ନୂଆଦିଲ୍ଲୀ: ୧୯୮୪ ମସିହାରେ ଭାରତର ପ୍ରଥମ ମହାକାଶଚାରୀ ରାକେଶ ଶର୍ମା ମହାକାଶକୁ ଯାଇଥିଲେ। ସେ ଫେରିବା ପରେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ତାଙ୍କୁ ହିନ୍ଦୀରେ ପଚାରିଥିଲେ: ମହାକାଶରୁ ଭାରତ କେମିତି ଦେଖାଯାଏ? ଉତ୍ତରରେ ମହମ୍ମଦ ଇକବାଲଙ୍କ କବିତା ‘ସାରେ ଜହାଁ ସେ ଅଚ୍ଛା’ର ଏକ ଧାଡ଼ି ଆବୃତ୍ତି କରିଥିଲେ ରାକେଶ ଶର୍ମା। ଦୀର୍ଘ ୪ ଦଶନ୍ଧି ପରେ ଅନ୍ତର୍ଜାତୀୟ ମହାକାଶ କେନ୍ଦ୍ର (ଆଇଏସ୍ଏସ୍)ରେ ୨୮୬ ଦିନ ରହି ଫେରିଥିବା ଭାରତୀୟ ବଂଶୋଦ୍ଭବ ନାସା ମହାକାଶଚାରୀ ସୁନୀତା ୱିଲିୟମ୍ସଙ୍କୁ ମଧ୍ୟ ସମାନ ପ୍ରଶ୍ନ ପଚରାଯାଇଥିଲା। ସୋମବାର ଯେତେବେଳେ ଜଣେ ସାମ୍ବାଦିକ ସୁନୀତାଙ୍କୁ ପଚାରିଥିଲେ ଯେ ସେଠାରୁ ଭାରତ କେମିତି ଦେଖାଯାଉଛି, ସେ କହିଲେ, ଆକର୍ଷଣୀୟ, ଅତି ଆକର୍ଷଣୀୟ। ମହାକାଶରୁ ହିମାଳୟର ଆକର୍ଷଣୀୟ ଦୃଶ୍ୟ ବର୍ଣ୍ଣନା କରି ସେ କହିଛନ୍ତି, ଭାରତ ଅଦ୍ଭୁତ, ଅତି ଅଦ୍ଭୁତ। ଯେତେବେଳେ ବି ଆମେ ହିମାଳୟ ଉପର ଦେଇ ଯାଉଥିଲୁ, ଆମକୁ ଅବିଶ୍ୱସନୀୟ ଚିତ୍ର ଦେଖିବାକୁ ମିଳୁଥିଲା। ପୃଥିବୀକୁ ଫେରିବା ପରେ ବୁଚ୍ ୱିଲ୍ମୋରଙ୍କ ସହ ମିଶି ପ୍ରଥମ ସାମ୍ବାଦିକ ସମ୍ମିଳନୀ କରିଥିବା ସୁନୀତା ୱିଲିୟମ୍ସ ମହାକାଶରୁ ଭାରତର ଚେହେରା ବିଷୟରେ ଏପରି କହିଛନ୍ତି।

Advertisment

ସୁନୀତା ୱିଲିୟମ୍ସ ଭାରତ ଆସିବାକୁ ଯୋଜନା କରୁଛନ୍ତି କି?
ଭାରତ ଗସ୍ତ କରି ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ(ଇସ୍ରୋ)ର କାର୍ଯ୍ୟକ୍ରମରେ ସାହାଯ୍ୟ କରିବାକୁ ଚାହୁଛନ୍ତି କି ବୋଲି ପଚରାଯିବାରୁ ୱିଲିୟମ୍ସ କହିଛନ୍ତି, ମୁଁ ଆଶା କରୁଛି ଆମେ କୌଣସି ସମୟରେ ସାକ୍ଷାତ୍ କରିପାରିବୁ ଏବଂ ଭାରତର ଅଧିକରୁ ଅଧିକ ଲୋକଙ୍କ ସହ ଆମର ଅନୁଭୂତି ବାଣ୍ଟିପାରିବୁ। ଭାରତ ଏକ ମହାନ ଦେଶ ଏବଂ ଏକ ଚମତ୍କାର ଗଣତନ୍ତ୍ର। ଏହା ଉଚ୍ଚ ମହାକାଶ ଅଭିଳାଷ ରଖିଛି ଏବଂ ଏହାର ଏକ ଅଂଶ ହେବାକୁ ଏବଂ ସେମାନଙ୍କୁ ସାହାଯ୍ୟ କରିବାକୁ ପସନ୍ଦ କରିବି। ୱିଲିୟମ୍ସଙ୍କ ପାଖରେ ବସିଥିବା ବୁଚ୍ ୱିଲ୍ମୋର ତୁରନ୍ତ ତାଙ୍କୁ ପଚାରିଲେ, ଆପଣ ନିଜର କ୍ରୁ ମେମ୍ବରମାନଙ୍କୁ  ନିଜ ସହିତ ସେହି ଯାତ୍ରାରେ ନେବାକୁ ଯୋଜନା କରୁଛ କି? ‘ନିଶ୍ଚୟ’ ବୋଲି ଉତ୍ତର ଦେଇଥିଲେ ଭାରତୀୟ ବଂଶୋଦ୍ଭବ ସୁନୀତା।