ନୂଆଦିଲ୍ଲୀ : ନଭେମ୍ବର ୨୦୨୦ ରୁ ଜୁନ୍ ୨୦୨୧ (ଆଠ ମାସ) ମଧ୍ୟରେ ଫରେଷ୍ଟ୍ ସର୍ଭେ ଅଫ୍ ଇଣ୍ଡିଆ (ଏଫ୍ଏସ୍ଆଇ) ଦ୍ବାରା ଓଡ଼ିଶା ପାଇଁ ୫୧ ହଜାର ୯୬୮ ବନାଗ୍ନି ସତର୍କତା (ଫରେଷ୍ଟ୍ ଫାୟାର୍ ଆଲର୍ଟ) ଜାରି କରାଯାଇଛି। ଦେଶର ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଂଚଳ ତୁଳନାରେ ଓଡ଼ିଶାରେ ସର୍ବାଧିକ ସଂଖ୍ୟାରେ ଏଫ୍ଏସ୍ଆଇ ପକ୍ଷରୁ ଫରେଷ୍ଟ୍ ଫାୟାର୍ ଆଲର୍ଟ ଜାରି କରାଯାଇଥିବା ଆଜି ରାଜ୍ୟସଭାରେ କେନ୍ଦ୍ର ଜଙ୍ଗଲ ପର୍ଯ୍ୟାବରଣ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୂପେନ୍ଦ୍ର ଯାଦବ ବିଜେଡି ସାଂସଦ ମମତା ମହନ୍ତଙ୍କ ପ୍ରଶ୍ନର ଲିଖିତ ଉତ୍ତରରେ ସୂଚନା ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଓଡ଼ିଶାରେ ନଭେମ୍ବର ୨୦୧୯ ରୁ ଜୁନ ୨୦୨୦ ମଧ୍ୟରେ ଫରେଷ୍ଟ୍ ଫାୟାର୍ ଆଲର୍ଟର ସଂଖ୍ୟା ୧୦ ହଜାର ୬୦୨ ଥିବାବେଳେ ୨୦୨୦-୨୧ରେ ଏହି ସଂଖ୍ୟାରେ ଯଥେଷ୍ଟ ବୃଦ୍ଧି ହୋଇଥିବା କେନ୍ଦ୍ର ମନ୍ତ୍ରୀଙ୍କ ପ୍ରଦତ୍ତ ସୂଚନାରୁ ଜଣାପଡ଼ିଛି। ନଭେମ୍ବର ୨୦୨୦ ରୁ ଜୁନ୍ ୨୦୨୧ ମଧ୍ୟରେ ଦେଶରେ ସର୍ବମୋଟ ୩ ଲକ୍ଷ ୪୫ ହଜାର ୯୮୯ ଫରେଷ୍ଟ୍ ଫାୟାର୍ ଆଲର୍ଟ ଜାରି କରାଯାଇଥିଲା ବୋଲି କେନ୍ଦ୍ରମନ୍ତ୍ରୀ ଉତ୍ତରରେ ଉଲ୍ଲେଖ କରିଛନ୍ତି। ଓଡ଼ିଶାରେ ଫରେଷ୍ଟ ଫାୟାର ଜନିତ କ୍ଷୟକ୍ଷତିର ଆକଳନ କରାଯାଇନଥିବା ମନ୍ତ୍ରୀଙ୍କ ଉତ୍ତରରେ ଦର୍ଶାଯାଇଛି। ଓଡ଼ିଶାରେ ଫରେଷ୍ଟ ଫାୟାରକୁ ନିୟନ୍ତ୍ରଣ ତଥା ପରିଚାଳନା ଯୋଜନା ପାଇଁ ୨୦୨୦-୨୧ ପାଇଁ ୪ କୋଟି ୫୫ ଲକ୍ଷ ଟଙ୍କା କେନ୍ଦ୍ର ସରକାରଙ୍କ ପକ୍ଷରୁ ଆବଷ୍ଟନ କରାଯାଇଥିବା ଉତ୍ତରରେ କୁହାଯାଇଛି।