ପାକିସ୍ତାନରେ ନିର୍ବାଚନ ଲଢୁଥିବା ଏହି ହିନ୍ଦୁ ମହିଳା କିଏ ?

ଇସଲାମାବାଦ: ପାକିସ୍ତାନରେ ହିନ୍ଦୁ ମହିଳାଙ୍କ ଅବସ୍ଥା କ'ଣ, ତାହା କାହାଠାରୁ ଲୁଚି ନାହିଁ। ଏଭଳି ସ୍ଥିତିରେ ଯଦି କୌଣସି ହିନ୍ଦୁ ମହିଳା ପାକିସ୍ତାନରେ ନିର୍ବାଚନ ଲଢ଼ିବା ପାଇଁ ନାମାଙ୍କନ ଦାଖଲ କରନ୍ତି, ତେବେ ଏହା ଅତ୍ୟନ୍ତ ଆଶ୍ଚର୍ଯ୍ୟଜନକ ବୋଲି କୁହାଯିବ। ଏପରି ଆଶ୍ଚର୍ଯ୍ୟଜନକ କାମ କରିଦେଖାଇଥିବା ମହିଳା ହେଉଛନ୍ତି ସବେରା ପ୍ରକାଶ ।

ପାକିସ୍ତାନୀ ଖବରକାଗଜ ଡନ୍ ରିପୋର୍ଟ ଅନୁଯାୟୀ, ପାକିସ୍ତାନରେ ଆଗାମୀ ନିର୍ବାଚନରେ ଖାଇବର ପଖ୍ତୁନଖୱାର ବୁନେର ଜିଲ୍ଲାର ଜଣେ ହିନ୍ଦୁ ମହିଳା ସବେରା ପ୍ରକାଶ ପ୍ରଥମ ଥର ପାଇଁ ଏକ ସାଧାରଣ ଆସନ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି।

ପାକିସ୍ତାନର ୧୬ତମ ନ୍ୟାସନାଲ ଆସେମ୍ବଲି ପାଇଁ ଫେବୃଆରୀ ୮, ୨୦୨୪ରେ ସାଧାରଣ ନିର୍ବାଚନ ଅନୁଷ୍ଠିତ ହେବ । ବୁନେର ଜିଲ୍ଲାର ପିକେ-୨୫ ସାଧାରଣ ଆସନ ପାଇଁ ସବେରା ପ୍ରକାଶ ଆନୁଷ୍ଠାନିକ ଭାବେ ନାମାଙ୍କନ ପତ୍ର ଦାଖଲ କରିଛନ୍ତି। ୩୫ ବର୍ଷୀୟ ପ୍ରକାଶ ପାକିସ୍ତାନ ପିପୁଲ୍ସ ପାର୍ଟି (ପିପିପି) ଟିକେଟରେ ତାଙ୍କ ପିତା ଓମ୍ ପ୍ରକାଶଙ୍କ ପଦାଙ୍କ ଅନୁସରଣ କରିବାକୁ ଆଶାବାଦୀ ଅଛନ୍ତି। ତାଙ୍କ ବାପା ଓମ୍ ପ୍ରକାଶ ନିକଟରେ ଅବସର ନେଇଥିଲେ। ସେ ପେସାରେ ଜଣେ ଡାକ୍ତର  ହେବା ସହ ପିପିପିର ଜଣେ ସଦସ୍ୟ ଥିଲେ ।

କୌମି ଓ୍ବତନ ପାର୍ଟି ସହ ଜଡ଼ିତ ସ୍ଥାନୀୟ ରାଜନେତା ସଲିମ ଖାନ୍ କହିଛନ୍ତି ଯେ ପ୍ରକାଶ ହେଉଛନ୍ତି ପ୍ରଥମ ମହିଳା ଯିଏ ଆଗାମୀ ସାଧାରଣ ନିର୍ବାଚନ ପାଇଁ ବୁନେରରୁ ନାମାଙ୍କନ ପତ୍ର ଦାଖଲ କରିଛନ୍ତି।