ସାଧାରଣ ଖାଉଟି ସାମଗ୍ରୀ ଉପରୁ ଟିକସ ହ୍ରାସ ନେଇ ବିଚାର କରିପାରନ୍ତି ଜିଏସ୍ଟି କାଉନ୍ସିଲ
ନୂଆଦିଲ୍ଲୀ: ନଭେମ୍ବର ୧୦ରେ କେନ୍ଦ୍ର ଅର୍ଥ ମନ୍ତ୍ରୀ ଅରୁଣ ଜେଟଲୀଙ୍କ ଅଧ୍ୟକ୍ଷତାରେ ଓ ରାଜ୍ୟ ଅର୍ଥମନ୍ତ୍ରୀଙ୍କୁ ନେଇ ଗୌହାଟିରେ ବସିବ କ୍ଷମତାସଂପନ୍ନ ଜିଏସଟି କାଉନସିଲ ବୈଠକ। ଏହି ବୈଠକରେ ଏଥର ଅନେକ ସାଧାରଣ ସାମଗ୍ରୀ ଉପରେ ଟିକସ କମିପାରେ ବୋଲି ଆଶା କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏ ନେଇ ଦିଲ୍ଲୀରେ ଶନିବାର ସୂଚନା ଦେବା ପରେ କାଠତିଆରି ଆସବାବପତ୍ର, ଗାଧୋଇବା ପାଇଁ ବ୍ୟବହୃତ ହେଉଥିବା ଅନେକ ପ୍ଲାଷ୍ଟିକ ଉପକରଣରେ ଜିଏସଟି ଟିକସ ହାର ହ୍ରାସ ପାଇପାରେ ବୋଲି ସୂଚନା ମିଳିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଜିଏସଟି ଲାଗୁ ହେବା ପୂର୍ବରୁ ଅନେକ ପ୍ଲାଷ୍ଟିକ ସାମଗ୍ରୀ ଉପରେ ନିଆଯାଉଥିବା ବିଭିନ୍ନ ଟିକସ ତୁଳନାରେ ବର୍ତ୍ତମାନ ଅଧିକ ଟିକସ ନିଆଯାଉଥିବା ପ୍ଲାଷ୍ଟିକ ର୍ନିମାତା ସଂଘ ଅଭିଯୋଗ କରିଛନ୍ତି। ଉଦାହରଣ ସ୍ୱରୁପ, ସାୱାର ବାଥ, ସିଙ୍କ, ୱାସ ବେସିନ ଓ ପ୍ଲାଷ୍ଟିକ ତିଆରି ଅନେକ ସାନିଟାରୀ ଉପକରଣରେ ସର୍ବାଧିକ ୨୮ ପ୍ରତିଶତ ଜିଏସଟି ଟିକସ ଜାରି ହୋଇଛି। ପ୍ଳାଷ୍ଟିକ ଶିଳ୍ପ ସହ କାଠ ଶିଳ୍ପରେ ଅନେକ କ୍ଷୁଦ୍ର ଓ ମଧ୍ୟମ ଶିଳ୍ପୋଦ୍ୟୋଗୀ ଜଡିତ ଥିବାରୁ ଟିକସ ହାରକୁ ୧୮ ପ୍ରତିଶତ ଭିତରେ ସୀମିତ ରଖିବାକୁ ଦାବି ହେଉଛି । ଏହା ଖାଉଟିମାନଙ୍କ ପାଇଁ ବି ଲାଭଦାୟକ ହେବ ବୋଲି କୁହାଯାଉଛି ।
ଚଳିତ ବର୍ଷ ଜୁଲାଇ ମାସ ଆରମ୍ଭରୁ ସାରା ଦେଶରେ ପ୍ରାୟ ୧୭ଟି ପରୋକ୍ଷ ଟିକସ ହଟାଇ ନିଆଯାଇ ତା’ ସ୍ଥାନରେ ଜିଏସଟି ବା ଦ୍ରବ୍ୟ ଓ ସେବା କର ଟିକସ ଲାଗୁ କରାଯାଇଛି । ଜିଏସଟି ଲାଗୁ ହେବା ପରେ ବିଭିନ୍ନ ବୈଠକରେ ଜିଏସଟି କାଉନସିଲ ପ୍ରାୟ ୧୦୦ରୁ ଅଧିକ ଦ୍ରବ୍ୟ ଓ ସେବା ଉପରେ ଟିକସ ହାର ବଦଳାଇ ସାରିଲାଣି ।