ନୂଆଦିଲ୍ଲୀ: ଝାଡ଼ଖଣ୍ଡର ମୁଖ୍ୟମନ୍ତ୍ରୀ ତଥା ଝାଡଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) ନେତା ହେମନ୍ତ ସୋରେନ ସୋମବାର ଜାତୀୟ ରାଜଧାନୀ ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିଛନ୍ତି। ଜେଲ୍ରୁ ବାହାରିବା ପରେ ପ୍ରଥମ ଥର ପାଇଁ ହେମନ୍ତ ପ୍ରଧାନମନ୍ତ୍ରୀଙ୍କୁ ଭେଟିଛନ୍ତି। ପୁଣି ମୁଖ୍ୟମନ୍ତ୍ରୀ ପଦ ପାଇବା ପରେ ଏହା ପ୍ରଧାନମନ୍ତ୍ରୀଙ୍କ ସହିତ ତାଙ୍କର ପ୍ରଥମ ସାକ୍ଷାତ୍। ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ବୈଠକର ଫଟୋ ସେୟାର କରି ସୋରେନ ବାର୍ତ୍ତାଳାପକୁ ସୌଜନ୍ୟ ମୂଳକ ବୋଲି କହିଛନ୍ତି। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ମଧ୍ୟ ଏହାର ଫଟୋ ସେୟାର କରାଯାଇଛି।
ସୂଚନାଯୋଗ୍ୟ, ହେମନ୍ତ ସୋରେନ ପୂର୍ବରୁ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ଜାନୁଆରୀ ୩୧ ରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଦ୍ବାରା ଗିରଫ ହେବା ପୂର୍ବରୁ ତାଙ୍କ ଇସ୍ତଫା ଆସିଥିଲା। ଜମି ଦୁର୍ନୀତି ସହ ଜଡିତ ଅର୍ଥ ହେରଫେର ମାମଲାରେ ଏହି ଗିରଫଦାରୀ କରାଯାଇଥିଲା। ଜାମିନ ପାଇବା ପୂର୍ବରୁ ସୋରେନ ପ୍ରାୟ ପାଞ୍ଚ ମାସ ଜେଲରେ ରହିଥିଲେ।
Jharkhand CM Hemant Soren met Prime Minister Narendra Modi, in Delhi pic.twitter.com/1iY8tqiMAw
— ANI (@ANI) July 15, 2024
ମୁକ୍ତ ହେବା ପରେ ସେ ପୁଣି ଥରେ ଜୁଲାଇ ୪ରେ ମୁଖ୍ୟମନ୍ତ୍ରୀ ଭାବରେ ଦାୟିତ୍ବ ଗ୍ରହଣ କରିଥିଲେ। ପ୍ରଧାନମନ୍ତ୍ରୀ ମୋଦୀଙ୍କ ସହ ତାଙ୍କର ସାକ୍ଷାତ ରାଜ୍ୟରେ ତାଙ୍କର ରାଜନୈତିକ କାର୍ଯ୍ୟକଳାପ ଏବଂ ନେତୃତ୍ୱକୁ ପୁନଃପ୍ରତିଷ୍ଠା କରିବା ପାଇଁ ଏକ ପଦକ୍ଷେପ ବୋଲି ସେ ସୂଚନା ଦେଇଛନ୍ତି।
ଚଳିତ ବର୍ଷ ଶେଷରେ ଝାଡଖଣ୍ଡରେ ବିଧାନସଭା ନିର୍ବାଚନ ମଧ୍ୟ ହେବାକୁ ଯାଉଛି, ଯାହା ଉପରେ ସମସ୍ତଙ୍କ ନଜର ରହିଛି। ହେମନ୍ତ ସୋରେନ ଚାହୁଁଛନ୍ତି ଯେ ଗତ କିଛି ମାସ ମଧ୍ୟରେ ରାଜ୍ୟ ରାଜନୀତିରେ ଦେଖାଦେଇଥିବା ଅଶାନ୍ତି ଯୋଗୁଁ ଝାଡଖଣ୍ଡ ବହୁ କଷ୍ଟ ସହିଛି।
ଏଭଳି ପରିସ୍ଥିତିରେ ସେ ଝାଡଖଣ୍ଡର ଲୋକଙ୍କ ପାଇଁ କାମ କରିବାକୁ ଚାହାନ୍ତି, ଯେଉଁଥିରେ ଭିତ୍ତିଭୂମି ପ୍ରକଳ୍ପ ଠାରୁ ଆରମ୍ଭ କରି ଅନେକ ଗୁରୁତ୍ୱପୂର୍ଣ୍ଣ ପ୍ରକଳ୍ପ ଅନ୍ତର୍ଭୁକ୍ତ ହୋଇପାରେ। ଏଥିପାଇଁ ତାଙ୍କୁ ପାଣ୍ଠିର ଆବଶ୍ୟକ ହେବ। ତେବେ ଉଭୟଙ୍କ ମଧ୍ୟରେ କ’ଣ ଘଟିଛି ସେ ସମ୍ପର୍କରେ କୌଣସି ସରକାରୀ ସୂଚନା ପ୍ରକାଶ କରାଯାଇ ନାହିଁ।