କରୋନା ଭୂତାଣୁ ସହ ଲଢ଼ିବା ପାଇଁ ଭାରତୀୟ ବଜାରରେ ଉପଲବ୍ଧ ହେଲା ସବୁଠାରୁ ଶସ୍ତା ‘ଫାଭିଭିର’ ଔଷଧ, ଜାଣନ୍ତୁ କେତେ ରହିଛି ଦାମ

ନୂଆଦିଲ୍ଲୀ: ଭାରତରେ କରୋନା ରୋଗୀଙ୍କ ଚିକିତ୍ସା ପାଇଁ ବ୍ୟବହୃତ ହେବାକୁ ଥିବା ସବୁଠାରୁ ଶସ୍ତା ଔଷଧ ଆଜି ଭାରତରେ ଲଞ୍ଚ କରାଯାଇଛି। ଏହି ଔଷଧକୁ ଗତ ଜୁନ ମାସରେ ଭାରତୀୟ ଔଷଧ ମହାନିୟନ୍ତ୍ରକ (ଡିସିଜିଆଇ) ଜରୁରୀକାଳୀନ ବ୍ୟବହାର ପାଇଁ ଅନୁମତି ଦେଇଥିଲେ । । ଏହାକୁ ପ୍ରସ୍ତୁତ କରୁଥିବା ଫାର୍ମାସ୍ୟୁଟିକାଲ୍ କମ୍ପାନୀ ହେଟେରୋ ଡ୍ରଗ୍ସ, କରୋନା ଭୂତାଣୁ ସହ ମୁକାବିଲା କରିବାରେ ଏହା ସବୁଠାରୁ ଶସ୍ତା ଔଷଧ ବୋଲି ଦାବି କରିଛି। ଏହାର ଗୋଟିଏ ଟାବଲେଟ୍ ବଜାରରେ ମାତ୍ର ୫୯ ଟଙ୍କାରେ ଉପଲବ୍ଧ ହେବ ବୋଲି ଜଣା ପଡିଛି |

ହାଇଦ୍ରାବାଦ ସ୍ଥିତ ଫାର୍ମାସ୍ୟୁଟିକାଲ୍ କମ୍ପାନୀ ହେଟେରୋ ଡ୍ରଗ୍ସ କହିଛି ଯେ, ଏହି ଔଷଧର ବ୍ରାଣ୍ଡ ନାମ ‘ଫାଭିଭିର’ ହେବ। ଏହା ଏକ ଜେନେରିକ୍ ଆଣ୍ଟିରେଟ୍ରୋଭାଇରାଲ୍ ଔଷଧ | ଏହା ଫାଭିପିରାଭିର ନାମରେ ମଧ୍ୟ ଜଣାଶୁଣା | ଏହାପୂର୍ବରୁ କମ୍ପାନୀ ‘କୋଭିଫୋର’ ବ୍ରାଣ୍ଡ ନାମରେ ରେମେଡିସିଭିର ଔଷଧ ଲଞ୍ଚ କରିଥିଲା। ଫାଭିଭିର ୨୦୦ମିଗ୍ରା ଟାବଲେଟରେ ଆସିବ | ଏକ ଟାବଲେଟର ମୂଲ୍ୟ ୫୯ ଟଙ୍କା ହେବ | ଏହି ଔଷଧ ଅଧିକ ମୂଲ୍ୟରେ ବିକ୍ରି ହେବ ନାହିଁ ବୋଲି କମ୍ପାନି ପକ୍ଷରୁ କୁହାଯାଇଛି |

କମ୍ପାନୀ କହିଛି ଯେ, ଏହି ସମୟରେ ସମସ୍ତଙ୍କୁ ଫାଭିଭିର ଔଷଧ ଦରକାର | ଏହି ଔଷଧ ରୋଗୀମାନଙ୍କ ପାଇଁ ସର୍ବୋତ୍ତମ, ଯେଉଁମାନଙ୍କ ପାଖରେ କରୋନାର ସାମାନ୍ୟ କିମ୍ବା ମଧ୍ୟମ ଲକ୍ଷଣ ରହିଛି | କରୋନାଭାଇରସର ଜରୁରୀକାଳୀନ ପରିସ୍ଥିତିକୁ ଦୃଷ୍ଟିରେ ରଖି ଭାରତରେ ଫାଭିଭିରକୁ ଡିସିଜିଆଇ ଦ୍ୱାରା ଜୁନ୍ ମାସରେ ଅନୁମୋଦନ କରାଯାଇଥିଲା। ବର୍ତ୍ତମାନ ଏହାକୁ ବଜାରକୁ ଆଣିବାକୁ ଅନୁମତି ଦିଆଯାଇଛି।

ଦେଶର ପ୍ରତ୍ୟେକ ଔଷଧ ଦୋକାନରେ ଫାଭିଭିର ଉପଲବ୍ଧ ଥିବା ନେଇ କମ୍ପାନି କହିଥିବା ବେଳେ ଡାକ୍ତରଖାନା ଏବଂ କ୍ଲିନିକଗୁଡିକକୁ ମଧ୍ୟ ବିତରଣ କରାଯାଉଛି ବୋଲି କହିଛି ଔଷଧ କମ୍ପାନି। ଡାକ୍ତରଙ୍କ ପ୍ରେସକ୍ରିପସନ୍ ବିନା କୌଣସି ରୋଗୀଙ୍କୁ ଏହି ଔଷଧ ଦିଆଯିବ ନାହିଁ ବୋଲି କମ୍ପାନି ସ୍ପଷ୍ଟ କରିଛି।