ଢାଳିଲା ବର୍ଷା, ବୁଡ଼ିଲା ରାସ୍ତା.. ମାୟାନଗରୀର ରାସ୍ତା ପାଲଟିଲା ନଈ, ଗାତଖାଲରେ ପଡ଼ି ଫସିଲା ଗାଡ଼ି

ମୁମ୍ବାଇ: ପୁଣି ବର୍ଷାରେ ବେହାଲ ହେଲା ଦେଶର ବାଣିଜ୍ୟ ରାଜଧାନୀ କୁହାଯାଉଥିବା ମାୟାନଗରୀ ମୁମ୍ବାଇ । ଶୁକ୍ରବାର ପ୍ରବଳ ବର୍ଷାରେ ମୁମ୍ବାଇର ସ୍ଥିତି ସଙ୍ଗୀନ ହୋଇଛି । ମୁମ୍ବାଇର କିଛି ସ୍ଥାନରେ ଆଜି ପ୍ରବଳରୁ ଅତି ପ୍ରବଳ ବର୍ଷା ହେବା ଫଳରେ ସହରର ଅନେକ ସ୍ଥାନ ଜଳବନ୍ଦୀ ହୋଇଛି ।

ଗାଡ଼ି ମଟର ଚଳାଚଳ ବାଧାପ୍ରାପ୍ତ ହୋଇଛି । ରାସ୍ତାରେ ଆଣ୍ଠୁଏ ଆଣ୍ଠୁଏ ପାଣି ଛିଡା ହେବା ଫଳରେ ରାସ୍ତାରେ ଅଟକିଯାଇଛି ଗାଡ଼ି । ପାଣି ପଶି ଗାଡି ଷ୍ଟାର୍ଟ ବନ୍ଦ ହୋଇଯାଇଛି । ଏବଂ ବର୍ଷା ଫଳରେ ରାସ୍ତାରେ ହୋଇଥିବା ଗାତ ଖାଲରେ ପଡି ଅନେକ ବାଇକ୍ ଚାଳକ ଗାଡ଼ିରୁ ପଡି ଯାଇଥିବା ଦେଖିବାକୁ ମିଳିଛି । ଟ୍ରାକରେ ପାଣି ଜମିବା ଫଳରେ ଟ୍ରେନ୍ ସେବା ମଧ୍ୟ ମନ୍ଥର ହୋଇଛି । ସହରର ଅନେକ ମୁଖ୍ୟ ରାସ୍ତାରେ ଟ୍ରାଫିକ୍ ସମସ୍ୟା ସୃଷ୍ଟି ହୋଇଛି । ପ୍ରବଳ ବର୍ଷା ଯୋଗୁଁ ରାସ୍ତାରେ ଗାତ ଖାଲ ସାଧାରଣ ଜୀବନକୁ ପ୍ରଭାବିତ କରିଛି । ସହରର ବିଭିନ୍ନ ଅଞ୍ଚଳରେ ଜଳବନ୍ଦୀ ସମସ୍ୟା ଉପୁଜିଛି । 

ବର୍ଷା ସତ୍ବେ ତଥାପି ଲୋକମାନେ ମେରାଇନ ଡ୍ରାଇଭରେ ବୁଲୁଥିବା ଦେଖିବାକୁ ମିଳିଛି । ମୌସୁମୀ ପ୍ରଭାବରେ ଆକାଶ ମେଘାଛନ୍ନ ଥିବାରୁ ମେଘରେ ଘୋଡ଼ାଇ ହୋଇ ରହିଥିବା ଆକାଶର ଫଟୋ ଉଠାଇବାକୁ ଲୋକଙ୍କ ଭିଡ ସମୁଦ୍ର କୂଳରେ ଦେଖିବାକୁ ମିଳିଥିଲା ।

ସେପଟେ ମୁମ୍ବାଇକୁ ପ୍ରବଳ ବର୍ଷା ନେଇ ଆଲର୍ଟ ଜାରି କରାଯାଇଥିବା ବେଳେ ରାସ୍ତାର ଅବସ୍ଥା ଭଲ ନଥିବାରୁ, ଖାଲଖମାରେ ଭର୍ତ୍ତି ଥିବାରୁ ଲୋକଙ୍କ ସୁରକ୍ଷାକୁ ଦୃଷ୍ଟିରେ ରଖି ପୋଲିସ ମଧ୍ୟ ପରାମର୍ଶ ଜାରି କରିଥିଲା । ମୁମ୍ବାଇ ପାଇଁ  ଆଗାମୀ ଦୁଇ ଦିନ ପ୍ରବଳ ବର୍ଷାର ଆଲର୍ଟ ଜାରି କରାଯାଇଥିବା ବେଳେ ଏହାକୁ ଦୃଷ୍ଟିରେ ରଖି ପୋଲିସ ପରାମର୍ଶ ଦେଇଥିଲା । ଏକ ଟୁଇଟ୍ କରି ପୋଲିସ ଲୋକଙ୍କୁ ବର୍ଷା ବେଳେ ଘରେ ରହିବାକୁ ପରାମର୍ଶ ଦେଇଥିଲା । ଅତି ଆବଶ୍ୟକ ନଥିଲେ ଘରୁ ନବାହାରିବାକୁ କହିଥିଲା । ଏଥିସହ ସମୁଦ୍ର କୂଳ ଅଞ୍ଚଳ ବୁଲାବୁଲି ନକରିବା ପାଇଁ ବି ପରାମର୍ଶ ଜାରି କରାଯାଇଥିଲା ହେଲେ ପୋଲିସର ପରାମର୍ଶ ନମାନି କିଛି ଲୋକେ ବୁଲାବୁଲି କରୁଥିବା ଦେଖିବାକୁ ମିଳିଛି ।