ନୂଆଦିଲ୍ଲୀ: ୟୁକ୍ରେନ ରାଜଧାନୀ କିବ୍‌ ଉପକଣ୍ଠରେ ଆଜି ଏକ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇ ଖସିପଡ଼ିଛି। ଏହି ହେଲିକପ୍ଟରରେ ୟୁକ୍ରେନ୍‌ ଆଭ୍ୟନ୍ତରୀଣ ମନ୍ତ୍ରୀଙ୍କ ସମେତ ମୋଟ୍‌ ୯ ଜଣ ଥିଲେ। ସମସ୍ତ ୯ ଜଣଙ୍କ ମୃତ୍ୟୁ ହୋଇଛି। ତେବେ ବିମାନଟି ଏକ ନର୍ସରି ଉପରେ ଖସି ପଡ଼ିବାଫଳରେ ଆଉ ୯ ଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ୩ ଜଣ ଶିଶୁ ଅଛନ୍ତି। ହେଲିକପ୍ଟର ଖସି ପଡ଼ିବା ଫଳରେ ନର୍ସରିରେ ନିଆଁ ଲାଗି ଯାଇଥିଲା। ଏହି ସମୟରେ ନର୍ସରି‌ରେ ଶତାଧିକ ଶିଶୁ ଉପସ୍ଥିତ ଥିଲେ। ଦୁର୍ଘଟଣାରେ ପ୍ରାୟ ୧୦ ଜଣ ଆହତ ହୋଇଛନ୍ତି। ୬ ଜଣଙ୍କ ଶରୀର ଅତି ସାଂଘାତିକ ଭାବେ ଜଳି ଯାଇଛି। ଫ୍ରାନ୍ସ ନିର୍ମିତ ସୁପର ପୁମା ହେଲିକପ୍ଟର କିବ୍‌ର ପୂର୍ବ ଅଞ୍ଚଳ ସ୍ଥିତ ବ୍ରୋଭାରିରେ ଖସି ପଡ଼ିଥିଲା। ଏହି ଦୁର୍ଘଟଣାରେ ନର୍ସରିର ଏକ କୋଠା ସମ୍ପୂର୍ଣ୍ଣ ଜଳି ଯାଇଛି।