ମହିଳା ହଷ୍ଟେଲ୍‌ର ଗାଧୁଆଘରୁ ବାହାରିଲା ‘ହିଡେନ୍‌ କ୍ୟାମେରା’; ଜଣେ ଗିରଫ

ହାଇଦ୍ରାବାଦ: ଆନ୍ଧ୍ରପ୍ରଦେଶର କିଷ୍ଣା ଜିଲ୍ଲାର ଏକ ଇଞ୍ଜିନିୟରିଂ କଲେଜର ମହିଳା ହଷ୍ଟେଲ ଗାଧୁଆଘରେ ହିଡେନ୍‌ କ୍ୟାମେରା ଲାଗିଥିବା ଦେଖିବାକୁ ମିଳିବା ପରେ ଛାତ୍ରଛାତ୍ରୀଙ୍କ ମଧ୍ୟରେ ଏହି ଭିଡିଓ ପ୍ରସାରିତ ହେବା ସହ ଘଟଣା ଉଗ୍ର ରୂପ ନେଇଛି। ଏହି ଘଟଣାକୁ ନେଇ ଏକ ମାମଲା ରୁଜୁ ହେବା ସହ ଏହି ଘଟଣା ସହ ଜଡ଼ିତ ଥିବା ଅଭିଯୋଗରେ ଜଣେ ଅନ୍ତିମ ବର୍ଷର ଛାତ୍ରଙ୍କୁ ଅଟକ ରଖାଯାଇଛି।

ଗୁଦଲାଭାଲେରୁ କଲେଜ ଅଫ୍ ଇଞ୍ଜିନିୟରିଂ କ୍ୟାମ୍ପସ୍ ହଷ୍ଟେଲ ଭିତରେ ରଖାଯାଇଥିବା ଏହି କ୍ୟାମେରାକୁ ଦେଖିବା ପରେ କ୍ୟାମ୍ପସରେ ଛାତ୍ରୀଙ୍କ ସୁରକ୍ଷା ତଥା ଗୋପନୀୟତା ନେଇ ଚିନ୍ତା ପ୍ରକଟ କରି ଛାତ୍ରୀମାନେ ବିକ୍ଷୋଭ ପ୍ରଦର୍ଶନ କରିଛନ୍ତି।

କ୍ୟାମେରାରେ ରେକର୍ଡ ହୋଇଥିବା କିଛି ଭିଡିଓ ବାଳକମାନଙ୍କ ହଷ୍ଟେଲରେ ପ୍ରସାରିତ ହୋଇଥିବାର ବି ଅଭିଯୋଗ ହୋଇଛି। "ଆମେ ନ୍ୟାୟ ଚାହୁଁଛୁ" ଭଳି ସ୍ଲୋଗାନ ଦେଇ ଛାତ୍ରୀମାନେ କଲେଜରେ ଏକାଠି ହୋଇ ହିଡେନ୍‌ କ୍ୟାମେରା ପଛରେ ଥିବା ଏବଂ ଭିଡିଓ ପ୍ରସାରଣରେ ଜଡିତ ଥିବା ବ୍ୟକ୍ତିଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି।

ଏହି ଘଟଣା ପରେ ପୁଲିସ୍‌ ଆସି ମାମଲାର ତଦନ୍ତ କରି କ୍ୟାମେରା ଲଗାଇବାରେ ସମ୍ପୃକ୍ତ ଥିବା ଜଣେ ଶେଷ ବର୍ଷର ଛାତ୍ରଙ୍କୁ ଧରି ନେଇ ଅଟକ ରହିଛି। ଅଧିକାରୀଙ୍କ ଅନୁଯାୟୀ ଛାତ୍ରଙ୍କ ପରିଚୟ ପ୍ରକାଶ କରାଯାଇ ନାହିଁ ଏବଂ ଅଧିକ ତଦନ୍ତ ଜାରି ରହିଛି।

ପୁଲିସ କହିଛି ଯେ ସେମାନେ ଛାତ୍ର ଏବଂ କଲେଜ କର୍ମଚାରୀଙ୍କ ଉପସ୍ଥିତିରେ ଅଭିଯୁକ୍ତଙ୍କ ଲାପଟପ୍, ମୋବାଇଲ୍ ଫୋନ୍ ଏବଂ ଅନ୍ୟାନ୍ୟ ଇଲେକ୍ଟ୍ରୋନିକ୍ ଗ୍ୟାଜେଟ୍ ଯାଞ୍ଚ କରିଛନ୍ତି ଏବଂ କୌଣସି ଆପତ୍ତିଜନକ ପ୍ରମାଣ ମିଳିନାହିଁ।