ଧର୍ମ ନ ବଦଳାଇ ବିବାହ କରିବା ବେଆଇନ, ନବଦମ୍ପତିଙ୍କୁ ସୁରକ୍ଷା ଦେବାକୁ ମନା କଲେ ହାଇକୋର୍ଟ

ଭୋପାଳ: ମଧ୍ୟପ୍ରଦେଶ ହାଇକୋର୍ଟ ଜଣେ ମୁସଲମାନ ଯୁବକ ଏବଂ ଜଣେ ହିନ୍ଦୁ ଯୁବତୀଙ୍କ ବିବାହ ସହ ଜଡିତ ମାମଲାରେ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ଧର୍ମ ପରିବର୍ତ୍ତନ ନକରି ବିବାହ ପଞ୍ଜିକରଣ କରିବାକୁ ଏବଂ ପୁଲିସର ସୁରକ୍ଷା ପ୍ରଦାନ କରିବାକୁ ଉଭୟ କୋର୍ଟରେ ଦାବି କରିଥିଲେ। ଯେଉଁଥିରେ ହାଇକୋର୍ଟ ଏହି ମାମଲାରେ ମୁସଲିମ ପର୍ସନାଲ ଆକ୍ଟକୁ ଦର୍ଶାଇ ବିବାହକୁ ବେଆଇନ ଘୋଷଣା କରିଥିଲେ। ସୁରକ୍ଷା ଯୋଗାଇବାକୁ ମଧ୍ୟ ମନା କରିଦେଇଥିଲେ। ହାଇକୋର୍ଟ କହିଛନ୍ତି ଯେ ମୁସଲମାନ ପୁଅ ଏବଂ ହିନ୍ଦୁ ଯୁବତୀଙ୍କ ମଧ୍ୟରେ ବିବାହ ମୁସଲିମ ନିୟମ ଅନୁଯାୟୀ ବୈଧ ବିବାହ ନୁହେଁ। ଏହି ରାୟ ସହିତ, ସ୍ୱତନ୍ତ୍ର ବିବାହ ଅଧିନିୟମ, ୧୯୫୪ ଅନୁଯାୟୀ ବିବାହ ପଞ୍ଜିକରଣ ପାଇଁ ପୁଲିସର ସୁରକ୍ଷା ମାଗିଥିବା ଆବେଦନକୁ କୋର୍ଟ ଖାରଜ କରିଦେଇଛନ୍ତି। ଜଷ୍ଟିସ ଗୁରୁପାଲ ସିଂ ଅଲୁୱାଲିଆ କହିଛନ୍ତି ଯେ ଜଣେ ମୁସଲମାନ ପୁଅ ଏବଂ ହିନ୍ଦୁ ଝିଅ ମଧ୍ୟରେ ବିବାହ ହୋଇଥିଲେ ବି ମୁସଲିମ ପର୍ସନାଲ ଆକ୍ଟ ଅନୁଯାୟୀ ଏହା ଏକ ଅବୈଧ ବିବାହ ବୋଲି ବିବେଚନା କରାଯିବ।

ବାସ୍ତବରେ ଅନୁପପୁରର ଜଣେ ଦମ୍ପତି (ଜଣେ ହିନ୍ଦୁ ମହିଳା ଏବଂ ଜଣେ ମୁସଲମାନ ପୁରୁଷ) ପୁଲିସର ସୁରକ୍ଷା ଦାବିରେ ହାଇକୋର୍ଟରେ ଆବେଦନ କରିଥିଲେ। ଆବେଦନକାରୀମାନେ ସେମାନଙ୍କ ଆବେଦନରେ କହିଛନ୍ତି ଯେ ସେମାନେ ପରସ୍ପରକୁ ଭଲ ପାଆନ୍ତି ଏବଂ ସ୍ୱତନ୍ତ୍ର ବିବାହ ଅଧିନିୟମ ଅନୁଯାୟୀ ବିବାହ କାର୍ଯ୍ୟାଳୟ ସହ ସମ୍ପର୍କ କରିଥିଲେ | ତେବେ ତାଙ୍କ ପରିବାରର ବିରୋଧ ହେତୁ ସେମାନେ ବିବାହ କାର୍ଯ୍ୟାଳୟକୁ ଯାଇପାରିନଥିଲେ, ଯେଉଁ କାରଣରୁ ତାଙ୍କ ବିବାହ ପଞ୍ଜୀକୃତ ହୋଇପାରି ନଥିଲା। ଏହା ପରେ ଆବେଦନକାରୀମାନେ ସ୍ୱତନ୍ତ୍ର ବିବାହ ଅଧିନିୟମ ଅନୁଯାୟୀ ସେମାନଙ୍କ ବିବାହ ପଞ୍ଜିକରଣ ପାଇଁ ବିବାହ କାର୍ଯ୍ୟାଳୟରେ ହାଜର ହେବା ପାଇଁ ହାଇକୋର୍ଟଙ୍କ ସୁରକ୍ଷା ମାଗିଥିଲେ। ସ୍ୱତନ୍ତ୍ର ବିବାହ ଅଧିନିୟମ ଅନୁଯାୟୀ ଏହି ଦମ୍ପତି ବିବାହ କରିବାକୁ ଚାହୁଁଥିଲେ। କୋର୍ଟରେ ଉଭୟ କହିଥିଲେ ଯେ ବିବାହ ପାଇଁ ଅନ୍ୟ କୌଣସି ଧର୍ମ ଗ୍ରହଣ କରିବାକୁ ଚାହାଁନ୍ତି ନାହିଁ। ମହିଳା ହିନ୍ଦୁ ଧର୍ମକୁ ଅନୁସରଣ କରୁଥିବାବେଳେ ପୁରୁଷ ବିବାହ ପରେ ମଧ୍ୟ ଇସଲାମ ଧର୍ମ ଅନୁସରଣ କରିବେ। ପୁଲିସ୍ ସୁରକ୍ଷା ଦେଲେ ସେମାନେ ବିବାହ ଅଧିକାରୀଙ୍କ ନିକଟରେ ହାଜର ହୋଇ ସ୍ୱତନ୍ତ୍ର ବିବାହ ଅଧିନିୟମ ଅନୁଯାୟୀ ସେମାନଙ୍କ ବିବାହ ପଞ୍ଜିକୃତ କରିପାରିବେ ବୋଲି ଆବେଦନ କରିଥିଲେ। ଅଦାଲତ ଏହି ଦମ୍ପତିଙ୍କ ଆବେଦନକୁ ପ୍ରତ୍ୟାଖ୍ୟାନ କରିଦେଇଛନ୍ତି |

ସମ୍ବନ୍ଧିତ ଖବର