ହର୍ଣ୍ଣ ବଜାଇବାକୁ ନେଇ ଝଗଡ଼ା: ଯୁବକଙ୍କୁ ବନେଟରେ ଟାଣିନେଲେ କାର୍ ଚାଳକ

ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଏବେ ପୁଣି ଏକ 'ହିଟ୍ ଆଣ୍ଡ ରନ୍' ମାମଲା ସାମ୍ନାକୁ ଆସିଛି। ଦିଲ୍ଲୀର ଲୋକମାନେ ଅଞ୍ଜଳି ସିଂହଙ୍କ ମୃତ୍ୟୁ ଘଟଣା ଭୁଲିନଥିବା ବେଳେ ଏବେ ପୁଣି ସେଭଳି ଘଟଣା ଘଟିଛି। ଅଞ୍ଜଳିଙ୍କୁ ଏକ କାର୍ ୧୨କିଲୋମିଟର ଘୋଷ‌ାଡି ନେବା ପରେ ତାଙ୍କର ମୃତ୍ୟୁ ହୋଇଥିଲା। ଏବେ କାର୍ ଆରୋହୀ ଜଣେ ଯୁବକଙ୍କୁ ଧକ୍କା ଦେଇ କାରର ବନେଟରେ ଅଧା କିଲୋମିଟର ପର୍ଯ୍ୟନ୍ତ ଟାଣି ନେଇଥିବା ଜଣାପଡ଼ିଛି। ଏହି ହୃଦୟ ବିଦାରକ ଘଟଣା ଦିଲ୍ଲୀର ରଜୌରୀରେ ଗାର୍ଡେନରେ ଘଟିଛି।

କୁହାଯାଉଛି ଯେ ରଜୌରୀରେ ଗାର୍ଡେନରେ ହର୍ଣ୍ଣ ବଜାଇବାକୁ ନେଇ ଦୁଇ ପକ୍ଷ ମଧ୍ୟରେ ଝଗଡା ହୋଇଥିଲା। ଏହି ଝଗଡା ବେଳେ କାରରେ ଥିବା ଜଣେ ଯୁବକ ରାଗି ଯାଇ ଅନ୍ୟ ଯୁବକଙ୍କୁ ଧକ୍କା ଦେଇଥିଲେ। ଏହା ପରେ ସେ ଯୁବକକୁ ବନେଟରେ ଅଧା କିଲୋମିଟର ପର୍ଯ୍ୟନ୍ତ ଟାଣି ନେଇଥିଲେ। ତେବେ ଏହି ଘଟଣା ପରେ ଦୁଇ ପକ୍ଷ ପୁଲିସରେ ଅଭିଯୋଗ କରିନାହାନ୍ତି।

ଘଟଣା ଘଟିବା ସମୟର ସିିସିଟିଭି ଫୁଟେଜ ସାମ୍ନାକୁ ଆସିବା ପରେ ଘଟଣାର ଗମ୍ଭୀରତାକୁ ଦେଖି ପୁଲିସ ତଦନ୍ତ ଆରମ୍ଭ କରିଛି। କାରର ନମ୍ବରରୁ ଅଭିଯୁକ୍ତଙ୍କୁ ଖୋଜିବାକୁ ଚେଷ୍ଟା କରୁଛି ପୁଲିସ। ଏହା ସହିତ ପୀଡ଼ିତଙ୍କ ବିଷୟରେ ମଧ୍ୟ ତଥ୍ୟ ସଂଗ୍ରହ କରାଯାଉଛି।