ଇମ୍ଫାଲ: ଗତ ମାସରେ ମଣିପୁରରେ ଆରମ୍ଭ ହୋଇଥିବା ହିଂସା ଧୀରେ ଧୀରେ ହ୍ରାସ ପାଉଥିବା ଜଣାପଡିଛି। କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ଅପିଲ ପରେ ଲୋକମାନେ ମଣିପୁରର ବିଭିନ୍ନ ଥାନାରେ ୧୪୦ଟି ବନ୍ଧୁକ ଫେରାଇଦେଇଛନ୍ତି | ମଣିପୁର ଗସ୍ତ ସମୟରେ ଅସ୍ତ୍ରଶସ୍ତ୍ର ସରେଣ୍ଡର କରିବାକୁ ଶାହା ଅପିଲ କରିଥିଲେ | ବାସ୍ତବରେ ମଣିପୁରର ବିଭିନ୍ନ ଥାନା, ଅସ୍ତ୍ରାଗାର ଓ ସୁରକ୍ଷା ବାହିନୀ ଶିବିରରୁ ପ୍ରାୟ ୪ ହଜାର ବନ୍ଧୁକ ଚୋରି ହୋଇଯାଇଥିଲା । ଲୁଟ୍ ହୋଇଥିବା ଅସ୍ତ୍ରଶସ୍ତ୍ର ମଧ୍ୟରେ ଏକେ ସିରିଜ୍ ବନ୍ଧୁକ, ଏମ୧୬ ରାଇଫଲ୍, କାର୍ବାଇନ୍ସ ଏବଂ ପିସ୍ତଲ ଥିଲା | କିଛି ଅସ୍ତ୍ର ମିଆଁମାର ଆତଙ୍କବାଦୀ ଗୋଷ୍ଠୀ ନିକଟରେ ପହଞ୍ଚି ସାରିଛି ବୋଲି ଗୁଇନ୍ଦା ରିପୋର୍ଟରୁ ମଧ୍ୟ ଜଣାପଡ଼ିଥିଲା ।
Sambad is now on WhatsApp
Join and get latest news updates delivered to you via WhatsApp
ତେବେ ଏହାପରେ ଅମିତ ଶାହା ମଣିପୁର ଗସ୍ତରେ ଯାଇ ହିଂସା ପ୍ରଭାବିତ ଲୋକଙ୍କୁ ଭେଟିବା ସହ କହିଥିଲେ ଯେ ହିଂସାକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ ହେବ। ଯେଉଁମାନେ ସରକାରୀ ଅସ୍ତ୍ର ଲୁଟ୍ କରିଛନ୍ତି ତାହା ତୁରନ୍ତ ଫେରାଇଦିଅନ୍ତୁ । ଯଦି ଚୋରି କରିଥିବା ବନ୍ଧୁକ ସରେଣ୍ଡର କରା ନ ଯାଏ ତେବେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେ କହିଥିଲେ, “ଗୁଜବ ପ୍ରତି ଧ୍ୟାନ ଦିଅନ୍ତୁ ନାହିଁ। ବର୍ତ୍ତମାନ ରାଜ୍ୟରେ ଅବସ୍ଥା ଭଲ ଅଛି।” ତାଙ୍କ ବିବୃତ୍ତି ପରେ ଲୋକମାନେ ବହୁ ସଂଖ୍ୟାରେ ଅସ୍ତ୍ରଶସ୍ତ୍ର ସରେଣ୍ଡର କରିଛନ୍ତି | ମଣିପୁର ପୁଲିସ କହିଛି ଯେ ବିଭିନ୍ନ ଥାନାରେ ସରେଣ୍ଡର ହୋଇଥିବା ୧୪୦ଟି ବନ୍ଧୁକ ମଧ୍ୟରେ ଏସଏଲଆର ୨୯, କାର୍ବାଇନ୍, ଏକେ, ଇନସାସ ରାଇଫଲ, ଇନସାସ ଏଲଏମଜି, ୯ ଏମଏମ ପିସ୍ତଲ, ଏମ୧୬ ରାଇଫଲ, ଜେଭିପି ଏବଂ ଜେଭିପି ଗ୍ରେନେଡ ଲଂଚର ପ୍ରମୁଖ ରହିଛି |