କ୍ୟାବିନେଟ୍ ବଦଳାଇବା ନେଇ ଗୁଜୁରାଟ ବିଜେପିରେ ବିବାଦ, ସନ୍ଧ୍ୟାକୁ ଘୁଞ୍ଚିଲା ଶପଥ ଗ୍ରହଣ
ନୂଆଦିଲ୍ଲୀ: ଗୁଜୁରାଟର ନୂଆ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଶପଥ ନେବା ପରେ ଆଜି କ୍ୟାବିନେଟ ଗଠନ ହୋଇପାରେ । ହେଲେ ଏବେ କ୍ୟାବିନେଟ ଅଦଳବଦଳ ନେଇ ବିଜେପି ଭିତରେ କନ୍ଦଳ ଆରମ୍ଭ ହୋଇଛି । କ୍ୟାବିନେଟରେ କିଛି ନୂଆ ଚେହେରା ସାମିଲ ହେବା ନେଇ ପୁରୁଣା ନେତାମାନେ ବିବାଦ ଆରମ୍ଭ କରିଥିବା ଜଣାପଡିଛି । ପ୍ରଥମେ କୁହାଯାଇଥିଲା କି ଦ୍ୱିପ୍ରହରରେ ମନ୍ତ୍ରୀମାନେ ଶପଥ ନେବେ। ହେଲେ କିଛି ବିବାଦକୁ ନଜର କରି ଏହି ଶପଥ ଗ୍ରହଣ ଉତ୍ସବକୁ ସନ୍ଧ୍ୟାକୁ ଘୁଞ୍ଚାଇ ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଭୂପେନ୍ଦ୍ର ପଟେଲ ପୁରା କ୍ୟାବିନେଟ ବଦଳାଇବାକୁ ଚାହୁଁଥିବା ବେଳେ ଏହାକୁ ନେଇ ଅନ୍ତଃକନ୍ଦଳ ବଢିବାରେ ଲାଗିଛି । ବିଜେପି ସୂତ୍ରରୁ ମିଳିଥିବା ସୂଚନା ମୁତାବକ ପୁରା ୯୦ ପ୍ରତିଶତ ମନ୍ତ୍ରୀଙ୍କୁ ବିଦା କରାଯିବ । ଜଣେ କିମ୍ବା ୨ ଜଣ ପୁରୁଣା ମନ୍ତ୍ରୀଙ୍କୁ ଦ୍ୱିତୀୟ ଥର ମନ୍ତ୍ରୀପଦ ମିଳିପାରେ । ଆଜି ୨୧ ରୁ ୨୨ ଜଣ ମନ୍ତ୍ରୀ ଶପଥ ନେଇପାରନ୍ତି । ମନ୍ତ୍ରିମଣ୍ଡଳରେ ନୂଆ ଚେହେରାଙ୍କୁ ସାମିଲ କରିବାକୁ ଚେଷ୍ଟା ଚଳାଇଛନ୍ତି ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ । ଏହାସହ ମନ୍ତ୍ରିମଣ୍ଡଳରେ ମହିଳା ବିଧାୟକଙ୍କୁ ଗୁରୁତ୍ୱ ଦେବା ଉପରେ ବି ଗୁରୁତ୍ୱ ଦେଉଛନ୍ତି ଶ୍ରୀ ପଟେଲ ।
ଉଲ୍ଲେଖଯୋଗ୍ୟ, ଏକ ନାଟକୀୟ ଢଙ୍ଗରେ ହଠାତ ଗୁଜୁରାଟର ମୁଖ୍ୟମନ୍ତ୍ରୀ ଥିବା ବିଜୟ ରୂପାଣୀ ଇସ୍ତଫା ଦେବା ପରେ ମୁଖ୍ୟମନ୍ତ୍ରୀ ଦୌଡରେ ନଥିବା ଭୂପେନ୍ଦ୍ର ପଟେଲଙ୍କୁ ବିଧାୟକ ଦଳର ନେତା ବଛାଯାଇଥିଲା। ଏହାର ପରଦିନ ସେ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ।