ହଂକଂ : ଶନିବାର ଅର୍ଥାତ ଜୁନ ୪ ଥିଲା ତିଆନାନମେନ ଗଣହତ୍ୟାର ୩୪ତମ ବର୍ଷପୂର୍ତ୍ତି । କିନ୍ତୁ ଏହି ଗଣହତ୍ୟା ସ୍ମୃତିରେ ହଂକଂରେ ଆୟୋଜିତ ଏକ ମହମ ବତୀ ଶୋଭାଯାତ୍ରାକୁ ଚୀନ ପକ୍ଷରୁ ନିଷିଦ୍ଧ କରାଯାଇଛି । ୩ ବର୍ଷ ପୂର୍ବେ ହଂକଂରେ ହୋଇଥିବା ଗଣତନ୍ତ୍ର ସପକ୍ଷବାଦୀ ବିକ୍ଷୋଭ ପରେ ଚୀନ ଏପରି କୌଣସି ଶୋଭାଯାତ୍ରାକୁ ଅନୁମତି ଦେଉନାହିଁ ଓ ଏପରି ଶୋଭାଯାତ୍ରାରେ ଭାଗ ନେଉଥିବା ଲୋକମାନଙ୍କୁ କଠୋର ହସ୍ତରେ ଦମନ କରୁଛି । ହଂକଂରେ ଚୀନ ପକ୍ଷରୁ ଲାଗୁ କଠୋର ଜାତୀୟ ସୁରକ୍ଷା ଆଇନକୁ ବ୍ୟବହାର କରି ପୁଲିସ ପକ୍ଷରୁ ଦମନଲୀଳା ଚଳାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ତାଇଓ୍ବାନର ରାଜଧାନୀ ତାଇପେଇଠାରେ ଆଜି ସତ୍ତ୍ବେ ଶହ ଶହ ବିକ୍ଷୋଭକାରୀ ‘ଲଜ୍ଜା ସ୍ତମ୍ଭ’ ନିକଟରେ ଏକତ୍ରିତ ହୋଇ ବିକ୍ଷୋଭ କରିଥିଲେ ।
ତିଆନାନମେନ ଗଣହତ୍ୟା କଣ ?
୧୯୮୦ ଦଶକରେ ଚୀନରେ ଅର୍ଥନୈତିକ ସଂକଟ ଦେଖାଦେଇଥିବାବେଳେ ଶାସକ କମ୍ୟୁନିଷ୍ଟ ଦଳ ବିରୋଧରେ ଅନେକ ଦୁର୍ନୀତି ଅଭିଯୋଗ ଆସିଥିଲା । ଏସବୁ ବିରୋଧରେ ଚୀନର ସାଧାରଣ ଲୋକେ ବିଶେଷକରି ଛାତ୍ରଛାତ୍ରୀମାନେ ବିକ୍ଷୋଭ ଆରମ୍ଭ କରିଦେଇଥିଲେ ।
ଲୋକମାନେ ଚୀନରେ କମ୍ୟୁନିଷ୍ଟ ଦଳର କଠୋର କଟକଣାକୁ ଉଠାଇବା ସହ ଗଣତାନ୍ତ୍ରିକ ଅଧିକାର ପ୍ରଦାନ କରିବାକୁ ବିକ୍ଷୋଭ କରୁଥିଲେ । ୧୯୮୯, ଜୁନ ୪ରେ ବେଜିଂର ତିଆନାନମେନ ଛକଠାରେ ଏକ ବଡ଼ ଧରଣର ବିକ୍ଷୋଭ ହୋଇଥିଲା । ଏହାକୁ ଦମନ କରିବାକୁ ଚୀନ ସରକାର ଚୀନ ସେନା (ପିଏଲଏ)କୁ ନିୟୋଜିତ କରିଥିଲେ । ପିଏଲଏ ଅତ୍ୟନ୍ତ ନିର୍ମମ ଭାବେ ଆନ୍ଦୋଳନରତ ଛାତ୍ରଛାତ୍ରୀମାନଙ୍କୁ ଟ୍ୟାଙ୍କରୁ ଗୁଳି ଚଳାଇ ହତ୍ୟା କରିଥିଲେ । ଚୀନ ସରକାରଙ୍କ ତଥ୍ୟ ଅନୁସାରେ ପ୍ରାୟ ୩୦୦ ଲୋକ ମୃତ୍ୟୁବରଣ କରିଥିଲେ । କିନ୍ତୁ ବିଭିନ୍ନ ଅନ୍ତର୍ଜାତୀୟ ଏଜେନ୍ସିଙ୍କ ରିପୋର୍ଟ ଅନୁସାରେ ଏହି ଘଟଣାରେ ପ୍ରାୟ ୨୭୦୦ଲୋକ ପ୍ରାଣ ହରାଇଥିଲେ ।