ଚୀନ ଲଢୁଆ ବିମାନକୁ ତାଇଓ୍ଵାନ ଖସାଇଥିବା ସଂଦେହ
ନୂଆଦିଲ୍ଲୀ : ଚୀନର ଆକ୍ରମଣାତ୍ମକ ଅଭିମୁଖ୍ୟକୁ ନେଇ ସମଗ୍ର ଏସିଆରେ ଯୁଦ୍ଧର କଳାବାଦଲ ଘୋଟିଆସୁଛି । ଗୋଟିଏପଟେ ଲଦାଖରେ ଭାରତ ଓ ଚୀନ ସେନା ମୁହାଁମୁହିଁ ଥିବାବେଳେ ଅନ୍ୟପଟେ ତାଇଓ୍ଵାନ ଓ ଚୀନ ମଧ୍ୟରେ ସମ୍ପର୍କରେ ବିଗିଡ଼ିବାରେ ଲାଗିଛି । ଏହି ପୃଷ୍ଠଭୂମିରେ ଆଜି ଏକ ଅତି ଗୁରୁତ୍ୱପୂର୍ଣ୍ଣ ଘଟଣା ଘଟିଛି ।
Sambad is now on WhatsApp
Join and get latest news updates delivered to you via WhatsApp
ଅସମର୍ଥିତ ସୁତ୍ରରୁ ମିଳିଥିବା ସୂଚନା ଅନୁସାରେ ତାଇଓ୍ଵାନର ଏୟାର ଡିଫେନ୍ସ ସିଷ୍ଟମ ଚୀନର ପିପୁଲ୍ସ ଆର୍ମି ଏୟାର ଫୋର୍ସର ଏକ ସୁଖୋଇ-୩୫ ଲଢୁଆ ବିମାନକୁ କ୍ଷେପଣାସ୍ତ୍ର ମାରି ଖସାଇଦେଇଛି । ଏହି ବିମାନଟି ତାଇଓ୍ଵାନର ବାୟୁସୀମା ଟପୁଥିବାବେଳେ ଏହି ଘଟଣା ଘଟିଥିଲା । ତାଇଓ୍ଵାନ ପକ୍ଷରୁ ବାରମ୍ବାର ଚେତାବନୀ ଦିଆଯାଇଥିଲେ ମଧ୍ୟ ଚୀନ ବିମାନ ଶୁଣିନଥିଲା । ଏହି ଘଟଣାକୁ ତାଇଓ୍ଵାନ ସରକାର ଏପର୍ଯ୍ୟନ୍ତ ସ୍ୱୀକାର କରିନାହାନ୍ତି । ତେବେ ତାଇଓ୍ଵାନର ରାଷ୍ଟ୍ରପତି ଏକ ଜରୁରୀକାଳୀନ ବୈଠକ ଡକାଇଛନ୍ତି ।
ଏହି ଘଟଣା ସତ ସାବ୍ୟସ୍ତ ହେଲେ ତାଇଓ୍ଵାନ ଓ ଚୀନ ମଧ୍ୟରେ ସଂପର୍କ ଆହୁରି ବିଗିଡ଼ିବାର ଆଶଙ୍କା ରହିଛି । ଏପରିକି ଯୁଦ୍ଧ ହେବାର ଆଶଙ୍କା ମଧ୍ୟ ବଢିଯାଇଛି ।
ଚୀନ ତାଇଓ୍ଵାନକୁ ନିଜର ଅଞ୍ଚଳ ବୋଲି ଦାବି କରୁଥିବାବେଳେ ତାଇଓ୍ଵାନ ନିଜକୁ ଏକ ସ୍ୱାଧୀନ ଦେଶ ବୋଲୁ କହୁଛି । ଚୀନ ଆସନ୍ତା ୨୦୨୫ ସୁଦ୍ଧା ବଳପୂର୍ବକ ତାଇଓ୍ଵାନକୁ ଅଧିକାର କରିନେବ ବୋଲି ଧମକ ଦେଇଛି ।