ମମତାଙ୍କୁ ହାଇକୋର୍ଟରୁ ଝଟକା, ରାଜ୍ୟପାଳଙ୍କ ବିରୋଧରେ ଆପତ୍ତିଜନକ ବୟାନ ଦେଇପାରିବେ ନାହିଁ

କୋଲକାତା: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟପାଳ ସିଭି ଆନନ୍ଦ ବୋଷଙ୍କ ବିରୋଧରେ କୌଣସି ଅପମାନଜନକ କିମ୍ବା ମିଥ୍ୟା ମନ୍ତବ୍ୟ ଦେଇପାରିବେ ନାହିଁ ବୋଲି କଲିକତା ହାଇକୋର୍ଟ ମଙ୍ଗଳବାର ରାୟ ଶୁଣାଇଛନ୍ତି। ଜୁନ୍ ୨୮ତାରିଖରେ ବୋଷ କଲିକତା ହାଇକୋର୍ଟରେ ମୁଖ୍ୟମନ୍ତ୍ରୀଙ୍କ ବିରୋଧରେ ମାନହାନି ମାମଲା ଦାୟର କରିଥିଲେ। ମୁଖ୍ୟମନ୍ତ୍ରୀ କହିଥିଲେ ଯେ ମହିଳାମାନେ ରାଜଭବନ ଯିବାକୁ ଭୟ କରୁଛନ୍ତି ବୋଲି ତାଙ୍କ ନିକଟରେ ଅଭିଯୋଗ କରିଥିଲେ।

ମେ' ୨ ତାରିଖରେ ଜଣେ ଚୁକ୍ତିଭିତ୍ତିକ ମହିଳା କର୍ମଚାରୀ ସିଭି ଆନନ୍ଦ ବୋଷଙ୍କୁ ରାଜ୍ୟପାଳଙ୍କ ବାସଭବନରେ ଅସଦାଚରଣ କରିଥିବା ଅଭିଯୋଗ ଆଣିବା ପରେ କୋଲକାତା ପୁଲିସ ଘଟଣାର ତଦନ୍ତ ଆରମ୍ଭ କରିଥିଲା। ଏହି ପ୍ରସଙ୍ଗରେ ମମତା ବାନାର୍ଜୀ ଦାବି କରିଛନ୍ତି ଯେ ମହିଳାମାନେ ତାଙ୍କୁ କହିଥିଲେ ଯେ "ନିକଟରେ ରାଜଭବନରେ ଘଟିଥିବା ଘଟଣା ଯୋଗୁଁ ସେମାନେ ରାଜଭବନ ଯିବାକୁ ଡରୁଛନ୍ତି।

ମୁଖ୍ୟମନ୍ତ୍ରୀଙ୍କ ଓକିଲ କହିଛନ୍ତି ଯେ ଏହି ମନ୍ତବ୍ୟ ଅପମାନଜନକ ନୁହେଁ ବରଂ ପ୍ରକୃତରେ ଜନସ୍ୱାର୍ଥ ପାଇଁ କରାଯାଇଛି। ରାଜ୍ୟପାଳଙ୍କ ଦ୍ୱାରା ଦାୟର ହୋଇଥିବା ମାମଲା ଗ୍ରହଣୀୟ ହେବ ନାହିଁ ବୋଲି ମଧ୍ୟ କୁହାଯାଇଥିଲା। ସେହିପରି ରାଜ୍ୟପାଳ ବୋଷଙ୍କ ଓକିଲ କହିଛନ୍ତି ଯେ, ଅଭିଯୋଗକାରୀ ଏଭଳି ଆଶ୍ୱସ୍ତି ଚାହୁଁଛନ୍ତି ଯେ ମୁଖ୍ୟମନ୍ତ୍ରୀ ଓ ଶାସକ ଦଳର ଅନ୍ୟ ଦୁଇ ବିଧାୟକଙ୍କୁ ସେମାନଙ୍କ ବିରୋଧରେ କୌଣସି ବୟାନ ଦେବାକୁ ବାରଣ କରାଯାଉ।