ଇସ୍ଲାମାବାଦ : ପାକିସ୍ତାନରେ ଗତ କାଲି ନିର୍ବାଚନ ଶେଷ ହୋଇଛି । ମିଳିଥିବା ସୂଚନା ଅନୁସାରେ ଦେଶରେ ଝୁଲା ଜାତୀୟ ଆସେମ୍ବ୍ଲି ହୋଇଥିବାବେଳେ କ୍ରିକେଟିୟରରୁ ରାଜନେତା ବନିଥିବା ଇମ୍ରାନ ଖାଁଙ୍କ ଦଳ ପାକିସ୍ତାନ ତେହେରିକ-ଏ ଇନସାଫ (ପିଟିଆଇ) ୧୧୩ଟି ସିଟ୍ ପାଇ ସବୁଠାରୁ ଆଗୁଆ ଅଛି । ୨ୟ ସ୍ଥାନରେ ରହିଛି ନଓ୍ଵାଜ ସରିଫଙ୍କ ଦଳ ପାକିସ୍ତାନ ମୁସଲିମ ଲିଗ-ନଓ୍ଵାଜ ଯାହାକି ୬୪ଟି ଭୋଟ ପାଇଛି । ପିପିପି ୪୩ଟି ସିଟ ପାଇଛି ।
Sambad is now on WhatsApp
Join and get latest news updates delivered to you via WhatsApp
ତେବେ ସବୁଠାରୁ ଗୁରୁତ୍ୱପୂର୍ଣ୍ଣ ତଥା ଶୁଭ ସୂଚନା ହେଲା ଯେ ପାକିସ୍ତାନରେ ଯେତେ ସବୁ ଆତଙ୍କବାଦୀ ଛିଡା ହୋଇଥିଲେ ପ୍ରାୟ ସମସ୍ତେ ଶୋଚନୀୟ ଭାବେ ହାରି ଯାଇଛନ୍ତି । ମୁମ୍ବାଇ ବୋମା ବିସ୍ଫୋରଣର ମୁଖ୍ୟ ଅଭିଯୁକ୍ତ ହାଫିସ ସଇଦର ସବୁ ପ୍ରାର୍ଥୀ ହାରିଯାଇଛନ୍ତି । ସେ ନିଜେ, ତା ପୁଅ, ଜ୍ୱାଇଁ ମଧ୍ୟ ହାରିଯାଇଛନ୍ତି । ହାଫିଜର ରାଜନୈତିକ ସଂଗଠନ ମିଲି ମୁସଲିମ ଲିଗକୁ ନିର୍ବାଚନ ଲଢିବାକୁ ଅନୁମତି ମିଳିନଥିଲା । କିନ୍ତୁ ସେ ନିଜର ପ୍ରାର୍ଥୀମାନଙ୍କୁ ଆଲ୍ଲା-ହୁ ଆକବର ତେହେରିକ ନାମକ ଛୋଟ ଦଳ ଅଧିନରେ ୨୬୫ ପ୍ରାର୍ଥୀଙ୍କୁ ଛିଡା କରାଇଥିଲା । ଆଉ ଏକ ସଂଗଠନ ହେଉଛି ତେହେରିକ ଲବାଇକ ପାକିସ୍ତାନ (ଟିଏଲପି) । ଏହି ଦଳ ସମୁଦାୟ ୧୫୨ଟି ପ୍ରାର୍ଥୀ ଛିଡା କରିଥିଲା, କିନ୍ତୁ ସବୁ ପ୍ରାର୍ଥୀ ହାରିଯାଇଛନ୍ତି । ଏହି ଦଳର ମୁଖ୍ୟ ପ୍ରତିଶ୍ରୁତି ହେଉଛି ପାକିସ୍ତାନରେ ଧର୍ମୀୟ କାନୁନକୁ ଅଧିକ କଠୋର କରିବା । ବିଶେଷକରି ବ୍ଲାସଫେମି (ଇଶ୍ୱରନିନ୍ଦା) ଆଇନକୁ କଠୋର କରିବାକୁ ଏହି ଦଳ ନିଜର ନିର୍ବାଚନୀ ପ୍ରତିଶ୍ରୁତି ରଖିଛି । ଏହି ଆଇନ ଦ୍ୱାରା ଅତୀତରେ ଅନେକ ସଂଖ୍ୟାଲଘୁଙ୍କ ଉପରେ ଆକ୍ରମଣ କରାଯାଇଛି ।
ଏସବୁ ଆତଙ୍କବାଦୀ ଓ କଠୋରପନ୍ଥୀଙ୍କୁ ଭୋଟ ନଦେଇ ପାକିସ୍ତାନବାସୀ ଆତଙ୍କବାଦ ବିରୋଧରେ ଏକ ବଡ଼ ସଂକେତ ଦେଇଛନ୍ତି ।