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ସମାନ ପରାମର୍ଶ ଜାରି କରାଯାଇଥିଲା । ଏହି ପ୍ରସଙ୍ଗ ଜାତୀୟ ସୁରକ୍ଷା ସହିତ ଜଡ଼ିତ ଥିବାରୁ ସରକାର ଏଥର ଅଧିକ ସତର୍କ ହୋଇଛନ୍ତି ।