ନୂଆଦିଲ୍ଲୀ: ବିହାରରେ ବିଧାନସଭା ନିର୍ବାଚନ ପୂର୍ବରୁ ଚାଲିଥିବା ଏସ୍ଆଇଆର୍ (ସ୍ବତନ୍ତ୍ର ଭୋଟର ତାଲିକା ସଂଶୋଧନ)କୁ ବିରୋଧ କରି ଆଜି ବିରୋଧୀ ଦଳ ସଦସ୍ୟମାନେ ସଂସଦରେ ପ୍ରବଳ ହଟ୍ଟଗୋଳ କରିଛନ୍ତି। ବିରୋଧୀଙ୍କ ହୋହଲ୍ଲା ଯୋଗୁଁ ଆଜି ଉଭୟ ଲୋକସଭା ଓ ରାଜ୍ୟସଭାରେ କୌଣସି କାର୍ଯ୍ୟ ହୋଇପାରିନି। ଲଗାତାର ବିଶୃଙ୍ଖଳା ଉଭୟ ଗୃହକୁ ଆସନ୍ତାକାଲି (ଜୁଲାଇ ୨୩) ପର୍ଯ୍ୟନ୍ତ ମୁଲତବୀ ରଖାଯାଇଛି। ଆଜି ପୂର୍ବାହ୍ନ ୧୧ଟାରେ ଦ୍ବିତୀୟ ଦିବସର ଗୃହ କାର୍ଯ୍ୟ ଆରମ୍ଭ ହେଉହେଉ ଗୃହରେ ହଟ୍ଟଗୋଳ ହେବାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଗୃହ ମୁଲତବୀ ରଖାଯାଇଥିଲା। ମଧ୍ୟାହ୍ନ ୧୨ଟାରେ ଗୃହ କାର୍ଯ୍ୟ ପୁନଃ ଆରମ୍ଭ ହେଉହେଉ ପୁଣି ହଟ୍ଟଗୋଳ ଯୋଗୁଁ ଅପରାହ୍ନ ୨ଟା ପର୍ଯ୍ୟନ୍ତ ଗୃହ ମୁଲତବୀ ରଖାଯାଇଥିଲା। ଗୃହ କାର୍ଯ୍ୟରେ ବାଧା ସୃଷ୍ଟି କରୁଥିବା ବିରୋଧୀ ସଦସ୍ୟଙ୍କୁ ଟାର୍ଗେଟ୍ କରି କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ କହିଛନ୍ତି, ସରକାର ଆଲୋଚନା ପାଇଁ ପ୍ରସ୍ତୁତ ଅଛନ୍ତି କିନ୍ତୁ ବିରୋଧୀ ଦଳ ନେତାମାନେ କେବଳ ବିରୋଧ କରି ସଂସଦର ସମୟ ନଷ୍ଟ କରୁଛନ୍ତି।
ସେହିପରି ରାଜ୍ୟସଭାରେ ବିରୋଧୀ ସାଂସଦମାନେ ବିହାରରେ ଏସ୍ଆଇଆର୍ ସଂକ୍ରାନ୍ତରେ ଆଲୋଚନା ଦାବି କରି ସ୍ଲୋଗାନ ଦେଇଥିଲେ। ଶୂନ୍ୟକାଳ ଆରମ୍ଭ ହେଉ ହେଉ ସାଂସଦ ଘନଶ୍ୟାମ ତିୱାରୀ ଗୃହ ବ୍ୟାପାର ମନ୍ତ୍ରାଳୟର ବିଜ୍ଞପ୍ତି ଯେଉଁଥିରେ ସମ୍ବିଧାନର ଧାରା ୬୭ (ଏ) ଅଧୀନରେ ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କ ଇସ୍ତଫା ଦର୍ଶାଯାଇଥିବା ଘୋଷଣା କରିଥିଲେ। କିନ୍ତୁ ବିରୋଧୀ ସଦସ୍ୟମାନେ ଲଗାତାର ଗୃହ କାର୍ଯ୍ୟରେ ବାଧା ସୃଷ୍ଟି କରିବାରୁ ପରିଶେଷରେ ଗୃହ ମୁଲତବୀ ରଖାଯାଇଥିଲା।
ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ଏବଂ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ସଂସଦର ମକର ଦ୍ବାର ପାହାଚରେ ଠିଆ ହୋଇ ବିହାର ଏସ୍ଆଇଆର୍ ବିରୋଧରେ ଆନ୍ଦୋଳନ କରିଛନ୍ତି। ବିହାରରେ ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରକ୍ରିୟାକୁ ବିରୋଧ କରି ଏକାଧିକ ନେତା ଆଜି ପ୍ଲାକାର୍ଡ ଧରି ଆନ୍ଦୋଳନ କରିଥିଲେ। ଭୋଟର୍ ତାଲିକାରେ ଏଭଳି ସଂଶୋଧନ ଦ୍ବାରା ଭାରତୀୟଙ୍କ ଅଧିକାର ଚୋରାଯାଉଛି ଏବଂ ଗଣତନ୍ତ୍ରର ହତ୍ୟା କରାଯାଉଛି ବୋଲି ବିରୋଧୀ ଦଳ ନେତାମାନେ କହିଛନ୍ତି।
Advertisment

Sambad is now on WhatsApp
Join and get latest news updates delivered to you via WhatsApp