‘ମୋର ସ୍ତ୍ରୀଟିଏ ଦରକାର, ଯୌତୁକ ନୁହେଁ’ କହି ୧୧ ଲକ୍ଷ ଟଙ୍କାର ଯୌତୁକ ଫେରାଇଦେଲେ ବର
ଆଜମେର: ଯୌତୁକ ପାଇଁ କେତେବେଳେ ପତ୍ନୀକୁ ହତ୍ୟା ତ ପୁଣି କେବେ ପତ୍ନୀ ସହ ବାରମ୍ବାର ଝଗଡ଼ାର ଅନେକ ଖବର ଆପଣ ପଢ଼ିଥିବେ | ଯୌତୁକ ପାଇଁ ଶ୍ୱଶୁରଘର ଉପରେ ବର ପକ୍ଷରୁ ଚାପ ପକାଇଥିବାର କଳା କାହାଣୀ ବାବଦରେ ବି ଆପଣ ଜାଣିଥିବେ | କିନ୍ତୁ ଆଜି ଆମେ ଆପଣଙ୍କୁ ଏମିତି ଜଣେ ବରଙ୍କ କାହାଣୀ କହିବୁ ଯିଏ କି ପାଖାପାଖି ୧୧ ଲକ୍ଷ ଟଙ୍କାର ଯୌତୁକ ସହ କାର ଫେରାଇଦେଇଛନ୍ତି | ସମ୍ପର୍କର ଗୁରୁତ୍ୱ ବୁଝୁଥିବା ଏଭଳି ଏକ ଜ୍ୱାଇଁ ପାଇଁ ଖୁସିରେ ଗଦଗଦ ହୋଇଯାଇଛନ୍ତି କନ୍ୟା ପିତା |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ରାଜସ୍ଥାନର ଚିତୋରଗଡ଼ର ରାବତଭାତା ଗାଁର ରାମସୁଖ ଗୁରଜର ନିଜ ପୁଅ ମୟଙ୍କରାଜଙ୍କର ବିବାହ ଗୁଜୁରାଟର ଜଣେ ଯୁବତୀଙ୍କ ସହ ସ୍ଥିର କରିଥିଲେ | ଫେବୃୟାରୀ ୯ ତାରିଖରେ ବିବାହ ହେବାକୁ ଥିବାବେଳେ ଆଜି ତାଙ୍କର ନିର୍ବନ୍ଧ କାର୍ଯ୍ୟକ୍ରମ ଥିଲା | ଏହି ସମୟରେ କନ୍ୟା ଘର ପକ୍ଷରୁ ୧୧ ଲକ୍ଷ ଟଙ୍କାର ଏକ ବ୍ୟାଗ ସହ କାରଟିଏ ଯୌତୁକ ଭାବରେ ଦିଆଯାଇଥିଲା | କିନ୍ତୁ ମୟଙ୍କରାଜଙ୍କ ଗୋଟିଏ ପଦ କଥା ସମସ୍ତଙ୍କ ଆଖିରେ ଲୁହ ଆଣିଦେଇଥିଲା | ମୟଙ୍କ କହିଥିଲେ ଯେ ‘ଜୀବନର ରାସ୍ତାରେ ଚାଲିବା ପାଇଁ ତାଙ୍କୁ ଭଲ ସଙ୍ଗିନୀଟିଏ ହିଁ ଆବଶ୍ୟକ | ଯୌତୁକ ନେଇ କଣ କରିବେ, ଦୟାକରି ଫେରାଇନିଅନ୍ତୁ’ | ଏହି କଥା ପଦକ ଶୁଣି ଝିଅର ବାପାଙ୍କ ଆଖିରୁ ଲୁହ ଟୋପାଏ ମଧ୍ୟ ଝରିପଡିଥିବାର ଦେଖିବାକୁ ମିଳିଥିଲା |
ମୟଙ୍କଙ୍କ ବାପା କହିଛନ୍ତି ଯେ ଯେଉଁଦିନ ପ୍ରଥମେ ଝିଅ ଦେଖିବାକୁ ସେମାନେ ଯାଇଥିଲେ ସେହିଦିନ ଝିଅ ଘର ପକ୍ଷରୁ କଣ ସବୁ ଯୌତୁକ ନେବେ ବୋଲି ପଚରାଯାଇଥିଲା | ପୁଅ ଘର ପକ୍ଷରୁ କୌଣସି ଯୌତୁକ ନିଆଯିବ ନାହିଁ ବୋଲି କୁହାଯାଇଥିଲା | କିନ୍ତୁ ଝିଅ ଘର ଭାବିଥିଲେ ଯେ ସବୁ ପୁଅ ଘର ଏମିତି ହିଁ କୁହନ୍ତି, ସେଥିପାଇଁ ନିର୍ବନ୍ଧ ଦିନ ୧୧ ଲକ୍ଷ ଟଙ୍କା ସହ କାରଟିଏ ନେଇ ପହଂଚିଥିଲେ | କିନ୍ତୁ ଯୌତୁକକୁ ଫେରାଇଦିଆଯାଇଥିଲା |