ହତ୍ୟା ସ୍ବୀକାର କଲେ ମୃତ ମଡେଲ୍‌ଙ୍କ ବିବାହିତ ପ୍ରେମିକ

ହରିଆଣା: ହରିଆଣାର ଏକ କେନାଲରୁ ଗଳା କାଟି ମଡେଲର ମୃତଦେହ ଉଦ୍ଧାର ହେବାର ଗୋଟିଏ ଦିନ ପରେ ତାହାକୁ ନେଇ ଏକ ଚାଞ୍ଚଲ୍ୟକର ତଥ୍ୟ ପ୍ରକାଶ ପାଇଛି। ପୁଲିସ୍‌ କହିଛି ଯେ ଜଣେ ଦୁଇଟି ପିଲାର ବାପାଙ୍କ ସହ ମହିଳା ଜଣକ ପ୍ରେମ ସଂପର୍କରେ ଥିଲେ। ତାଙ୍କ ପ୍ରେମିକଙ୍କ ହିଁ ତାଙ୍କର ହତ୍ୟା କରିଥିବା ଜାଣିବାକୁ ମିଳିଛି। ଅଭିଯୁକ୍ତ ପ୍ରେମିକ ନିଜେ ତାଙ୍କ ଦୋଷ ସ୍ବୀକାର କରିଛନ୍ତି।

ସୂଚନାରୁ ଜାଣିବାକୁ ମିଳିଛି ଯେ ଅଭିଯୁକ୍ତ ସୁନୀଲ ଏବଂ ମଡେଲ ଶୀତଲ ଚୌଧୁରୀଙ୍କ ମଧ୍ୟରେ ଶନିବାର ରାତିରେ ଝଗଡ଼ା ହୋଇଥିଲା। ଯାହା ଶୀଘ୍ର ଶାରୀରିକ ନିର୍ଯାତନାରେ ପରିଣତ ହୋଇଥିଲା ଏବଂ ସୁନୀଲ ତାଙ୍କୁ ଅନେକ ଥର ପିଟି ପିଟି ହତ୍ୟା କରିଥିଲେ। ପରେ ତାଙ୍କ ମୃତଦେହକୁ କେନାଲରେ ଫିଙ୍ଗି ଦେଇଥିଲେ ବୋଲି ପୁଲିସ କହିଛି।

ସୁନୀଲଙ୍କୁ ପାଣିପତର ଏକ ହସ୍ପିଟାଲରେ ଦେଖିବାକୁ ମିଳିଥିଲା। ଯେଉଁଠାରେ ସେ ଶୀତଲଙ୍କୁ ହତ୍ୟା କରିଥିବା ସ୍ୱୀକାର କରିଥିଲେ। ମାତ୍ର ଏହା ପୂର୍ବରୁ ସେ ଏହି ହତ୍ୟାକୁ ଏକ କାର ଦୁର୍ଘଟଣା ବୋଲି କହିବାକୁ ଚେଷ୍ଟା କରିଥିଲେ।

ଶନିବାର ଶୀତଲ ଏକ ଆଲବମ୍ ସୁଟିଂ ପାଇଁ ପାଣିପତର ଏକ ଗାଁକୁ ଆସିଥିଲେ। ରାତି ୧୦.୩୦ରେ ସୁନୀଲ ତାଙ୍କ ପ୍ରେମିକାଙ୍କୁ ଭେଟିବା ପାଇଁ ସେଠାରେ ପହଞ୍ଚିଲେ। ସେ ତାଙ୍କୁ ତାଙ୍କ କାରକୁ ନେଇଗଲେ। ଯେଉଁଠାରେ ସେମାନେ ଯୁକ୍ତିତର୍କ ଆରମ୍ଭ ହେବା ପୂର୍ବରୁ କିଛି ପାନୀୟ ପିଇଥିଲେ ବୋଲି ଅଭିଯୋଗ ହୋଇଛି।

ରାତି ପ୍ରାୟ ୧:୩୦ ସମୟରେ ଶୀତଲ ତାଙ୍କ ଭଉଣୀ ନେହାଙ୍କୁ ପାନିପତରୁ  ଭିଡିଓ କଲ୍ କରିଥିଲେ ଏବଂ ସୁନୀଲ ତାଙ୍କୁ ମାରୁଥିବାର ଜଣାଇଥିଲେ। କିଛି ସମୟ ପରେ, ନେହା ତାଙ୍କ ଭଉଣୀଙ୍କ ସହ ଯୋଗାଯୋଗ କରିପାରିନଥିଲେ କାରଣ ତାଙ୍କ ଫୋନ୍ ବନ୍ଦ ହୋଇ ଯାଇଥିଲା।