ନିରବ ମୋଦି ଗିରଫ ବାବଦରେ ହଂକଂ ସରକାର ନିଷ୍ପତ୍ତି ନେବେ: ଚୀନ
ବେଜିଂ: ଦେଶର ସବୁଠୁ ବଡ଼ ଠକ ନିରବ ମୋଦି ହଂକଂରେ ଥିବା ସଂଦେହ କରାଯାଉଛି । ଏ ନେଇ ଗୁଇନ୍ଦା ସୁତ୍ରରୁ ସୁରାକ ମିଳିବା ପରେ ତାକୁ ଗିରଫ କରିବାକୁ ଭାରତ ସରକାର ହଂକଂର ସ୍ୱତନ୍ତ୍ର ପ୍ରାଶାସନିକ ଅଞ୍ଚଳ ସରକାରଙ୍କୁ ଅନୁରୋଧ କରିଥିବା ଜଣାପଡିଛି । ଗତ ସପ୍ତାହରେ କେନ୍ଦ୍ର ବିଦେଶ ରାଷ୍ଟ୍ରମନ୍ତ୍ରୀ ଭି.କେ. ସିଂ ଏ ସଂପର୍କରେ ସଂସଦକୁ ସୂଚୀତ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଚୀନ ସରକାରଙ୍କ ପକ୍ଷରୁ କୁହାଯାଇଛି ଯେ ଚୀନର ଏକ ଦେଶ ଦୁଇ ବ୍ୟବସ୍ଥା ନିୟମ ଅନୁସାରେ ହଂକଂ ସରକାର କେନ୍ଦ୍ରୀୟ ସରକାରଙ୍କ ପରାମର୍ଶ ଓ ନିଜସ୍ୱ ଆଇନ ଅନୁସାରେ ଏ ବାବଦରେ ନିଷ୍ପତ୍ତି ନେଇପାରିବେ । ଭାରତ ଯଦି ଉପଯୁକ୍ତ ଭାବେ ହଂକଂ ସରକାରଙ୍କୁ ଆବେଦନ କରନ୍ତି ତେବେ ହଂକଂ ସରକାର ଏ ନେଇ ଆଇନ ଅନୁସାରେ ପଦକ୍ଷେପ ନେବେ । ଉଲ୍ଲେଖଯୋଗ୍ୟ ଯେ ଚୀନ ଅଧିନରେ ଆସୁଥିଲେ ମଧ୍ୟ ହଂକଂ କେତେକ ପ୍ରାଶାସନିକ ସ୍ୱାୟତ୍ତତା ଉପଭୋଗ କରିଥାଏ ।
ସୂଚନାଯୋଗ୍ୟ ଯେ ପ୍ରାୟ ୧୩ ହଜାର କୋଟି ଟଙ୍କାର ପିଏନବି ମହାଦୁର୍ନୀତିର ମୁଖ୍ୟ ନାୟକ କୁହାଯାଉଥିବା ନିରବ ମୋଦି ହଂକଂରେ ଥିବା ଗତ ମାର୍ଚ୍ଚ ମାସରେ ହିଁ ଜଣାପଡିଥିଲା । ନିରବ ମୋଦି ଓ ତାଙ୍କ ମାମୁଁ ମେହୁଲ ଚୋକସୀ ମିଳିତଭାବେ ଷଡ଼ଯନ୍ତ୍ର କରି ଜାଲ ଏଲଓୟୁ ମାଧ୍ୟମରେ ଏହି ଠକେଇ କରିଥିବା ଜଣାପଡିଛି । ପିଏନବି ଠକେଇ ମାମଲାର ସିବିଆଇ ତଦନ୍ତ କରୁଛି । କିନ୍ତୁ ଏହା ସହିତ ଇଡି ମଧ୍ୟ ଏକ ମନି ଲଣ୍ଡରିଂ ମାମଲା ରଜ୍ଜୁ କରିଛି ।